कार त्रिशूली नदीमा खस्यो, एक जनाको मृत्यु

काठमाडौंबाट पोखरा जाँदै गरेको बा १४ च ३७५८ नम्बरको कार नदीमा खस्दा कास्की बैदामका ५१ वर्षीय मधुकर सुवेदीको मृत्यु भएको प्रहरीले जनाएको छ । कारसँगै नदीमा खसेका सुवेदीलाई नेपाली सेनाले उद्धार गरी गजुरी अस्पतालमा पुर्‍याइएको थियो । उनको उपचारका क्रममा मृत्यु भएको प्रहरीले जानकारी दिएको छ । कारमा सवार दुई जना भने पौडिएर बाँचेका छन् ।

कार चालक रामेछापका सानुबाबु सुनुवार र ललितपुर इमाडोलका शैलेन्द्र राउत सामान्य घाइते भएका छन् ।

तीव्र गतिका कारण अनियन्त्रित भई कार त्रिशूली नदीमा खसेको जिल्ला ट्राफिक प्रहरी कार्यालय गजुरीले जनाएको छ ।