मेडिकल कलेजलाई राष्ट्रियकरण गर्न माग
काठमाडौँ — सत्ता पक्षीय युवा र विद्यार्थी संगठनले निजी क्षेत्रबाट सञ्चालित मेडिकल कलेजहरुलाई राष्ट्रियकरण गर्न माग गरेका छन् ।
संविधानको मर्म अनुसार शिक्षा र स्वास्थ्यलाई मौलिक हकका रुपमा स्थापित गर्न मेडिकल कलेजहरुलाई गैरनाफामुखी बनाउन आईतबार प्रेस विज्ञप्ति प्रकाशित गरी युवा र विद्यार्थी संगठनले माग गरेका हुन् ।
सरकारले निजी मेडिकल कलेजलाई फाईदा हुने गरी चिकित्सा शिक्षा विधेयक ल्याउन लागेको भन्दै चौतर्फी विरोध भइरहेको बेला नेकपाकै युवा विद्यार्थी संगठनले राष्ट्रियकरण वा गैरनाफामूलक बनाउन जोड दिएका हुन् ।
युवा संघ, वाईसिएल, अनेरास्ववीयू र अखिल क्रान्तिकारीका केन्द्रीय अध्यक्षहरुले विज्ञप्ति जारी गरी सबै प्रदेशमा एक सुविधा सम्पन्न सरकारी शिक्षण अस्पताल सञ्चालनको प्रक्रिया थाल्न सरकारसँग आग्रह गरेका छन् ।
विज्ञप्तिमा चिकित्सा शिक्षा आयोग गठनबाट समस्या समाधान गर्ने गरी डा. गोविन्द केसीको माग वार्ताबाट समाधान गर्न सरकारसँग माग गरिएको छ ।
पढ्नुहोस्, विज्ञप्तिको पूर्णपाठ
प्रकाशित : श्रावण ६, २०७५ १६:२२