नुवाकोट–काठमाडौं जोड्ने तीन सडक अवरुद्ध

सोमबार दिउँसो साढे ११ बजे पासाङ ल्हामु मार्गको कककी गाँउपालिका–४ मा पहिरो खसेर सडक अवरुद्ध भएको छ । काठमाडौदेखि त्रिशूली आउने र त्रिशूलीबाट काठमाडौं जाने सवारीसाधन पहिरोका कारण रोकिएका छन् । पहिरो पन्छाएर अवरुद्ध सडक खुलाउने प्रयास भैरहेको ककनी प्रहरी चौकीले जनाएको छ ।

सडक पन्छाएर पहिरो खुलाउन सडक डिभिजन कार्यालय र निर्माणमा खटिएका ठेकेदारले बेवास्ता गरेका छन् । त्यसैगरी छहरे–टोखा सडक खण्डको गुर्जेभन्ज्याङ र जगतमा वर्षाले सडक हिलाम्य भएको छ । हिलो सडकमा सवारीसाधन चिप्लिएर आवतजावनत गर्न कठिनाई भएको छ । उक्त सडक खण्डमा पनि ठेकेदारले निर्धारित समयमा काम नगर्दा सडक अलपत्र भई सवारी आवतजावत गर्न कठिनाई भएको हो ।

छहरे–टोखा, छहरे–बराफेदी र त्रिशूली–बालाजु सडकका कर्मचारी र ठेकेदार काठमाडौ सम्पर्क कार्यालयमा बस्ने र पटकपटक सडक बनाउन अनुरोध गर्दा समेत बेवास्ता गरेको सडक स्थानीयले बताए ।

त्यसैगरी पिपलटारदेखि गल्छीसम्मको सडक बिभिन्न ठाँउमा वर्षाका कारण अवरोध भएको छ । अवरोध खुलाएर यातायात सुचारु गर्ने काम भइरहेको जिल्ला प्रहरी प्रमुख एसपी वसन्तबहादुर कुँवरले जानकारी दिए ।