जिलेटिन आयो, प्रयोग भएन

मनाेज बडु

दार्चुला — तिंकर सडकमा चट्टान फोड्न सेनाले विस्फोटक पदार्थ (जिलेटिन) ढुवानी गरे पनि प्रयोग नगर्दा निर्माण कार्य प्रभावित भएको छ । जिलेटिन पुगेको तीन साता भइसक्दा पनि प्रयोगमा नआउँदा सेनाको दुर्गादल गुल्ममै थन्किएको छ ।

दार्चुला–तिंकर सडक खण्ड । तस्बिर : मनोज बडू

दुई वर्षदेखि सेनाले पूर्वसम्झौताबमोजिम तिंकर सडकका लागि जिलेटिन उपलब्ध गराउन सकेको थिएन । पछिल्लो समय जिलेटिन आए पनि प्रयोगमा आउन नसकेको हो । ‘जिल्लामा विस्फोटक पदार्थ पुगेको तीन साताभन्दा बढी भयो,’ तिंकर सडकका प्रमुख रामचन्द्र साहले भने, ‘विविध कारणले प्रयोगमा ल्याउन सकिएको छैन ।’ साहले आइतबार मात्र नेपाली सेनाको दुर्गादल गुल्मसित कुरा गरेका थिए । सेनाले पूरा गर्न नसकिने सर्त राखेको उनले बताए ।

व्यास गाउँपालिकाका अध्यक्षको पहलमा बझाङस्थित निर्माणाधीन कालंगा जलविद्युत् आयोजनाबाट ९ दशमलव ३ मेट्रिक टन (९ हजार ३ सय किलोग्राम) जिलेटिन तिंकर सडकका लागि सापट ल्याइएको थियो । गाउँपालिका अध्यक्षले तत्काल जिलेटिन प्रयोग गरी सडक निर्माणलाई गति दिनुपर्ने बताए ।

Yamaha

यसअघि प्रहरीको व्यवस्थापनमा जिलेटिन प्रयोग हुँदै आए पनि पछिल्लो समय सेनाको सुरक्षा घेरामा मात्रै विस्फोटक पदार्थको प्रयोग हुने गरेको छ । सुरक्षा संवेदनशीलताका कारण सेनाको सुरक्षा घेरामा जिलेटिन प्रयोग गरिने प्रमुख जिल्ला अधिकारी खुमकान्त आचार्यले बताए ।

जिलेटिन प्रयोग हुने क्षेत्रमा सेनाको टोली नै परिचालन गर्नुपर्ने भएकाले केही ढिलाइ भएको दार्चुला–तिंकर सडक योजनाका प्रमुख साहले बताए । जिलेटिन प्रयोगमा सेना जाँदा सुरक्षा व्यवस्थापन, बासस्थान तथा खानालगायतको व्यवस्था मिलाउनुपर्ने भएकाले ढिलाइ भएको जिल्लास्थित सुरक्षा स्रोतले जनायो ।

Esewa Pasal

प्रकाशित : श्रावण १, २०७५ ०७:४५
ADVERTISEMENT
प्रतिक्रिया
पठाउनुहोस्
ADVERTISEMENT

मापदण्डविपरीत क्रसर सञ्चालन

हरिराम उप्रेती

गोरखा — मापदण्ड पूरा नगरी अवैध ढंगले क्रसर उद्योग सञ्चालन गरिरहेका एक सञ्चालकले आइतबार आवश्यक कागजपत्र जिल्ला प्रशासन कार्यालयमा बुझाएका छन् । पालुङटार नगरपालिका–१ खोप्लाङको माई मनकामना क्रसर उद्योग सञ्चालकले कागजपत्र बुझाएका हुन् ।

गोरखा नगरपालिका–१० छेवेटारमा अवैध रूपमा सञ्चालित क्रसर उद्योग । तस्बिर : हरिराम

शनिबार अनुगमनमा गएका प्रमुख जिल्ला अधिकारी नेतृत्वको टोलीलाई उद्योगमा भेटिएका कर्मचारीले आवश्यक कागजपत्र उपलब्ध गराउन अटेर गरेका थिए । पूर्वसूचना दिए पनि सञ्चालक किरण श्रेष्ठ उद्योगमा भेटिएका थिएनन् ।

प्रजिअले आइतबार १० बजेभित्र आवश्यक कागजपत्रसहित प्रशासनमा उपस्थित नभए उद्योगमा छापा मार्ने निर्देशन दिएका थिए । त्यसपछि श्रेष्ठले प्रशासनमा पुगेर कागजपत्र पेस गरेका हुन् । उनले उद्योग सञ्चालन अनुमति भने पेस गर्न सकेनन् । प्रशासनका अनुसार उद्योगले ०७२/७३ र ०७३/७४ को कर चुक्ता प्रमाणपत्र पनि उपलब्ध गराउन सकेन । नाप तौल दर्ता नवीकरण, उद्योग नवीकरण नभएको र मूल्यसूची पनि उद्योगसँग नभएको पाइएको छ । राजमार्ग र वन क्षेत्रबाट ५ सय मिटर टाढा सञ्चालन गर्नुपर्ने प्रावधान भए पनि उद्योगले दुवै मापदण्ड पूरा नगरेको भेटिएको छ ।

प्रशासनका अनुसार गोरखा नगरपालिका–१० छेवेटारस्थित गोरखकाली क्रसर उद्योगका सञ्चालक सुरेन्द्र कुँवरलाई भने मंगलबारसम्म आवश्यक कागजपत्र पेस गर्न निर्देशन दिइएको छ । आवश्यक कागजपत्र देखाउन आनाकानी गरेको भन्दै नियन्त्रणमा लिइएका उद्योग सुपरभाइजर प्रमोद रानालाई शनिबार साँझ तीन दिनभित्र आवश्यक कागजपत्र बुझाउने सर्तमा छाडिएको छ ।

भूकम्प आपतकालीन सहायता परियोजनाअन्तर्गत पालुङटार नगरपालिकाको लुइँटेल भन्ज्याङदेखि थालाजुङसम्म सडक स्तरोन्नतिका लागि दरौदी नदीबाट नदीजन्य पदार्थ उत्खननका लागि अनुमति दिइए पनि उद्योगले अन्यत्र बिक्री गर्दै आएको पाइएको छ । सम्झौताअनुसार भण्डारण सामग्री आयोजनाको काममा मात्र प्रयोग गर्नुपर्छ । स्थायी रूपमै उक्त ठाउँमा उद्योग सञ्चालन गर्न पनि कुँवरले चलखेल गर्दै आएको स्रोतको दाबी छ ।

शनिबार सिम्रन क्रसर उद्योगको पनि अनुगमन गरिएको थियो । तीनवटै उद्योग आवश्यक मापदण्ड पूरा नगरी सञ्चालन भइरहेको पाइएको छ । दरौदी नदी क्षेत्रका तीनवटै क्रसर उद्योगले स्टक प्रमाणीकरण नगरी उत्पादित वस्तु ढुवानी गर्दै आएका छन् ।

गृह मन्त्रालयको निर्देशनअनुसार क्रसरको वास्तविक अवस्था थाहा पाउन अनुगमन थालिएको प्रमुख जिल्ला अधिकारी नारायण भट्टराईले बताए । अनुमति नलिई सञ्चालन भएका उद्योगको अध्ययन गर्न प्रहरीलाई निर्देशन दिइएको उनले जानकारी दिए ।

‘तीन वटा उद्योगको लोकेसन हेर्‍यौं, केहीको कागजपत्र पनि प्राप्त भएको छ, कागजपत्र नबुझाउनेलाई समय दिएका छौं, हामी सूक्ष्म ढंगले अध्ययन गर्छौं,’ उनले भने । व्यवसाय सञ्चालन गर्दा दु:ख दिने मनसाय प्रशासनको नभएको र कानुनसम्मत तरिकाले उद्योग सञ्चालन गर्न उनले आग्रह गरे ।

प्रकाशित : श्रावण १, २०७५ ०७:४३
पूरा पढ्नुहोस्
ADVERTISEMENT
प्रतिक्रिया
पठाउनुहोस्
ADVERTISEMENT
ADVERTISEMENT