बालयौन दुराचारको आरोपमा दुई फ्रेन्च पक्राउ

कान्तिपुर संवाददाता

काठमाडौँ — नेपाल प्रहरीको केन्द्रीय अनुसन्धान ब्युरोले दुई फ्रान्सेली नागरिकलाई बालयौन दुराचारको आरोपमा पक्राउ गरेको छ ।

फ्रान्स उड्न गत शुक्रबार विमानस्थल पुगेका उनीहरूलाई प्रहरीको सूचनापछि अध्यागमन कक्षबाटै पक्राउ गरिएको थियो । पक्राउ परेकामा ४२ वर्षीय क्रिस्टोफी ग्युलोक्स र ३८ वर्षीय डेनिस म्याथु मिचेर चाउप छन् ।

Yamaha

ब्युरोका अनुसार उनीहरू दुवै यसअघि नेपाल आएर केही समय बसेर फर्केका थिए । क्रिस्टोफी २०१७ सेप्टेम्बर ९ मा र डेनिस २०१७ अक्टोबर २५ मा पहिलोपल्ट नेपाल आएका थिए ।

उनीहरू त्यतिबेला कागेश्वरी मनोहरा नगरपालिकामा डेरा गरी बसेका थिए । ब्युरोका अनुसार २०१७ नोभेम्बर ३० मा क्रिस्टोफी र २०१८ अप्रिल १२ मा डेनिस दोस्रोपल्ट नेपाल आएर पहिले बसेकै स्थानमा बसेका थिए ।

ब्युरोका अनुसार उनीहरूले आफ्नो कोठामा १० देखि १४ वर्ष उमेर समूहका बालकहरूलाई बोलाउने र उनीहरूसँग यौन गतिविधि गर्ने गरेका थिए ।

फुटबल, चकलेट र पैसा दिएर उनीहरूले बालबालिकालाई फकाउँदै अवैध सम्बन्ध राखेको सूचना पाएपछि सादा पोसाकमा खटिएका प्रहरीले दुई सातासम्म उनीहरूको निगरानी गरेको थियो ।

प्रहरीले पिछा गरेको थाहा पाएपछि गत शुक्रबार उनीहरू फ्रान्स फर्किन विमानस्थल पुगेका थिए । ब्युरोको एक अनुसन्धान अधिकारीका अनुसार उनीहरूलाई रंगेहात समात्ने प्रयास असफल भए पनि बरामद भएको ल्यापटप, मोबाइललगायत उपकरणमा बालकहरूसँग आपत्तिजनक गतिविधि गरेका तस्बिर छन् ।
ब्युरोमा पीडित बालकका ५ अभिभावकले जाहेरी दिएका छन् । प्रहरीले दुवैमाथि थप अनुसन्धानका निम्ति काठमाडौं जिल्ला अदालतबाट थुनामा राखी अनुसन्धान गर्न ५ दिनको म्याद लिएको छ । ब्युरोका अनुसार पक्राउ परेका डेनिस सन् २००४ मा पनि फ्रान्समा यौन दुराचारको आरोपमा पक्राउ परी सजाय भोगिसकेका व्यक्ति हुन् ।

ब्युरोका अनुसार पछिल्लो आर्थिक वर्षमा मात्रै पेडोफिलका ७ घटनामा प्रहरीले ६ विदेशी र एक नेपाली सहयोगी पक्राउ गरेको छ । यी घटनामा २३ बालक पीडित छन् ।

अधिकांश पीडक ४५ वर्षमाथिका छन् । आर्थिक वर्ष २०७४/७५ को जेठ महिनासम्म मात्रै प्रहरी परिसर काठमाडौंले बालयौन दुराचारको आरोपमा ३ जनालाई पक्राउ गरेको थियो ।

असार ४ गते महानगरीय अपराध महाशाखाले स्विस नागरिक पिटर क्रिस्चियनलाई बालयौन दुराचारकै आरोपमा पक्राउ गरेको थियो । प्रहरीका अनुसार उनले १६ वर्षीय बालकलाई काठमाडौं र भक्तपुरका विभिन्न होटलमा लगी यौन दुराचार गरेका थिए ।

Esewa Pasal

प्रकाशित : श्रावण ८, २०७५ १९:४३
ADVERTISEMENT
प्रतिक्रिया
पठाउनुहोस्
ADVERTISEMENT

ग्रिसमा डढेलो, कम्तीमा ६० को मृत्यु

बीबीसी

एथेन्स — ग्रिसको राजधानी एथेन्स नजिकैको पर्यटकीय क्षेत्र एट्टिकामा फैलिएको डढेलोले कम्तीमा ६० जनाको मृत्यु भएको छ । राजधानी एथेन्सको पूर्वमा पर्ने माटी गाउँको तटीय क्षेत्रमा आगलागी फैलिएको आगलागी एक दशकयताकै भीषण हो । 

उद्धारकर्मीहरुले बालबालिकासहित २६ शव एकअर्कालाई अँगालेको अवस्थामा फेला पारेको जनाएका छन् । उद्धार निकायहरुमा कतिपय मानिसले पटकपटक टेलिफोन गरेको बीबीसीले जनाएको छ । कतिपयको शव घर तथा गाडीमा भेटिएका थिए ।

टेलिभिजनमा प्रसारित दृश्यहरुमा खरानी रंगको धुवाँको बाक्लो मुस्लो आवासीय क्षेत्र हुँदै आकाशमा फैलिएको देखिन्थ्यो । अग्नि नियन्त्रकहरूले डढेलो नियन्त्रण गर्न कठिन भएको बताएका छन् । अधिकारीहरुले डढेलोको चपेटामा परेकाको उद्धार गर्न नसकिएको जनाएका छन् ।

कतिपय मानिसले नजिकैको समुद्री क्षेत्रमा भागेर ज्यान जोगाएका हुन् । सयौं अग्नि नियन्त्रकहरु डढेलो नियन्त्रणमा खटिइरहँदा अधिकारीहरुले अन्तर्राष्ट्रिय सहयोगको अपेक्षा गरेको स्थानीय सञ्चारमाध्यमहरुले उल्लेख गरेका छन् ।

ग्रिसले युरोपेली संघलाई डढेलो नियन्त्रणका लागि हेलिकोप्टर तथा थप अग्नि नियन्त्रक उपलब्ध गराउन सहयोग मागेको छ । इटली, जर्मनी, पोल्यान्ड र फ्रान्सले गाडी तथा अग्नि नियन्त्रक उपलब्ध गराएका छन् ।

एकै स्थानमा २६ शव भेटिएपछि ग्रिस रेडक्रसका प्रमुख निकोस इकोनोमोपोउलसले ‘उनीहरुले ज्यान जोगाउन कोसिस गरे पनि बालबालिकाका कारण असम्भव भएको देखिन्छ ।’

मन्त्रिपरिषदको आपतकालीन बैठकपछि बोल्दै ग्रिसका प्रधानमन्त्री एलेक्सिस सिप्रासले भने, ‘डढेलो नियन्त्रणका लागि गर्न सकिने सबै प्रयासहरू भइरहेका छन् । ग्रिसका लागि यो कठिन रात हो ।’ उनले सन् २००७ यताको भीषण आगलागी भएको जनाए ।

सिप्रासले ६ सयभन्दा बढी अग्नि नियन्त्रक तथा ३ सय दमकल तथा गाडीहरू डढेलो नियन्त्रणका लागि परिचालन गरिएको जनाए । सिप्रासले देशमा ३ दिने राष्ट्रिय शोकको घोषणासमेत गरेका छन् ।

अधिकारीहरूले एथेन्सको पश्चिममा रहेको किनेटा नगरका बासिन्दालाई घर छाडी अन्यत्र जान आग्रह गरेका छन् । डढेलो लागेसँगै उक्त क्षेत्रमा सडक यातायात अवरुद्ध भएको छ । रेल सेवा पनि आंशिक रूपमा रद्द गरिएको जनाइएको छ ।
धेरैजसो पीडितहरू एथेन्सको उत्तरपूर्वमा रहेको माटी गाउँस्थित समुद्री क्षेत्रको रिजोर्टमा गएका पर्यटकहरु भएको स्थानीय सञ्चारमाध्यमले जनाएको छ । डढेलोका कारण १ सय जनाभन्दा बढी घाइते भएका छन् । ती मध्ये ११ जना गम्भीर छन् । घाइतेमध्ये १६ बालबालिका छन् ।

प्रकाशित : श्रावण ८, २०७५ १९:३१
पूरा पढ्नुहोस्
ADVERTISEMENT
प्रतिक्रिया
पठाउनुहोस्
ADVERTISEMENT
ADVERTISEMENT
ADVERTISEMENT
ADVERTISEMENT