आयल निगमका कार्यकारी निर्देशक गोपाल खड्काद्वारा राजीनामा

राजु चौधरी

काठमाडौँ — नेपाल आयल निगमका कार्यकारी निर्देशक गोपाल खड्काले राजीनामा दिएका छन् । उनले बिहीबार उद्योग वाणिज्य तथा आपूर्ति मन्त्रालय सिंहदरबारमा पत्रकार सम्मेलन गर्दै आजकै मितिबाट लागु हुने गरी राजीनामा दिएको बताए । 

उनले भने, 'मैले राम्रो नियतले नै पेट्रोलियम पदार्थको भण्डारण क्षमता बढाउन पहल गरेको थिएँ। तर देशी/विदेशी शक्ति र अन्य समूहले म विरुद्ध खनिएर बद्नाम गरे।'

Yamaha

उनले आफूलाई गत कात्तिकमा मन्त्रालयमा तानेर जिम्मेवारीबिहीन बनाएकोले यो पदमा बसिरहन उपयुक्त नभएको बताए। उनले भने, 'मलाई मन्त्रिपरिषद्ले हटाए पनि सर्वोच्चले मेरो लागि स्टे अडर जारी गरेको थियो। र, म हाजिर भएँ। हाजिर भएपछि पनि मलाई कुनै जिम्मेवारी दिइएन। मेरो मनोबल गिराउने काम भयो। त्यसैले मैले राजीनामा दिएँ।'

उनले भर्खरै आपूर्ति मन्त्री मातृका यादवलाई राजीनामा पत्र बुझाउन गएका छन्।

आयल निगममा हुँदा व्यापक अनियमितता गरेको आरोप लागेका खड्कालाई लागेको थियो। उनलाई इन्धन भण्डारणको लागि जग्गा खरिद गर्दा अनियमितताको आरोप लागेकाले निगममै राख्दा निगमको हित विपरित कार्य गर्न सक्ने भन्दै आपूर्ति मन्त्रालयले मन्त्रालयमा हाजिर गराउने निर्णय शेरबहादुर देउवा नेतृत्वको सरकारले गरेको थियो।

उनको अझै ६ महिनाको कार्यकाल बाँकी नै थियो।

प्रकाशित : जेष्ठ २४, २०७५ ११:४३
ADVERTISEMENT
प्रतिक्रिया
पठाउनुहोस्
ADVERTISEMENT

सशस्त्रको गाडीमा काठ तस्करी घटना छानबिन गर्न समिति

रमेशचन्द्र अधिकारी

धनकुटा — सशस्त्र प्रहरी बलको अरुण गुल्म, संखुवासभा चैनपुरको सवारी साधनमा लाखौं मुल्य पर्ने सखुवाको काठ तस्करी प्रकरण थप रहस्यमय बन्दै गएको छ । संखुवासभा, तेह्रथुम र धनकुटासम्म पुग्दा कयौं स्थानमा रहेका प्रहरीका चेक पोष्ट पार गर्नुले घटनामा अन्य पक्षको पनि संलग्नता रहेको आशंका चुलिएको छ ।

गत सोमबार राति चैनपुरस्थित सशस्त्र प्रहरी बलको बा.१ झ १६६९ नम्बरको ट्रकमा राखेर धनकुटा हुँदै विराटनगरतर्फ करिब सात लाख मुल्य पर्ने एक सय क्वूबीक फीट बढी सखुवाका काठ तस्करी गरिएको थियो ।

अन्य जिल्लामा निकासी प्रतिबन्धित सखुवाको काठ भेटिएपछि सशस्त्र प्रहरी बल छिन्ताङ गुल्मको मुलघाटस्थित चेक पोष्टले नियन्त्रणमा लिएको थियो । संखुवासभादेखि कयौं स्थानमा सुरक्षा निकायको चेक पोष्ट पार गर्दै धनकुटासम्म पुग्दा तस्करीमा प्रयोग गरिएको सवारी साधन कसरी उम्कियो भन्ने रहस्य अझै खुल्न सकेको छैन ।

सखुवाको काठसहित आफ्नै बलको सवारी साधन सशस्त्र प्रहरी मुलघाटका इन्चार्ज इन्सपेक्टर दुर्गा भट्टले नियन्त्रणमा लिएका थिए । उनले नियन्त्रणमा लिएकोबारे सशस्त्रको पकलीस्थित बाहिनीलाई तत्काल जानकारी गराएपछि मध्य राति नै बाहिनीबाट डीएसपी डम्बर विष्टको नेतृत्वको टोली घटनास्थल पुगेको जनाइएको छ । विष्टको टोलीले बरामद गरिएका काठ मुलघाटमा छोडेर तस्करीमा प्रयोग गरिएको सवारी साधन लिएर सशस्त्रको बाहिनी गएको स्रोतले जनाएको छ ।
घटनामा संलग्न ‘मुख्य व्यक्ति’ भनिएका सशस्त्र चैनपुरका डिएसपी रामप्रसाद भण्डारीले आफूले खराब नियतले उक्त कार्य नगरेको दाबी गरे । ‘मैले गलत मनशायले यस्तो कार्य गरेको होइन,’ उनले भने, ‘आफ्नो डिपार्टको काम भनेर सामान्य ठान्दा यस्तो अवस्था भयो ।’ उनले चैनपुरको सिस्ने सामुदायिक वनले सशस्त्रको टहरा बनाउन ती काठ उपलब्ध गराएको बताए ।

सशस्त्रले प्रयोग गर्ने सवारी साधनमा राखेर फर्निचर बनाउन ती काठ विराटनगर पठाएको उनले स्वीकार गरे ।
घटनामा नेपाल प्रहरीको संलग्नता रहेकोबारे समेत आशंका उब्जिएको स्रोतको दाबी छ । यसैबीच जिल्ला प्रहरी कार्यालय धनकुटाका प्रमुख प्रहरी उपरिक्षक सुरेन्द्रबहादुर गुरुङले हिले प्रहरी चौकीमा दुई घन्टा तस्करीमा प्रयोग गरिएको सवारी साधन नियन्त्रणमा लिएर छोडेको बताए । उनले सशस्त्र चैनपुरका डिएसपी भण्डारीले भाइवरमा काठ ढुवानी गरिएकोबारे पत्र पठाइदिएपछि छोडेको दाबी गरे । तर प्रतिबन्धित काठ हचुवाको भरमा छोडिनुले घटना रहस्यमय बनाएको हो ।
उता घटनाबारे कुनै जानकारी प्राप्त नभएको जिल्ला वन अधिकृत कृष्णप्रसाद वस्तीले जानकारी दिए । कुनै पनि काठ तथा वन्य जन्तु वा वनस्पति नियन्त्रण तथा बरामद हुँदा वन कार्यालयलाई जानकारी दिनुपर्ने उनको तर्क छ । यस्तै सामुदायिक वन उपभोक्ता महासंघका धनकुटा अध्यक्ष राजेन्द्र खड्काले संखुवासभाबाट काठ अवैध रुपमा ल्याइएकोले बरामद गरिएको क्षेत्राधिकार भित्रको वन कार्यालय मार्फत छानबिन हुनुपर्ने बताए ।

छानबिन समिति गठन
सशस्त्र प्रहरी बल अरुण गुल्मको सवारी साधनमा अवैध रुपमा सखुवाको काठ तस्करी गरिएकोबारे सशस्त्र प्रहरी बल पकलीस्थित बाहिनीका एसपी गुणाकर खनालको संयोजकत्वमा तीन सदस्यीय छानबिन समिति गठन गरिएको छ ।
समितिले घटनाबारे गहिराईमा पुगेर अनुसन्धान गरिने बाहिनीका डिआइजी मन्दिप श्रेष्ठले दाबी गरे । ‘शुक्रबारसम्ममा घटनाबारे सत्यतथ्य सार्वजनिक गरिने छ,’ उनले भने, ‘जिम्मेवार व्यक्तिहरु छानबिन समितिमा रहेकोले क–कस्को संलग्नता रहेको हो, भन्नेबारे सबै कुरा बाहिर आउनेमा ढुक्क छु ।’

घटनाबारे सत्यता पत्ता लगाउन अरुण गुल्ममा पुगेको संयोजक खनालले बताए । छानबिन समितिको सदस्यमा डिएसपी गमबहादुर कुँवर र निरिक्षक भोला खत्री पनि गुल्म पुगेका छन् ।

प्रकाशित : जेष्ठ २४, २०७५ १०:४९
पूरा पढ्नुहोस्
प्रतिक्रिया
पठाउनुहोस्
ADVERTISEMENT
ADVERTISEMENT
ADVERTISEMENT
ADVERTISEMENT