डा. केसीको घाँटीमा संक्रमण

कान्तिपुर संवाददाता

जुम्ला — १६ दिनदेखि अनशनरत डा. गोविन्द केसीको शनिबार रातिदेखि रक्तचाप, मुटुको गति र श्वासप्रश्वासमा उतारचढाव आएको छ । उनको घाँटीमा समेत संक्रमण बढ्दै गएको छ । संक्रमण बढ्दै जाँदा समेत उनले औषधि लिन मानेका छैनन् । उनको नसा सुन्निएको उपचारमा संलग्न चिकित्सकले जनाएका छन् ।

डा. केसीको बिग्रँदो स्वास्थ्य अवस्थालाई मध्यनजर गर्दै अनशनस्थलमा इमर्जेन्सी म्यानेजमेन्टका लागि चाहिने सम्पूर्ण उपकरण र औषधि तयारी अवस्थामा राखिएको अस्पतालका मेडिकल डाइरेक्टर डा. पुजन रोकायाले बताए ।

‘शनिबारदेखि मुटुको गतिमा असामान्य परिवर्तन देखिएका कारण उपचारमा संलग्न चिकित्सकको सल्लाहअनुसार भेन्टिलेटर र डिफिब्रिलेटर अनशन स्थलमा राखेका छौं,’ उनले भने, ‘इमर्जेन्सी अवस्थामा चाहिने सबै किसिमका औषधि सिरिन्जमा लोड गरी तयारी अवस्थामा राखिएको छ तर डा. केसीले अडान नछाडेकाले समस्या भएको छ ।’

डा. केसीको घाँटी दुख्ने, खसखसाउने, खोकी लाग्ने र आवाजमा सामान्य परिवर्तन पनि भएको छ । आफू अनशनमा रहेका कारण कुनै पनि एन्टिबायोटिक्स प्रयोग नगर्ने अडान उनले लिएका छन् । उनले शनिबारदेखि कुनै पनि स्वास्थ्य जाँच गर्न मानेका छैनन् ।

प्रकाशित : असार ३२, २०७५ ०७:०७
प्रतिक्रिया
पठाउनुहोस्

फ्रान्सलाई विश्वकप उपाधि

राजु घिसिङ

मस्को — स्टार खेलाडीले भरिएको फ्रान्सले सुस्त सुरुआत गरेर पनि विश्वकप फुटबलको उपाधि जितेको छ । फ्रान्सले आइतबार लुजनिकी रंगशालामा भएको फाइनलमा क्रोएसियामाथि ४–२ को जित रच्दै दोस्रोपल्ट विश्वकप जितेको हो ।

यो विश्वकपमा सनसनीपूर्ण प्रदर्शन गरेका १९ वर्षीय फरवार्ड केलियन एमबाप्पे, एन्टोइन ग्रिजमन र पाउल पोग्बाको गोलसँगै फ्रान्स फेरि विश्वविजेता भएको हो । यसअघि उसले सन् १९९८ मा घरेलु भूमिमा भएको फाइनलमा ब्राजिललाई ३–० ले हराएर पहिलोपल्ट विश्वकप जितेको थियो । फान्सलाई २००६ को फाइनलमा भने इटालीले पेनाल्टी सुटआउटमा स्तब्ध पारेको थियो ।

डिडियर डेसच्याम्प २० वर्षअघि फ्रान्स च्याम्पियन हुँदा कप्तान थिए । अहिले उनी प्रशिक्षकका रूपमा च्याम्पियन भए । यसरी खेलाडी र प्रशिक्षकमा विश्वकप जित्ने उनी तेस्रो व्यक्ति हुन् । फरवार्ड ओलिभियर जिरुड सातौं खेलमा पनि गोलको खाता खोल्न असफल भए तर एमबाप्पे, ग्रिजमन र पोग्बाले क्रोएसियाली डिफेन्सलाई ध्वस्त पारिदिए । मिडफिल्डमा फेरि लुका मोड्रिच चम्किए तर उनी एक्लैले क्रोएसियालाई विश्वकप जित्ने नवौं टिम बनाउन सकेनन् ।

दुई दशकयताका दुईपल्ट विश्वकप जित्ने फ्रान्स पहिलो टिम हो । दोस्रोपल्ट च्याम्पियन भएपछि उसले उरुग्वे (१९३० र १९५०) र अर्जेन्टिना (१९७८ र १९८६) को उपलब्धि पनि बराबरी गर्‍यो । यसभन्दा बढी इटाली र जर्मनीले ४–४ तथा ब्राजिलले पाँचपल्ट विश्वकप जितेका छन् । क्रोएसिया भने फाइनल पुगेर पनि उपाधि नजित्ने पाँचौं टिम बन्यो । उसको हारसँगै सन् १९५८ यता हरेक २० वर्षमा नयाँ च्याम्पियन निस्कने क्रम पनि तोडियो ।

फ्रान्सले यो विश्वकपको पहिलो खेलमा अस्ट्रेलियालाई २–१ ले पराजित गर्न भिडियो असिसेन्ट रेफ्री (भार) को सहयोग लिनुपरेको थियो । र, समूहको अन्तिम खेलमा डेनमार्कविरुद्ध पनि निरश फुटबल खेलेको थियो । तर, नकआउट प्रवेशसँगै उसले लय समात्यो । अन्तिम १६ मा लियोनल मेसीको अर्जेन्टिनाविरुद्ध ४–३ को जितमा दुई गोल गर्दै एमबाप्पेले नयाँ सुपरस्टारका रूपमा उदाएको संकेत दिए । त्यसपछि फ्रान्सले क्वाटरफाइनलमा अर्को दक्षिण अमेरिकी टिम उरुग्वेलाई हराएको थियो । उसले सेमिफाइनलमा स्टार खेलाडीको वर्चस्व रहेको बेल्जियमलाई पराजित गर्न पनि धेरै मिहिनेत गर्नुपरेको थिएन ।

कुल ४० करोड अमेरिकी डलर पुस्कारको विश्वकपमा फ्रान्सले तीन करोड ८० लाख हात पार्‍यो । उपविजेता क्रोएसियाको भागमा २ करोड ८० लाख डलर रह्यो । ३० टिम सहभागी एक महिने प्रतियोगितामा इंग्ल्यान्डलाई हराएर तेस्रो भएको बेल्जियमले २ करोड ४० लाख डलर पायो ।

प्रकाशित : असार ३१, २०७५ २२:५७
पूरा पढ्नुहोस्
प्रतिक्रिया
पठाउनुहोस्