गंगामायाको जीवन रक्षा गर : आयोग

गंगामायाको स्वास्थ्य स्थिति खस्किँदै गएपछि तत्काल केही नगरे अनर्थ हुने भन्दै केही दिनअघि पत्र पठाएका शर्मालाई ओलीले बालुवाटार बोलाएका थिए ।

‘प्रधानमन्त्री यस मामिलामा निकै गम्भीर देखिनुभएको छ र तत्काल केही गर्ने वचन पनि दिनुभएको छ,’ शर्माले भने, ‘मैले उहाँलाई कम्तीमा अदालतको आदेश पालना गरिदिन आग्रह गरेको छु । उहाँले पूर्ण रूपमा पालना गर्ने प्रतिबद्धता जनाउनुभएको छ ।’

सर्वाेच्च अदालतले २०७२ पुस ६ गते गंगामायाका छोरा कृष्णका हत्या आरोपीमध्ये गोरखा फुजेलका छविलाल पौडेललाई थुनामै राखेर मुद्दा अघि बढाउन आदेश गरेको थियो ।

दुई वर्षभन्दा बढी पर्खिंदा पनि आदेश कार्यान्वयन नभएपछि जेठ १५ गतेदेखि गंगामायाले आमरण अनशन सुरु गरेकी थिइन् । त्यसको एक साता नबित्दै उनी बिरामी पर्न थालेपछि आयोगको टोलीले अस्पतालमै गएर उनको स्वास्थ्य स्थिति बुझेको थियो ।

जुनसुकै बेला जे पनि हुन सक्ने अवस्थामा पुगिसकेकी गंगामायाको जीवन बचाउन नसके मुलुकलाई ठूलो अवगाल आउने भन्दै शर्माले प्रधानमन्त्रीलाई घटनाको गाम्भीर्य बोध गर्न आग्रह गरेका थिए ।

‘अदालतले पक्रनु भनिसकेपछि त्यसको कार्यान्वयन सरकारले तुरुन्त गर्न सक्नुपर्थ्यो,’ शर्माले भनेका थिए, ‘यसले एकातिर दण्डहीनता बढाएको छ, अर्कातिर पीडितलाई निराश पारेको छ ।’ जवाफमा ओलीले अदालतको फैसला पालनामा अन्यथा नहुने बताएका थिए ।

छोरा कृष्णको २०६१ जेठ २४ गते हत्या भएको थियो । त्यतिबेलैदेखि छोराका हत्यारालाई कारबाही गर्नुपर्ने माग गर्दै गंगामाया र उनका पति नन्दप्रसाद अधिकारीले विभिन्न निकायमा उजुरी र हारगुहार गर्दै आएका थिए ।

तर उल्टै घरजग्गा कब्जा भएपछि र डेराबाट समेत खेदिएपछि उनीहरूले सडकमै आमरण अनशन थालेका थिए । अनशन बसेको ३ सय ३४ दिनमा २०७० असोज ६ गते नन्दप्रसादको वीर अस्पतालमै मृत्यु भएको थियो । त्यसपछि एक्लै सत्याग्रह गर्दै आएकी गंगामायाले न्याय नपाएसम्म त्यसलाई जारी राख्ने उद्घोष बताएकी छन् ।

‘म बरु मर्न तयार छु तर अब अनशन तोड्न तयार छैन,’ गणतन्त्र दिवसका दिन सत्याग्रह सुरु गर्नुअघि सञ्चारकर्मीसँग उनले भनेकी थिइन्, ‘कम्तीमा अदालतको आदेश पालना नभएसम्म म पछि हटदिनँ ।’