आजको संसद बैठकमा ‘चिकित्सा शिक्षा विधेयक २०७५’ पेश गर्ने सरकारको तयारी

कान्तिपुर संवाददाता

काठमाडौँ — संघीय संसदको सोमबार १ बजे बस्ने बैठकमा सरकारको तर्फबाट शिक्षा, विज्ञान तथा प्रविधि मन्त्री गिरिराजमणी पाखरेलले ‘चिकित्सा शिक्षा विधेयक २०७५’ पेश गर्ने कार्यसूची रहेको छ । यस्तै आजकै बैठकमा 'बिमा विधेयक २०७५' र संकल्प प्रस्ताव पेश गर्ने कार्यसूची रहेको छ ।

हिजो आइतबारकै बैठकमा विधेयक पेश गर्ने कार्यसूची रहेपनि पूर्व स‌ंविधानसभा सदस्य एव‌ं पूर्व राज्यमन्त्री मोहम्मद मुस्ताक आलमको निधन भएकाले शोक प्रस्ताव पारित गर्दै बैठक स्थगित भएको थियो।

१७ दिनदेखि जुम्लामा अनशन बसिरहेका डा. गोविन्द केसीको मागलाई वेवास्ता गर्दै सरकारले परिमार्जनसहितको विधेयक संसदमा प्रस्तुत गर्ने तयारी गरेको हो।

शिक्षामन्त्रीद्वारा ‘चिकित्सा शिक्षा विधेयक २०७५’ संसदमा प्रस्तुत गर्नु अघि उक्त विधेयक प्रस्तुत गर्न संसदमा अनुमति माग गरिएको प्रस्ताव विरुद्ध नेपाली कांग्रेसका सांसद गगन थापाले दर्ता गराएको विरोधको सूचना निणर्याथ प्रस्तुत हुने छ। यस्तै सरकारको सोही प्रस्तावको विरुद्धमा नेमकिपाका सांसद प्रेम सुवालले पनि विरोधको सूचना दर्ता गराएका छन्। त्यसलाई पनि आजकै संसदमा निणर्याथ प्रस्तुत गरिने छ। त्यसपछि मात्रै शिक्षामन्त्रीले ‘चिकित्सा शिक्षा विधेयक २०७५’ प्रस्तुत गर्ने कार्यसूचि रहेको छ।

यस्तै आजको बैठकको सुरुमा भने नेकपाकी सांसद विन्दा पाण्डेले महिला हिंसाको विषयलाई लिएर संकल्प प्रस्ताव पेश गर्ने भएकी छिन्। संसदको कार्यसूची अनुसार सांसद पाण्डेले पेश गरेको प्रस्ताव आजै निणयार्थ प्रस्तुत समेत गरिने छ।

नेपालले राष्ट्रिय र अन्तर्राष्ट्रिय रुपमा नै महिलामाथि हुने जघन्य अपराध र सबैप्रकारका विभेदलाई अन्त्य गर्न विभिन्न सन्धी र महासन्धीहरुमा हस्ताक्षर गरेकोले त्यसलाई पूर्ण रुपमा कार्यान्वयन गर्न संकल्पको प्रस्ताव ल्याउन लागिएको हो। महिला हिंसाको अन्त्य गर्न र समाजमा रहेका महिला विरोधी कुरितीहरु हटाउनका लागि विद्यालयको पाठ्यक्रममा पनि यसलाई राख्न संकल्प प्रस्तावले सरकारलाई निर्देशन दिने छ।

यस्तै आजको संसद बैठकमा अर्थमन्त्री युवराज खतिवडाले 'बिमा विधेयक २०७५' पनि पेश गर्ने कार्यसूची रहेको छ।

प्रकाशित : असार ३२, २०७५ १२:४४
प्रतिक्रिया
पठाउनुहोस्

फाइनल दौरान खेल बिथोलेको जिम्मेवारी 'पुसी राएट' ले लियो

एजेन्सी

मस्को — फिफा विश्वकप २०१८ को फाइनल खेल अन्तर्गत फ्रान्स र क्रोएसियाबीच ५२ औं मिनेटमा चार महिला दर्शक मैदान प्रवेश गरे । एकै पोसाकमा रहेका यी चार समर्थक गोलरक्षक ह्युगो लोरिसको पछाडि रहेको दर्शकदीर्घाबाट मैदान प्रवेश गरेका थिए ।

इभान राकिटिचले मिडफिल्डमा बल बढाउँदै गर्दा मैदानको बिचमा दर्शक आएपछि अर्जेन्टिनी रेफ्री नेस्टर पिटानाले खेल रोके । दर्शकदीर्घा वरपर तैनाथ सेकुरिटीले मैदानबाट केही समयमै चारै जनालाई हटाएर खेल सुचारु भयो ।

खेल चलिरहँदा मैदान प्रवेश गर्ने सबै रुसको 'पुसी राएट' समूहसँग आबद्ध रहेको उक्त समूहले विज्ञप्तिमार्फत जनाएको छ । रुसका राष्ट्रपति भ्लादिमिर पुटिन उपस्थित फाइनल खेलमा समूहले केही माग राख्दै उक्त कदम चालेको बताएको छ । विज्ञप्तिमा जनाएअनुसार समूहले निम्न माग राखेको छ –
१. राजनीतिक कैदी सबैलाई रिहा गर्नुपर्ने
२. र्‌यालीहरुमा हुने अवैधानिक गिरफ्तारी बन्द गर्ने
३. खुला राजनीतिक प्रतिस्पर्धाको वातावरण सिर्जना गर्ने
४. अपराधिक गतिविधिलाई अतिरन्जित गरेर संलग्न कैदीलाई जेलमा राख्ने मात्र नगर्ने

सन् २०११ मा स्थापित यस समूहले त्यसयता पुटिन विरोधी र्‌यालीहरु आयोजना गर्दै आएको छ । खुला सदस्यता लिन पाइने यस समूहले विभिन्न कार्यक्रमका साथै प्राप्त सूचनाका आधारमा विज्ञप्ति जारी गर्दै खबरदारी गर्दै आएको छ ।

यसअघि सन् २०१२ को राष्ट्रपति चुनावअघि मस्कोको क्याथेड्रलमा 'पंक प्रेयर' नामक राजनीतिक गित गाएको आरोपमा उक्त समूहका दुई संस्थापक सदस्यले २२ महिना जेल बसेका थिए ।

प्रकाशित : असार ३२, २०७५ १२:४१
पूरा पढ्नुहोस्
ADVERTISEMENT
प्रतिक्रिया
पठाउनुहोस्
ADVERTISEMENT
ADVERTISEMENT
ADVERTISEMENT
ADVERTISEMENT