बबईमा जलस्तर घट्दै
बर्दिया — आइतबार देखिको अविरल वर्षा कम हुँदै गएपछि मंगलबार बबई नदीमा जलस्तर घट्दै गएको छ । चेपाङ्गस्थित जलमापन केन्द्रमा बिहान बबईको जलस्तर ३ दशमलव ५ मिटर रहेको विपद् व्यवस्थापन समितिले जनाएको छ ।
सोमबार चेपाङ्गमा जलस्तर ५ दशमलव ८ रेकर्ड गरिएको थियो । बाढीको खतरा ६ दशमल १ रहेकोले बबई तटीय क्षेत्रका बासिन्दालाई उच्च सर्तकतामा रहन स्थानीय प्रशासनले निर्देशन दिएको थियो । सल्यान, दाङ्ग हुँदै बग्ने नदीमा पहाडी भेगमा बढी वर्षा हुनासाथ बाढी आउने गर्छ । हुलाकी सडक अन्तर्गत बन्द भएका सडक सुचारु भएका छन् । कर्णालीमा जलस्तर बढ्दै गएको छ ।
यसैबीच बबई, भादा र ओराही नदी व्यवस्थापन आयोजनाबाट निर्माणाधीन तटबन्ध र बॉधले तटीय क्षेत्रमा बाढीको जोखिम केही कम हुने विश्वास स्थानीयको छ । गुलरिया नगरपालिकास्थित निर्माणाधीन तटबन्ध भने पूरा नभएकोले जोखिम कम भएको भन्न नसकिने आयोजना प्रमुख नारायण सुवेदीले बताए ।
प्रकाशित : असार १९, २०७५ ०८:४७