२९.१२°C काठमाडौं
सुनसरी — कोशीमा पानीको बहाव बढेसँगै जेटबोट सञ्चालनमा चुनौती थपिएको छ । नदीमा पानीको बहाव बढेपनि जलयात्रा सेवा पूर्णरुपमा बन्द भने गरिएको छैन ।
नदीमा पानीको सतह घटेको र केही सङ्लिएको संकेत पाउने बित्तिकै जेटबोट सञ्चालन गर्ने गरिएको छ ।
अनियमित रुपमा जेटबोट चल्ने गरेकाले यात्रुहरु मारमा परेका छन् । २५ देखि ३५ जना यात्रु बोकेर शनिबारको दिन आठ ‘ट्रिप’ र अन्य दिन पाँच ‘ट्रिप’ लगाउदै आएको जेटबोट नदीले बगाउने रुखका कारण मंगलबार बिहान एक ट्रिपमात्र यात्रु ओसार्न पाएको थियो ।
गत चैत १९ गतेदेखि कोशी नदिमा व्यवसायिक रुपमा बराहक्षेत्र जल यातायात तथा पर्यटन सेवा प्रालिले जेटबोट सञ्चालन गरेको हो । बर्षायाम सुरु भएयता कोशीले ठूला ठूला रुखै बगाएर ल्याउन थालेकाले यात्रुको सुरक्षाका कारण जेटबोट सञ्चालन गर्न चुनौती थपिएको हो ।
व्यवसायिक रूपमा जेटबोट सञ्चालन हुन थालेपछि दुधकोशीतर्फ भोजपुरको हतुवागडी, चुहार, आमचोकसम्म र अरुण नदीतर्फ धनकुटाको सहिदभूमि गाउँपालिकाको सिम्लेसम्म जेटबोट सञ्चालन हुँदै आएको छ ।
जेटबोट सञ्चालनले भोजपुर–खोटाङका दक्षिणी भेगका स्थानीयलाई छोटो दूरीमै सुनसरीको बराहक्षेत्रसँग जोडेको छ । कोशी किनारको अक्करे भीरसँगै उकालो ओरालो गोरेटोमा घण्टौँ पैदल हिड्नु पर्ने दुरीलाई जेटबोटको जलयात्राले २० देखि ३० मिनेटमा पुर्याउने गरेको अवस्था छ ।
बराहक्षेत्र जल यातायात तथा पर्यटन सेवा प्रालिका सदस्य अमित भगतले धेरै वर्षा भएमा तीन महिनाका लागि जेटबोट सञ्चालन स्थगित गर्ने बताए । असोजदेखि थप अर्को जेटबोट पनि सञ्चालन गर्ने तयारी भइरहेको भगतले बताए ।
प्रकाशित : जेष्ठ २९, २०७५ १५:०६
