मन्त्री पोखरेलले भेटे राष्ट्रकविलाई

पूर्ण निको भएर मात्र घर फर्किन सल्लाह
सुरेशराज न्यौपाने

नयाँदिल्ली — शिक्षा, विज्ञान तथा प्रविधिमन्त्री गिरिराजजमणि पोखरेलले नयाँदिल्लीको मेदान्त अस्पतालमा उपचारार्थ राष्ट्रकवि माधव घिमिरेको स्वास्थ्य स्थितिबारे जानकारी लिएका छन् ।

साउथ एसियन युनिभर्सिटीको तेस्रो दीक्षान्त समारोहका लागि बुधबार दिल्ली आएका मन्त्री पोखरेल राष्ट्रकवि घिमिरेलाई भेट्न बिहीबार दिउँसो अस्पताल पुगेका थिए । उनले उपचारमा संलग्न चिकित्सकसँग राष्ट्रकविको उपचार प्रक्रिया र स्वास्थ्यस्थितिबारे जानकारी लिएका थिए । भेटपछि कान्तिपुरसँग कुरा गर्दै उनले भने, ‘कविज्यूको स्वास्थ्य सुधार भएको छ, उहाँले दुईचार दिन मात्र यहाँ बस्छु भन्नुभएको छ ।’ तर, यसपटक पूर्ण निको भएर मात्र घर फर्किन आफूले सल्लाह दिएको मन्त्री पोखरेलले बताए ।

Yamaha


११ दिन मेदान्तमै उपचार गरेर काठमाडौं फर्किएका राष्ट्रकवि घिमिरे पुन: बिरामी परेपछि जेठ २१ मा नयाँदिल्ली ल्याइएको हो । सानो आन्द्राबाट रक्तस्राव नरोकिएपछि जेठ ९ मा उनलाई पहिलो पटक मेदान्तमा भर्ना गरिएको थियो । उपचारपछि काठमाडौं फिर्नासाथ निमोनियाँ र रक्तस्रावको समस्या दोहोरिएपछि उनलाई फेरि दिल्ली ल्याइएको हो ।

यसैबीच मन्त्री पोखरेलले मेदान्त अस्पतालका प्रबन्ध निर्देशक डा. नरेश त्रेहानसँग भेटेर अस्पतालमा नेपालीका लागि बेग्लै ‘नेपाल डेस्क’ खोल्न, उपचारका क्रममा आर्थिक संकट बेहोर्नुपर्ने अवस्थामा पुगेका नेपालीलाई विशेष छुट दिन र मेदान्त अस्पतालमा हुने उच्च प्रविधियुक्त उपचार प्रक्रियालाई भिडियो कन्फरेन्समार्फत् नेपालका मेडिकल कलेजसँग जोड्न आग्रह गरे । ‘डा. त्रेहानले प्रस्तावमा सहमति जनाउँदै चाँडो पहल गर्छु भन्नुभएको छ,’ पोखरेलले भने ।

‘गरिबी र पछौटेपन ठूलो शत्रु’
बिहीबारै साउथ एसियन युनिभर्सिटीको तेस्रो दीक्षान्त समारोहलाई विशेष अतिथिका रूपमा सम्बोधन गर्ने क्रममा मन्त्री पोखरेलले दक्षिण एसियाका लागि गरिबी र पछौटेपन सबैभन्दा ठूलो शत्रु भएको बताए । त्यसलाई परास्त गर्न दक्षिण एसियाली मुलुक र जनताबीचको साझेदारीबाट मात्र सम्भव हुने उनको भनाइ थियो ।

बुद्ध, नालन्दा तथा तक्षशिलाका कारण शिक्षा र ज्ञानको भूमिका रूपमा इतिहासमै दक्षिण एसियाको नाम रहेको र साउथ एसियन युनिभर्सिटीले त्यसलाई निरन्तरता दिएको उनले बताए । ‘भौतिक सुविधामुखी मात्र नभएर पूरै समाजलाई सही दिशामा डोर्‍याउन तपाईंहरूले हासिल गरेको शिक्षालाई सदुपयोग गर्नुस्’ दीक्षित विद्यार्थीलाई सम्बोधन गर्दै उनले भने । समारोहमा मन्त्री पोखरेलले विभिन्न संकायका गरी १७६ जना विद्यार्थीलाई दीक्षान्त प्रमाणपत्र हस्तान्तरण गरेका थिए ।

Esewa Pasal

प्रकाशित : जेष्ठ २४, २०७५ २०:२८
ADVERTISEMENT
ADVERTISEMENT
प्रतिक्रिया
पठाउनुहोस्

कक्षा ११ मा नयाँ पाठ्यक्रमले अन्योल

सुदीप कैनी

काठमाडौँ — सरकारले आउँदो साउन १५ बाट कक्षा ११ मा लागू गर्न लागेको पाठ्यक्रमबारे शिक्षक र शैक्षिक संस्थाहरूले अनभिज्ञता प्रकट गरेका छन् ।

पाठ्यक्रम विकास केन्द्रले राष्ट्रिय पाठ्यक्रम प्रारूपअनुरूप नयाँ पाठ्यक्रम लागू गरेपछि संकाय प्रणालीअन्तर्गत पढाइरहेका शैक्षिक संस्थामा अन्योल बढेको हो ।

उच्च शिक्षालय तथा माध्यमिक विद्यालय संघ (हिसान) का वरिष्ठ उपाध्यक्ष युवराज शर्माले सरकारले हतारमा पाठ्यक्रम परिवर्तन गरेको बताए । ‘यसै वर्षदेखि पाठ्यक्रम लागू गर्ने भनिएको छ,’ उनले भने, ‘पूर्वाधारै तयार नभई नयाँ पाठ्यक्रम लागू गर्दा पठनपाठन गराउन असहज हुन्छ ।’

केन्द्रले पूर्ण तयारीसहित नयाँ पाठ्यक्रम लागू गर्न लागिएको जनाएको छ । तर एक महिनाभित्र पाठ्यपुस्तक छापेर पढाउन असम्भव हुने हिसान उपाध्यक्ष शर्माको दाबी छ । ‘नयाँ पाठ्यक्रम बोझिलो र अव्यावहारिक छ,’ उनले भने, ‘कार्यान्वयन गर्ने भए पनि तयारी गर्ने पर्याप्त समय छैन ।’

उनले विद्यार्थी, शिक्षक, विद्यालय र अभिभावक मानसिक रूपमा तयार नभई परिवर्तित पाठ्यपुस्तकबाट पठनपाठन गराउँदा शैक्षिक उपलिब्ध नहुने जिकिर गरे । शिक्षामन्त्री, शिक्षासचिव र केन्द्रका कार्यकारी निर्देशकलाई भेटेर एक वर्षपछि कार्यान्वयन गर्न आग्रह गरेको उनले जानकारी दिए ।

कक्षा ११ को पढाइ सुरु गर्ने तयारीमा रहेका टोखास्थित अमर सेकेन्डरी स्कुलका प्रधानाध्यापक हरिदास श्रेष्ठले पनि पाठ्यक्रमबारे अनभिज्ञता जनाए । ‘नयाँ पाठ्यक्रम आएको सुनेका छौँ, सबै कुरा थाहा छैन,’ उनले भने । यसअघि कक्षा ११ र १२ मा विज्ञान, मानविकी, व्यवस्थापन र शिक्षा संकायमा पाँच सय पूर्णांकको पाँच विषय पढाइ हुन्थ्यो ।

नयाँ प्रारूपमा नेपाली, अंग्रेजी, सामाजिक अध्ययन र जीवन उपयोगी शिक्षा विषय अनिवार्य र तीनवटा विषय ऐच्छिक रहने व्यवस्था छ । नयाँ पाठ्यक्रमअनुसार शिक्षण संस्थामा पर्याप्त शिक्षक र पूर्वाधार पनि छैन ।

कक्षा ११ बाट गणित विषय हटाइएकामा गणित समाजका केन्द्रीय सदस्य जीवन काफ्लेले असन्तुष्टि जनाए । ‘विद्यार्थी पनि कुरा नबुझेर हामीसँग सोधीखोजी गरिरहेका छन्,’ उनले भने, ‘गणित विषय हटाउँदा विज्ञान प्रविधिमैत्री पढाइ हुन सक्दैन ।’

केन्द्रका कार्यकारी निर्देशक कृष्णप्रसाद काप्रीले भने समयमै पाठ्यपुस्तक छपाएर कार्ययोजनासहित पाठ्यक्रम कार्यान्वयनमा ल्याउन लागिएको बताए । ‘नयाँ पाठ्यक्रम कार्यान्वयन हुन नदिन अनेक समूहको स्वार्थ छ,’ उनले भने, ‘पठनपाठनमा बाधा नपुग्ने गरी विज्ञहरूसँग रायसुझाव लिएर अघि बढेका छौं ।’

निजी पुस्तक प्रकाशन र केही विद्यालय सञ्चालकले स्वार्थवश पाठ्यक्रम कार्यान्वयनमा ढिलाइ गर्न खोजेको उनको दाबी छ । विषय थपिए पनि खासै परिवर्तन नहुने भएकाले विद्यार्थी, शिक्षक र अभिभावकलाई ढुक्क हुन उनले आग्रह गरे । ‘केही नयाँ विषय थप भए पनि पुरानो कोर्सअनुसार धेरै फेरबदल हुँदैन,’ उनले भने, ‘आन्तरिक तयारी गरिरहेका छौं ।’

कक्षा १२ पछि विद्यार्थीले विश्वविद्यालयमा जुन क्षेत्रको अध्ययन गर्ने हो, त्यहीअनुसार ऐच्छिक विषय छान्ने व्यवस्था मिलाइएको केन्द्रले जनाएको छ । सरकारले राष्ट्रिय अभियान चलाएर पाठ्यक्रमबारे जानकारी दिने उनले बताए ।

प्रकाशित : जेष्ठ २४, २०७५ २०:२६
पूरा पढ्नुहोस्
प्रतिक्रिया
पठाउनुहोस्
ADVERTISEMENT
ADVERTISEMENT