वडाध्यक्षसहित ११ पक्राउ

वडाध्यक्ष रामाज्ञा राय यादवसहित ११ जनालाई पक्राउ गरी अनुसन्धान थालिएको जिल्ला प्रहरीप्रमुख एसपी रवीन्द्र केसीले बताए । ‘हामीले ११ जनालाई पक्राउ गरी अनुसन्धान थालेका छौं,’ उनले भने, ‘घटनामा संलग्न सबै पक्राउ पर्छन् ।’

हत्यामा प्रयोग गरिएको एक थान नलकटुवा पेस्तोल बरामद भएको केसीले जानकारी दिए । गत शनिबार राति वडाध्यक्ष यादवका छोरा शक्तिसहितले बालकलाई अपहरण गरी आइतबार गोली हानी हत्या गरेका थिए ।

घटनाको भोलिपल्ट प्रहरीले ६ जनालाई पक्राउ गरेको थियो । पीडित पक्षले १६ जनाविरुद्ध किटानी जाहेरी दिएको इलाका प्रहरी गरुडाले जनायो ।

अपहरणकारीले अपहरणको १२ घण्टापछि बालकका काकाका छोरा निरञ्जन जयसवालको मोबाइलमार्फत बुवा दिलीप साहलाई फोन गरी १ करोड रुपैयाँ फिरौती मागेका थिए । साहले त्यति धेरै रकम तिर्न नसक्ने बताएपछि अपहरणकारीले ५ लाख रुपैयाँमा सहमति जनाएका थिए । तर, उनीहरू २ घण्टापछि स्थान तोक्ने बताएर सम्पर्कविहीन भए ।

आइतबार राति करिब साढे ११ बजे वडाध्यक्षका भाई रामबालकले अपहृत बालकका काका ओमप्रकाश जयसवाललाई फोन गरी आफ्ना भतिजाहरूले अपहरण गरेको र मुक्त गराउन सघाउने बताएका थिए । जयसवालले लगत्तै इलाका प्रहरी गरुडालाई खबर गरे ।

प्रहरी निरीक्षक चतुर्भुज ओझाको टोलीले तत्काल गरुडा नगरपालिकाको ४ नम्बर वडा कार्यालयनजिकैको घरबाट शक्तिलगायतलाई नियन्त्रणमा लिएको थियो । उनीहरूले बालकको गोली हानी हत्या गरेको स्विकारिसकेका छन् ।