सरकारले करिव १२ सय किलोमिटरको मदन भण्डारी राजमार्ग बनाउने निर्णय गरेको छ । मन्त्रिपरिषद् बैठकले प्रदेश मन्त्रालयको संगठन संरचनासम्बन्धि प्रस्ताव स्वीकृत गरेको छ ।
सरकारले आउँदो आर्थिक वर्षको नीति तथा कार्यक्रम सोमबार संघीय संसद्मा पेस गर्दै छ । सरकारका तर्फबाट राष्ट्रपति विद्यादेवी भण्डारीले संघीय संसदको संयुक्त बैठकमा पहिलो पटक नीति तथा कार्यक्रम प्रस्तुत गर्नेछिन् ।
नेपाल सरकारको बिनाअनुमति मलेसिया जाने कामदारको ‘भिसा प्रोसेसिङ’ गर्ने कम्पनी र स्वास्थ्य परीक्षण गर्ने स्वास्थ्य संस्थासँग सम्बन्धित ४८ जनालाई प्रहरीले आइतबार पक्राउ गरेको छ । अपराध अनुसन्धान विभागका प्रमुख डिआजी धिरु बस्नेतको नेतृत्वमा परिचालित प्रहरीले ३९ वटा स्वास्थ्य परीक्षण गर्ने स्वास्थ्य संस्था, वान स्टेप सेन्टर (ओएससी), भिएलएन, जीएसजी कम्पनीमा छापा मारेको हो ।
त्रिभुवन विश्वविद्यालयले पूर्वविद्यार्थीलाई संगठित गरी विश्वविद्यालयको उन्नयनमा जुटाउन प्राध्यापक डा. सुनीति हाडा श्रेष्ठको संयोजकत्वमा त्रिवि अल्मुनाई एसोसिएसन गठन गरेको छ ।
कम्युनिस्ट नेता ऋषि कट्टेल अध्यक्ष रहेको नेपाल कम्युनिस्ट पार्टीले एमाले र माओवादी एकीकृत भई बनेको ‘नेपाल कम्युनिस्ट पार्टी’ लाई कानुनविपरीत निर्वाचन आयोगले दर्ता गरेको भन्दै आपत्ति जनाएको छ ।
कांग्रेस नेता गगन थापाले राष्ट्रपति विद्या भण्डारीले पदीय गरिमा र मर्यादाको अवमूल्यन गरेको आरोप लगाएका छन् । नेपाल तरुण दलले आइतबार बिहान आयोजना गरेको तरुण प्रशिक्षण कार्यक्रमलाई सम्बोधन गर्दै उनले एमाले र माओवादी केन्द्रको एकता गराउन बैठक बोलाएर राष्ट्रपतिले पदको दुरुपयोग गरेको टिप्पणी गरेका हुन् ।
साढे ३३ किलो सुन तस्करी र सनम शाक्य हत्या मुद्दामा प्रतिवादी कानुन व्यवसायीहरुको बहस सोमबार सकिने भएको छ । आइतबारसम्म ५३ जनाले न्यायाधीश नारायणप्रसाद शर्मासमक्ष प्रतिवादीका तर्फबाट बहस गरेका छन् ।
प्रहरीले वान स्टेप सेन्टर (ओएससी) र भिएलएनका सञ्चालक राम श्रेष्ठलाई गैरीधाराबाट पक्राउ गरेको छ । श्रम मन्त्रालयले ओएससी, भिएलएनलगायतको काम अवैध भएको निर्णय गरी गृहलाई कारबाहीको लागि सिफारिस गर्नासाथ प्रहरीले कारबाही प्रक्रिया अगाडि बढाएको हो ।
आँधीखोला नदीमा बगाइएको कुखुराको सुलीबाट भएको क्षतिको विवरण अझै आउन सकेको छैन । जिल्लाकै एक मात्र ठूलो एग्रो फर्मको रुपमा रहेको कालीका एग्रोफर्मले गत वैशाख २१ गते राती आँधीखोला नदीमा कुखुराको सुली बगाउँदा ठूलो संख्यामा रहेका माछा लगायतका जलचरहरु मरेका थिए ।
हाल संचालनमा रहेको चीनसँगको एक मात्र अन्तर्राष्ट्रिय व्यापारिक नाका रसुवागढीसम्म पुग्ने मैलुङ–स्याफ्रुबेंसी सडकको ट्र्याक खोलेर नेपाली सेनाले यातायात मन्त्रालयलाई हस्तान्तरण गरेको छ ।
आइतबार बिहान ताप्लेजुङमा रहेको विश्वको तेश्रो अग्लो हिमशिखर (८,५८६) कञ्चनजंघा ११ जनाले आरोहण गरेका छन् । १२ जनाको टोली अन्तिम शिविरमा रहेका छन् । उनीहरु आरोहणको अन्तिम प्रयासमा रहेको जानकारी दिइएको छ ।
संघीय संसद्को नियमावलीमा दलहरूबीच सहमति नजुट्दा संवैधानिक नियुक्ति अड्किएको छ । संसदीय समितिहरू गठन हुन नसक्दा सुशासन र दैनिक समस्या निराकरणसमेत प्रभावित भएको छ ।