पहिरोले सिद्धार्थ राजमार्ग अवरुद्ध

प्रतिक्षा काफ्ले

स्याङ्जा — अविरल वर्षासँगै खसेको पहिरोले बुधबार साँझदेखि सुनौली-पोखरा जोड्ने सिद्धार्थ राजमार्ग अवरुद्ध भएको छ ।

पुतलीबजार नगरपालिका-३ स्थित मजुवामा अपराह्न चार बजे गएको पहिरोका कारण राजमार्ग बन्द भएपछि सवारी साधन रोकिएका छन् । बेलुकी लामो दूरीका सवारी चल्ने गर्छ । पैदलयात्रु समेत अलपत्र परेका छन् । नगरपालिकाले सडक विस्तार गर्ने क्रममा खनिएको ढिस्को खस्दा राजमार्ग रोकिएको जिल्ला प्रहरीले जनाएको छ ।

प्रहरी, सेनासहित पहिरो हटाउन डोजर प्रयोग गरिएको छ । झन्डै सय मिटर फराकिलो पहिरो हटाउन अझै चार/पाँच घण्टा लाग्ने जिल्ला प्रहरी प्रवत्ता डीएसपी प्रकाश विष्टले जानकारी दिए । रातो र चिप्लो माटोका कारण पैदल यात्रुलाई हिँड्न जोखिम भएको प्रहरीले बताएको छ ।

सडकमा पहिरो खसेपछि बुटवल हुँदै पोखरा आएका र स्याङ्जाबाट पोखरा, काठमाडौं र पूर्व-पश्चिम हिँडेका सवारी साधन बाटोमै रोकिएका छन् ।

प्रकाशित : जेष्ठ ३०, २०७५ २०:३६
प्रतिक्रिया
पठाउनुहोस्

नेपाल–भारत सैन्य अभ्यास

कान्तिपुर संवाददाता

काठमाडौँ — भारतको पिथौरागढमा दुई सातादेखि सञ्चालित प्रतिविद्रोह तथा प्रतिआतंकवाद र विपद् व्यवस्थापनसम्बन्धी नेपाली सेना र भारतीय सेनाबीचको संयुक्त ‘अभ्यास सूर्यकिरण–१३’ सकिएको छ ।

भारतको मिजरममा २०६७ सालबाट सुरु संयुक्त अभ्यासको सिलसिला अहिले एक/एक वर्षको अन्तरालमा नेपाल र भारतमा पालैपालो गरिँदै आएको छ ।

नेपाली सेनाका तर्फबाट ‘गोरख बक्स गण’का प्रमुख सेनानी तिलकबहादुर थापा क्षत्रीको कमान्डमा महिलासहित ३ सय जना र ‘१३ जम्मुकस्मिर राइफल्स’ का महासेनानी निपुन कृष्णनको कमान्डमा ३ सय सैनिक अभ्यासमा सहभागी थिए ।

यस्ता अभ्यासबाट दुई देशका सेनाको पेसागत ज्ञान अभिवृद्वि हुने विश्वास नेपाली सेनाको छ ।

प्रधानमन्त्रीलाई द्रुतमार्गको ब्रिफिङ
यसैबीच, तीन मन्त्रीसहित प्रधानमन्त्री केपी ओलीले तराई–मधेस जोड्ने द्रुतमार्ग निमार्णबारे सेनासँग जानकारी लिएका छन् ।

उनले अहिलेसम्म भएका कामबारे जानकारी लिँदा उपप्रधान तथा रक्षामन्त्री ईश्वर पोखरेल, भौतिक पुनर्निर्माण तथा यातायात मन्त्री रघुवीर महासेठ, अर्थमन्त्री युवराज खतिवडा र योजना आयोगका उपाध्याक्ष पुष्पराज कँडेललगायत सचिव र अधिकारीहरूको उपस्थिति थियो ।

ब्रिफिङपछि प्रधानमन्त्री ओलीले उक्त राष्ट्रिय गौरवको परियोजना समयमा सम्पन्न गर्न कुनै कसुर नराख्न निर्देशन दिएका थिए ।

प्रकाशित : जेष्ठ ३०, २०७५ २०:२९
पूरा पढ्नुहोस्
प्रतिक्रिया
पठाउनुहोस्