जोशीका प्रमाणपत्र थप शंकाको घेरामा 

कृष्ण ज्ञवाली

काठमाडौँ — प्रधानन्यायाधीशका लागि संसदीय सुनुवाइ सामना गरिसकेका दीपकराज जोशीका शैक्षिक प्रमाणपत्र थप शंकाको घेरामा परेका छन् । जोशी र निवर्तमान प्रधानन्यायाधीश गोपालप्रसाद पराजुलीको ‘प्रोग्रेस रिपोर्ट’ का केही आधारभूत विवरण शंकास्पद भेटिएका हुन् । 

‘दुवै जनाले पेस गरेका ल क्याम्पसका प्रोग्रेस रिपोर्ट भिडाउने हो भने एउटा गलत निस्कन्छ,’ दुवै जनाको अभिलेख रहेको संवैधानिक परिषद सचिवालय स्रोतले भन्यो, ‘संसदीय सुनुवाइका क्रममा उठेको यस्तो गम्भीर प्रश्नको छानबिन हुनुपर्छ ।’ बिहीबारको संसदिय सुनुवाइमा सांसद योगेश भट्टराईलगायतले जोशीको शैक्षिक प्रमाणपत्रमा एउटै सिम्बोल नम्बर भेटिएको बारे प्रश्न उठाएका थिए ।

Yamaha


सचिवालय स्रोतले कान्तिपुरलाई उपलब्ध गराएको प्रतिलिपिअनुसार २०३० साउनमा नेपाल ल क्याम्पसमा ‘प्रमाणपत्र तह’ मा भर्ना भएका जोशीको प्रोग्रेस रिपोर्टमा क्रम संख्या ५३३८ उल्लेख छ । २०३१ साउनमा भर्ना भएका गोपाल पराजुलीको प्रोग्रेस रिपोर्टमा क्रम संख्या १३४७६ उल्लेख छ । दुवैको रिपोर्टको ढाँचा एउटै छ ।

एक वर्षमा प्रोग्रेस रिपोर्टको क्रम संख्या ८ हजार १ सय ३८ ले बढेको देखिन्छ । त्यति बेला कानुन पढेका जानकारहरूका अनुसार यति छोटो अवधिमा त्यति धेरै विद्यार्थीको चाप कुनै हालतमा सम्भव थिएन । ल क्याम्पसका एक अध्यापकले भने, ‘दुवै प्रोग्रेस रिपोर्टमा उल्लिखित क्रम संख्यामध्ये एउटा गलत हुन सक्छ । दुइटै सही कुनै हालतमा हुन सक्दैनन् ।’ उक्त कागजातको दायाँपट्टिसमेत अंक लेखिएको छ । पराजुलीकोमा ११८ र जोशीको रिपोर्टमा ४६ लेखिएको छ । दुवै कागजातमा त्रिभुवन विश्वविद्यालयको रजिष्ट्रेसन नम्बरको ढाचा र स्वरुपसमेत मिल्दैन । जोशीको रजिष्ट्रेसन नम्बर २९-५०-०३ र अर्को वर्षको गोपाल पराजुलीको रजिष्ट्रेसन नम्बर ३१-५२३६४७-१ उल्लेख छ ।



सुनुवाइमा सांसद भट्टराईले शैक्षिक प्रमाणपत्रबारे उठेका प्रश्नमा स्पष्ट पार्न आग्रह गरेका थिए । ‘अलगअलग परीक्षा र पछि शैक्षिक प्रमाणपत्रमा एउटै सिम्बोल नम्बर कसरी रह्यो, सधै प्रधानन्यायाधीशहरुमा यस्तो किन हुन्छ ?’ उनले सोधे । जवाफमा जोशीले ‘मेरो शैक्षिक प्रमाणपत्रको कुरा उठेकाले यो सभापतिज्यूलाई देखाउन चाहन्छु’ भन्दै समितिको सभापतित्व गरिरहेका ज्येष्ठ सदस्य लक्ष्मणलाल कर्णलाई फोटोकपी बुझाए । ‘पत्रपत्रिकामा जे जस्तो आएका छन्, त्यो होइन,’ उनले भने, ‘मैले यहाँहरूलाई बुझाएको छु, हेर्दा हुन्छ ।’

संसद् सचिवालय स्रोतले उपलब्ध गराएको उक्त कागजात ल क्याम्पसकै ‘प्रोग्रेस रिपोर्ट’ हो जुन गत बुधवार कान्तिपुर दैनिकमै प्रकाशित भएको थियो । उक्त रिपोर्टमा जोशीको प्रवेशिका र त्यसभन्दा अघि विद्यालय तहको सिम्बोल नम्बर एउटै छ । उक्त रिपोर्टले जोशीको प्रमाणपत्रमाथि उठेको प्रश्नको निरुपण गर्दैन । किनभने प्रोग्रेस रिपोर्टमै उल्लिखित ३६६७ नम्बरको सिम्बोल नम्बर दुईतिर भेटिएको भन्दै प्रश्न उठेको थियो ।

जोशी र पराजुलीका प्रोग्रेस रिपोर्टमा केही विषयवस्तु हुबहु मिलेका छन् । जस्तो कि भर्नाका लागि आवश्यक न्यूनतम योग्यता भर्नुपर्ने ठाउँमा जोशीले नेपाल राष्ट्रिय विद्यापीठको छोटो रुप एन.आर.भी. उल्लेख गरेका छन् । दुवैले क्लास उल्लिखित ठाँउमा रोमन लिपिमा तीन लेखेका छन् । दुवैले २०२९ सालमा प्रवेशिका दिएको खुल्छ ।

जोशीले विजय मेमोरियल स्कूलकै प्रमाणपत्रका आधारमा प्रवेशिका दिएकाले सिम्बोल नम्बर एउटै भएको कान्तिपुरलाई बताएका थिए । शनिबार भने जोशीको सचिवालय स्रोतले प्रवेशिकामा उल्लिखित सिम्बोल नम्बर नै स्कुल पढाको विवरणमा राखिएको प्रतिक्रिया दियो । स्रोतले भन्यो, ‘सबैकोमा यस्तै हुन्थ्यो । गोपाल पराजुलीकोमा पनि यसभन्दा फरक थिएन ।’ जोशीले प्रोग्रेस रिपोर्टमा विजय मेमोरियल स्कुलको नाम लेखेका थिए । कान्तिपुरसँगको प्रतिक्रियामा उनले टेस्ट परिक्षा पास गरेर नेपाल राष्ट्रिय विद्यापीठमा प्रवेशिका दिएको जनाएका थिए । प्रधानन्यायाधीश सचिवालयको दाबीअनुसार विजय मेमोरियलमा बुझाएको बिलदेखि खेलकुदका प्रमाणपत्रसमेत निवासमा सुरक्षित छन् ।

सुनुवाई समिति सचिवालय स्रोतका अनुसार परीक्षा नियन्त्रण कार्यालयको अभिलेखमा जोशीले उल्लेख गरेको सिम्बोल नम्बरमा अर्कै मानिसको नाम भेटिएको सूचना आएको छ । जोशीले आफ्नो प्रमाणपत्र अनावश्यक विवादमा तान्न खोजिएको प्रतिक्रिया दिए । ‘जथाभाबी लेखेर मलाई दु:ख दिने काम भयो,’ उनले भने, ‘संसदीय समितिमै कागजात पेस गरिसकेको छु । बजारमा अनावश्यक विवाद खडा गरिएको महसुस हुँदै छ ।’

Esewa Pasal

प्रकाशित : श्रावण १२, २०७५ २०:४३
ADVERTISEMENT
प्रतिक्रिया
पठाउनुहोस्

चुरेमा खानेपानीको संकट

कान्तिपुर संवाददाता

सर्लाही — लालबन्दी नगरपालिका–१६, परवानीपुरका ६ सय परिवारले वर्षौंदेखि खानेपानी संकट झेल्दैछन् । उनीहरू कालिन्जोर खोलाको दूषित पानी पिउन बाध्य छन् ।

हरिवन नगरपालिका–१, अत्रौलीका ५ सय ६३ परिवार पनि कुवा र खोल्साकै धमिलो पानीमा निर्भर छन् । ईश्वरपुर– १२, कालिन्जोरका डेढ सय परिवारलाई खानेपानीकै चिन्ता छ ।

सर्लाहीको चुरे क्षेत्रका अधिकांश बस्ती स्वच्छ खानेपानीको पहुँचभन्दा बाहिर छन् । दूषित पानी पिउनुपर्ने बाध्यताकै कारण यस क्षेत्रमा झाडापखालाको महामारी फैलिने गरेको स्थानीयले बताए । महामारीकै कारण प्रत्येक वर्ष स्थानीयको ज्यान जाने गरेको छ ।

ती क्षेत्रमा स्वच्छ खानेपानीका लागि डिप बोरिङ गर्ने योजना ठेकेदारको लापरबाहीका कारण अलपत्र बनिरहेको स्थानीय गुनासो गर्छन् ।

सम्बन्धित निकायको उदासीतनाका कारण आफूहरूले सानातिना प्रयासबाट जेनतेन खानेपानीको व्यवस्था मिलाएको अत्रौलीका स्थानीय टमबहादुर घिसिङ बताउँछन् । ‘डाँडाकाँडाका विभिन्न ठाउँमा रसाएको पानी जम्मा पारेर खाने गरेका छौं,’ उनले भने, ‘अरूबेला त ठिकै हो बाढी पहिरोका बेला स्वास्थ्य जोखिम बढ्छ ।’

अत्रौलीमा डिप बोरिङ गर्ने योजनाको म्याद सकिएकै महिनौं भइसकेको छ । खानेपानी कार्यालयबाट ठेक्का पाएको सम्बन्धित ठेकेदारले कामै सुरु नगरेपछि स्थानीयको सफा र स्वच्छ पानी पाउने आशामा तुषारापात भएको घिसिङले गुनासो गरे ।

कालिन्जोरका स्थानीयले बाँके खोलामा पाइप ओछ्याएर गाउँमा पानी ल्याएका छन् । बर्सेनि खोलाले पाइप बगाएका कारण गाउँमा खानेपानीको हाहाकार हुने गरेको हरि लुंगेलीले बताए । उनले भने, ‘यहाँ दैनिक खानेपानीको गर्जो टार्न नदीको धमिलो पानी ओसारेर पिउन बाध्य छौं । केही भने घण्टौं लगाएर छिमेकी गाउँबाट खानेपानीको जोहो गरिरहेका छन् ।’ यहाँ पनि डिप बोरिङको योजना छ, तर काम भएको छैन ।

खानेपानीको हाहाकार हुने परवानीपुरमा पनि समस्या उस्तै छ । ‘कालिन्जोर खोलाबाट पानी खाँदै आएका छौं, परवानीपुरका प्रकाश थापाले भने, ‘बाढीपहिरो र सुख्खाको बेला निकै सास्ती खेप्नुपर्छ ।’ जलवायु परिवर्तन, वन विनाश लगायत कारणले स्रोत सुकेपछि पानीको अभाव बढदा स्थानीय बासिन्दा कुवा, नदी र खोलाको पानी पिउन बाध्य छन् ।

चुरे क्षेत्रमा पर्ने कालिन्जोर, परवानीपुर, नारायण खोला, पत्थरकोट, अत्रौली, ढुंग्रेखोलालगायत गाउँमा खानेपानी अभाव छ । सरकारी तथा गैरसरकारी निकायको सहयोगमा खोलामा पाइप ओछ्याए पनि वर्षायाममा बाढीपहिरोले पाइप बगाउँदा तथा हिउँदमा मुहान सुकेका कारण खानेपानीको हाहाकार हुने गरेको छ ।

स्वच्छ खानेपानीका लागि बजेट अभाव र ठेक्का पाएका ठेकेदारले काम नगरेका कारण निर्माणले गति लिन नसकेको डिभिजन खानेपानी कार्यालयका प्रमुख जगन्नाथ पूर्वेले बताए । उनले भने, ‘समय सीमा सकिँदा पनि काम नगर्ने ठेकेदारको ठेक्का रद्द गर्ने प्रक्रिया अगाडि बढाइरहेको छु ।’

प्रकाशित : श्रावण १२, २०७५ २०:२१
पूरा पढ्नुहोस्
प्रतिक्रिया
पठाउनुहोस्
ADVERTISEMENT
ADVERTISEMENT