मुस्ताङ टिपर दुर्घटना : मृतकका परिवारलाई जनही ५० हजार

कान्तिपुर संवाददाता

काठमाडौँ — गण्डकी प्रदेश सरकारले मुस्ताङमा भएको टिपर दुर्घटनामा मृत्यु भएका र घाइतेका परिवारलाई आर्थिक सहयोग गर्ने निर्णय गरेको छ । प्रदेश मन्त्रिपरिषद्को बुधबारको बैठकले मृतकका परिवारलाई जनही ५० हजार र घाइतेलाई जनही २५ हजार दिने निर्णय गरेको हो ।

गत शुक्रबार सडक निर्माणमा खटिएका मजदुर बोकेको टिपर मुस्ताङको लो घ्याकर दामोदरकुण्ड गाउँपालिकाको स्याङ्बोचेमा दुर्घटना हुँदा २० जनाको मृत्यु भएको थियो भने १२ घाइते भएका थिए । घाइतेको पोखराकै मनिपाल अस्पतालमा उपचार भइरहेको छ ।

Yamaha

सरकारका प्रवक्ता भौतिक पूर्वाधार विकासमन्त्री रामशरण बस्नेतका अनुसार मन्त्रिपरिषद् बैठकले उद्योग, पर्यटन, वन तथा वातावरण मन्त्रालयले बनाएको ढुंगा, गिट्टी, बालुवा उत्खनन, बिक्री, वितरण तथा क्रसर उद्योगका सम्बन्धमा बनाएको कार्यविधि पारित गरेको छ । हाल सञ्चालित क्रसर उद्योग र उत्खनन गर्ने काम मापदण्डविपरीत भएको भन्दै तीन महिनाभित्र व्यवस्थापन गर्न सूचना प्रकाशन गर्ने निर्णय पनि बैठकले गरेको छ ।
यस्तै क्रिकेट खेलाडी करण केसीलाई एक लाख रुपैयाँ दिने निर्णय पनि भएको छ । यस्तै आन्तरिक मामिला तथा कानुन मन्त्रालयलाई प्रदेशका कानुन संशोधन गर्ने विधेयकको मस्यौदालाई सैद्धान्तिक स्वीकृति दिएको छ । प्रादेशिक नीति तथा योजना आयोगको उपाध्यक्ष ३५ वर्ष पूरा भई ५५ वर्ष ननाघेको हुनुपर्ने भनिएकामा त्यसलाई संशोधन गरी ३५ देखि ६५ वर्ष बनाइएको मुख्यमन्त्री तथा मन्त्रिपरिषद् कार्यालयका सचिव लालमणि ओझाले बताए ।

प्रकाशित : असार २७, २०७५ १९:१४
ADVERTISEMENT
ADVERTISEMENT
प्रतिक्रिया
पठाउनुहोस्
ADVERTISEMENT
ADVERTISEMENT

त्रिवि सभा साउनमा

कान्तिपुर संवाददाता

काठमाडौँ — त्रिभुवन विश्वविद्यालय (त्रिवि) को स्थगित सभा साउन पहिलो साता हुने भएको छ । यसबारे विश्वविद्यालयका कुलपति तथा प्रधानमन्त्री केपी ओलीलाई लिखित जानकारी दिइएको उपकुलपति तीर्थराज खनियाँले जनाएका छन् ।

गत वैशाख २३ गतेलाई तय गरिएको सभा प्रधानमन्त्री र शिक्षामन्त्रीको अनुपस्थितिका कारण स्थगित भएको थियो । ‘त्रिविको स्थापना दिवसको सन्दर्भसमेत जोडेर कार्यतालिका बनाएका छौँ,’ उपकुलपति खनियाँले भने, ‘साउन ५ गते झण्डोत्तोलनसहित सिनेट बैठक बस्छ ।’ बैठकमा त्रिविको आंगिक क्याम्पसका जग्गादातालाई सम्मान गरिने जनाइएको छ ।

तिनमा पर्साको ठाकुरराम क्याम्पस, जनकपुरको रामसागर रामस्वरूप क्याम्पस, सिरहाको सूर्यनारायण सत्यनारायण मरवैता क्याम्पस, राजविराजको महेन्द्रविन्देश्वरी क्याम्पस र झापाको मेची बहुमुखी क्याम्पसका जग्गादाता छन् ।

त्यसैगरी बैठकले २०७४ सालको विद्यार्थीको ‘ग्रेस लिस्ट’ पास गर्नेछ । परीक्षा नियन्त्रक पुष्पराज जोशीका अनुसार दीक्षान्तयोग्य ७५ हजार विद्यार्थीको ‘ग्रेस लिस्ट’ छ ।

बैठकमा आगामी आर्थिक वर्षको बजेट पनि अनुमोदन हुनेछ । त्रिभुवन विश्वविद्यालयको इतिहास पुस्तकसमेत विमोचन हुने जनाइएको छ ।

प्रकाशित : असार २७, २०७५ १९:००
पूरा पढ्नुहोस्
ADVERTISEMENT
प्रतिक्रिया
पठाउनुहोस्
ADVERTISEMENT
ADVERTISEMENT
ADVERTISEMENT