राष्ट्रियसभामा सत्ता र प्रतिपक्षबीच भनाभन

कार्यसूचीमा प्रवेश नै नगरी बैठक स्थगित 
कान्तिपुर संवाददाता

काठमाडौँ — को पहिले बोल्ने विषयमा सत्तापक्ष र प्रतिपक्षबीच चलेको जुहारीका कारण मंगलबारको राष्ट्रियसभाको बैठक कार्यसूचीमा प्रवेश नै नगरी स्थगित हुन पुग्यो । 

Yamaha

बैठक प्रारम्भ हुनासाथ सत्तापक्ष नेकपाका सांसदहरु आ–आफ्नो आसनबाट उभिएर आफूहरुले बोल्न पाउनुपर्ने माग गरेका थिए । तत्कालै प्रतिपक्षी कांग्रेसका सांसदहरु पनि आसनबाट उभिएर पहिले बोल्न पाउनुपर्ने माग गर्न थालेका थिए ।

सभाध्यक्ष गणेशप्रसाद तिमिल्सिनाले सत्तारुढ दलका नेता खिमलाल भट्टराईलाई बोल्न समय दिएपछि प्रतिपक्षी सांसदहरुले लगातार टेबल ठोकेर बिरोध गरेका थिए । टेबलको आवाजले भट्टराईले बोल्न सकेका थिएनन् ।

राष्ट्रियसभामा कांग्रेसका नेता सुरेन्द्र पाण्डेले कार्यव्यवस्था परामर्श समितिमा बैठक सुरु गर्ने र पहिले प्रतिपक्षी दललाई बोल्न दिने सहमतिविपरीत काम भएको भन्दै विरोध गरिरहेका थिए । सत्ता र प्रतिपक्षी सांसदबीच दोहोरो भनाभनको स्थिति उत्पन्न भएपछि सभाध्यक्षले पटक पटक एक अर्कासँग सवाल जवाफ र दोहोरी नगर्न आग्रह गर्नु परेको थियो ।

सभाध्यक्षले संसद् सञ्चालन गर्न प्रतिपक्षी दललाई बोल्ने अवसर दिने प्रयास गर्दा सत्तापक्षले पहिले आफूले नै बोल्न पाउनुपर्ने अडान लिइरहे । संसदीय समितिहरूको गठनको विषय संसदको कार्यसूचीमा थियो । आफूले बोलेर बैठक अवरुद्ध पार्न सक्ने प्रतिपक्षीको मनसाय बुझेर सत्तापक्षले बैठक कार्यसूचीमा प्रवेश गर्नुपर्ने माग निरन्तर गरका थिए । निरन्तरको आग्रहपछि पनि प्रतिपक्षी कांग्रेसका सांसदहरु आफ्नो स्थानमा नबसी उभिइनै रहे । करीब २५ मिनेटको रस्साकसीपछि अध्यक्षले बैठक स्थगित गरेका थिए । अर्को बैठक बुधबार बोलाइएको छ ।

प्रकाशित : श्रावण ८, २०७५ १९:४४
प्रतिक्रिया
पठाउनुहोस्
ADVERTISEMENT

बालयौन दुराचारको आरोपमा दुई फ्रेन्च पक्राउ

कान्तिपुर संवाददाता

काठमाडौँ — नेपाल प्रहरीको केन्द्रीय अनुसन्धान ब्युरोले दुई फ्रान्सेली नागरिकलाई बालयौन दुराचारको आरोपमा पक्राउ गरेको छ ।

फ्रान्स उड्न गत शुक्रबार विमानस्थल पुगेका उनीहरूलाई प्रहरीको सूचनापछि अध्यागमन कक्षबाटै पक्राउ गरिएको थियो । पक्राउ परेकामा ४२ वर्षीय क्रिस्टोफी ग्युलोक्स र ३८ वर्षीय डेनिस म्याथु मिचेर चाउप छन् ।

ब्युरोका अनुसार उनीहरू दुवै यसअघि नेपाल आएर केही समय बसेर फर्केका थिए । क्रिस्टोफी २०१७ सेप्टेम्बर ९ मा र डेनिस २०१७ अक्टोबर २५ मा पहिलोपल्ट नेपाल आएका थिए ।

उनीहरू त्यतिबेला कागेश्वरी मनोहरा नगरपालिकामा डेरा गरी बसेका थिए । ब्युरोका अनुसार २०१७ नोभेम्बर ३० मा क्रिस्टोफी र २०१८ अप्रिल १२ मा डेनिस दोस्रोपल्ट नेपाल आएर पहिले बसेकै स्थानमा बसेका थिए ।

ब्युरोका अनुसार उनीहरूले आफ्नो कोठामा १० देखि १४ वर्ष उमेर समूहका बालकहरूलाई बोलाउने र उनीहरूसँग यौन गतिविधि गर्ने गरेका थिए ।

फुटबल, चकलेट र पैसा दिएर उनीहरूले बालबालिकालाई फकाउँदै अवैध सम्बन्ध राखेको सूचना पाएपछि सादा पोसाकमा खटिएका प्रहरीले दुई सातासम्म उनीहरूको निगरानी गरेको थियो ।

प्रहरीले पिछा गरेको थाहा पाएपछि गत शुक्रबार उनीहरू फ्रान्स फर्किन विमानस्थल पुगेका थिए । ब्युरोको एक अनुसन्धान अधिकारीका अनुसार उनीहरूलाई रंगेहात समात्ने प्रयास असफल भए पनि बरामद भएको ल्यापटप, मोबाइललगायत उपकरणमा बालकहरूसँग आपत्तिजनक गतिविधि गरेका तस्बिर छन् ।
ब्युरोमा पीडित बालकका ५ अभिभावकले जाहेरी दिएका छन् । प्रहरीले दुवैमाथि थप अनुसन्धानका निम्ति काठमाडौं जिल्ला अदालतबाट थुनामा राखी अनुसन्धान गर्न ५ दिनको म्याद लिएको छ । ब्युरोका अनुसार पक्राउ परेका डेनिस सन् २००४ मा पनि फ्रान्समा यौन दुराचारको आरोपमा पक्राउ परी सजाय भोगिसकेका व्यक्ति हुन् ।

ब्युरोका अनुसार पछिल्लो आर्थिक वर्षमा मात्रै पेडोफिलका ७ घटनामा प्रहरीले ६ विदेशी र एक नेपाली सहयोगी पक्राउ गरेको छ । यी घटनामा २३ बालक पीडित छन् ।

अधिकांश पीडक ४५ वर्षमाथिका छन् । आर्थिक वर्ष २०७४/७५ को जेठ महिनासम्म मात्रै प्रहरी परिसर काठमाडौंले बालयौन दुराचारको आरोपमा ३ जनालाई पक्राउ गरेको थियो ।

असार ४ गते महानगरीय अपराध महाशाखाले स्विस नागरिक पिटर क्रिस्चियनलाई बालयौन दुराचारकै आरोपमा पक्राउ गरेको थियो । प्रहरीका अनुसार उनले १६ वर्षीय बालकलाई काठमाडौं र भक्तपुरका विभिन्न होटलमा लगी यौन दुराचार गरेका थिए ।

प्रकाशित : श्रावण ८, २०७५ १९:४३
पूरा पढ्नुहोस्
ADVERTISEMENT
प्रतिक्रिया
पठाउनुहोस्
ADVERTISEMENT
ADVERTISEMENT