कांग्रेसका जनसम्पर्क समिति दुई गुटमा

विधानविपरीत गठित युरोप समन्वय समिति विघटन गर्न माग
कान्तिपुर संवाददाता

काठमाडौँ — कांग्रेसको संस्थापनइतर पक्षले विधानविपरीत गठित ‘नेपाली जनसम्पर्क समन्वय समिति युरोप’ खारेज गर्न माग गरिरहेका बेला त्यसै विषयलाई लिएर युरोपस्थित विभिन्न देशका जनसम्पर्क समिति विभाजित बनेका छन् ।

कांग्रेस सभापति शेरबहादुर देउवाले आफ्नै निवास बूढानीलकण्ठमा केही दिनअघि बोलाएको बैठकमा वरिष्ठ नेता रामचन्द्र पौडेल र पूर्वमहामन्त्री कृष्णप्रसाद सिटौला पक्षले विधानविपरीत गठित उक्त समन्वय समिति विघटन गर्न माग राखेका थिए । विघटन गर्ने/नगर्ने विवादकै बीच पार्टीका मुख्यसचिव कृष्ण पौडेलले समन्वय समितिको २१ जुलाईमा हुने भेलामा सहभागी हुन युरोपका जनसम्पर्क समितिहरूलाई पत्र पठाएपछि विवाद चुलिएको हो । युरोपका नौवटा जनसम्पर्क समितिका वर्तमान, पूर्व तथा संस्थापक अध्यक्षले बिहीबार संयुक्त वक्तव्य निकाल्दै भेलामा सहभागी नहुन नेता–कार्यकर्तालाई आह्वान गरेका छन् ।

‘असार १३ को चलानी नम्बर ६३३ बाट नेपाली जनसम्पर्क समन्वय समिति युरोपको नाममा अवैधानिक तवरबाट मुख्य सचिवद्वारा लेखिएको पत्र बदर गर्न पार्टी सभापति र महामन्त्रीलाई हार्दिक अनुरोध गर्दछौं,’ संयुक्त वक्तव्यमा उनीहरूले भनेका छन् । उनीहरूले निर्वाचित र पार्टीले मान्यता दिएका जनसम्पर्क समितिसँग सम्पर्क र परामर्श नगरीकनै विधानविपरीत गठन भएको युरोप समन्वय समितिको भेलामा उपसभापति विमलेन्द्र निधि सहभागी हुन लागेको प्रति दु:ख प्रकट गरेका छन् ।

अवैधानिक संस्थाले बोलाएको भेलामा आफूहरू नजाने भन्दै उनीहरूले उपसभापति निधिलाई विवादमा नपर्नसमेत आग्रह गरेका छन् । संयुक्त वक्तव्य निकाल्ने जनसम्पर्क समितिका अध्यक्षमा सीता सापकोटा बेल्जियम, शिखर खडका जर्मनी, शुक्रराज न्यौपाने आयरल्यान्ड, इन्द्र शर्मा स्पेन, बालकृष्ण सापकोटा लक्जम्बर्ग, एलेनी सुवेदी पोल्यान्ड, श्याम सापकोटा स्विट्जरल्यान्ड, सीता अर्याल साइप्रस र राजन शर्मा चापागाईं इटलीलगायत छन् ।

सन् २००७ सालमा युरोप आएका केही अग्रज राजनीतिज्ञले युरोपमा जनसम्पर्क समिति गठन गर्ने र तिनलाई सक्रिय बनाउने उद्देश्यले समन्वयकारी भूमिकाका लागि दिल गुरुङको अध्यक्षतामा समिति गठन गरेका थिए । पार्टी विधानले जनसम्पर्क समितिलाई विधानअनुरूप समेटेर केन्द्रीय महाधिवेशनमा भाग लिने व्यवस्थासमेत गराइसकेको छ । तर, समन्वय समितिबारे विधानमा कुनै उल्लेख छैन ।

प्रकाशित : असार २८, २०७५ २०:१७
प्रतिक्रिया
पठाउनुहोस्

अनशनको ‘डेड लक’ अन्त्य गर्न आग्रह

कान्तिपुर संवाददाता

काठमाडौँ — नेपाल चिकित्सक संघका प्रतिनिधिले नेकपा अध्यक्ष पुष्पकमल दाहाललगायत विभिन्न पार्टीका शीर्ष नेतासँग भेटेर डा. गोविन्द केसीको आमरण अनशनमा देखिएको ‘डेड लक’ अन्त्य गर्न आग्रह गरेका छन् ।

‘हामीले दाहाललाई हाल देखिएको डेड लकको स्थिति अन्त्य गर्न आग्रह गरेका छौं,’ चिकित्सक संघका महासचिव डा. लोचन कार्कीले भने ।

उनका अनुसार दाहालले चिकित्सक संघको टोलीकै अगाडि शिक्षामन्त्री गिरिराजमणि पोखरेललाई फोन गरेर चाँडै निकास निकाल्न आग्रह गरेका थिए । ‘प्रधानमन्त्रीसँग पनि कुरा गरेर निकास निकाल्ने प्रतिबद्घता उहाँले जनाउनुभएको छ,’ डा. कार्कीले भने ।

संघको टोलीले कांग्रेस सभापति शेरबहादुर देउवा र नेता प्रकाशमान सिंहसँग पनि डा. केसीको आन्दोलन र मागबारे छलफल गरेको थियो । ‘देउवाले आज (बिहीबार) विधेयक आउने कुरा छ तर हामीले डा. केसीसँग सल्लाह नगरी दर्ता नगर्न सभामुखलाई भनेका छौं भन्नुभयो,’ कार्कीले भने ।

उनका अनुसार कांग्रेस शीर्ष नेताहरूले वर्तमान घटनाक्रमप्रति संवेदनशील रहेको जनाउँदै निकासका लागि पहल गर्ने बताएका छन् । विवेकशील साझा पार्टीका संयोजक उज्ज्वल थापा तथा रवीन्द्र मिश्रले पनि चिकित्सक टोलीसँग डा. केसीका माग पूरा गराउन सक्रिय रूपमा लागिरहेको बताएका थिए ।

प्रकाशित : असार २८, २०७५ २०:०३
पूरा पढ्नुहोस्
प्रतिक्रिया
पठाउनुहोस्