सरकार विपक्षीलाई तर्साउने खेलमा लागेको नेता सिंहको आरोप

चिकित्सक, प्राध्यापक, विश्व विद्यालयका उपकुलपति जस्ता पदीय मर्यादा र जिम्मेवारी बोकेका व्यक्तिहरुलाई अपहरण शैलीमा पक्राउ गर्ने सरकारका गतिविधिले मुलुक कम्युनिष्ट अधिनायकवादतिर लैजाने प्रयास भइरहेको उनको आरोप थियो । नेता सिंहले भने, ‘स्थायित्व र समृद्धिको नारा दिएर सरकारमा पुगेको वाम सरकारले आफ्नो पहिलो चार महिनामा नै इतिहासमै सबैभन्दा बढी मूल्यवृद्धि गरेको छ ।’

कांग्रेस ऐजेण्डाविहीन भएर गोविन्द केसीको समर्थन नगरेको बताउँदै उनले भने, ‘मानव अधिकार र जनताका पक्षमा जसले आन्दोलन गरे पनि कांग्रेसले समर्थन गर्छ ।’

नेपाल प्रेस युनियन डडेलधुराको आयोजनामा भएको पत्रकार सम्मेलनमा कांग्रेस नेता सिंहले वर्तमान सरकारले सबै संवैधानिक मर्यादा समाप्त गर्न खोजेको आरोप समेत लगाए । उनले भने, ‘सभामुख र उपसभामुख भिन्नाभिन्नै पार्टीको हुनुपर्ने संवैधानिक व्यवस्थाको सरकारले खिल्ली उडाएको छ ।’