मकालु एयरको जहाज दुर्घटना : पाइलटको शव काठमाडौं ल्याइयो
सुर्खेत — मकालु एयरको सिंगल इन्जिनयुक्त जहाज दुर्घटनामा मृत्यु भएका चालक दलका सदस्यको शव काठमाडौं ल्याइ पुर्याएको छ । सिम्रिक एयरको हेलिकोप्टर शव लिएर करिब एक बजे
काठमाडौंको उडेको थियो ।
सिम्रिक एयरका सुर्खेत प्रतिनिधि कमल गौतमका अनुसार हेलिकोप्टरमा सहचालक आदित्य नेपालीका बुवा एवं एयरलाइन्सका मालिक फिजुनाथ नेपाली पनि सँगै गएका छन् । दिउँसो पौने ३ बजे हेलिकोप्टर शिक्षण अस्पताल महाराजगंजमा अवतरण हुने गौतमले बताए । घटनास्थलबाट माउन्टेन एयरको हेलिकोप्टरले शव सुर्खेत ल्याएको थियो ।
सिम्रिक एयरको हेलिकोप्टरमा फिजुनाथसहित नेपाल नागरिक उड्डयन प्राधिकरणका दुई वरिष्ठ अधिकारी सुर्खेत आएका थिए । उनीहरु भने पुन: घटनास्थल फर्कंदैछन् ।
बुधबार बिहान ६:१२ बजे सुर्खेतबाट कार्गो सामान लिएर सिमकोट उडेको मकालु एयरको एजेयू–नाइन–एन सिमकोटदेखि १०.७ नटिकल माइल दक्षिण–पश्चिम थार्पुनाथ गाउँपालिकाको बाहुनचौरमा दुर्घटना भएको थियो ।
नेपाल प्रहरीका कर्णाली प्रदेश प्रहरी प्रमुख डिआइजी सुरेश शाहका अनुसार स्थानीयले जहाज देखेको सूचना दिएपछि सिमकोटबाट नेपाल प्रहरीका असई, नागरिक उड्डयन प्राधिकरणका एकजना कर्मचारी र दुईजना मेडिकल सदस्य रहेको टोली त्यहाँ पुगेको थियो ।
उक्त टोलीले शव निकाल्न नसकेपछि सिमकोटबाट हेलिकोप्टरमा थप जनशक्ति लिएर हेलिकोप्टर त्यसतर्फ गएको थियो । घटनास्थल समुद्री सतहदेखि १२,८०० फिट उचाईमा अवस्थित छ ।
काठमाडौंको तस्बिरहरु : अंगद ढकाल/कान्तिपुर ।