नगरपालिकाबाटै विद्यालय निगरानी

कान्तिपुर संवाददाता

इलाम — सूर्योदय नगरपालिकाले विद्यालयको शैक्षिक स्तर सुधार्न प्रयोगमा ल्याएको विद्युतीय हाजिरी (ई–एटेन्डेन्स) प्रभावकारी देखिएको छ । एसईई नतिजासँगै विद्यार्थी भर्नादरसमेत घटेपछि नगरपालिकाले कार्यालयबाटै विद्यालयका गतिविधि निगरानी गर्न थालेको हो ।

नगरपालिकाले पहिले प्रयासस्वरूप शिक्षकको उपस्थिति नियमित बनाउने नीति लियो । करफोक विद्या मन्दिर, कन्यामस्थित कृष्णाश्रम, पशुपतिनगरस्थित बौद्धधाम र फिक्कल माविमा बायो माट्रिक एटेन्डेन्स मेसिन जडान गरियो । त्यसपछि नगरप्रमुखले हरेक दिन आफ्नै कार्यकक्षबाट शिक्षकको हाजिरी हेर्न सक्ने भए । ‘हरेक दिन कार्यालयमै बसेर शिक्षकको उपस्थिति नियाल्ने गरेका छौं,’ नगरप्रमुख रनबहादुर राईले भने, ‘शैक्षिक जनशक्ति उत्पादनमा महत्त्वपूर्ण योगदान खेलेका विद्यालयबाट सुधार अभियान चलाउन यसो गरिएको हो ।’

ई–एटेन्डेन्सको व्यवस्थापछि शिक्षक नियमित स्कुल आउन थाले । अरू पनि थुप्रै सुधार देखिए । ‘अहिले स्टाफले निश्चित समयभित्र विद्यालय छाडेर जाने अवस्था छैन,’ करफोक विद्यामन्दिरका प्रधानाध्यापक दिनराज निरौलाले भने, ‘सीधै नगरपालिकाका प्रमुखलगायतले अनुगमन गर्ने भएपछि शिक्षकको उपस्थिति नियमित छ ।’

अन्य विद्यालयमा पनि यो प्रणाली जडानपछि शैक्षिक स्थिति सुधारिँदै गएको नगरपालिकाको दाबी छ । क्रमश: सवै विद्यायमा ई–एटेन्डेन्सको व्यवस्था गर्ने नगरपालिकाले जनायो । चियाबारीभित्रको कन्यामस्थित कृष्णश्रम मावि पर्यटकका कारण पनि प्रभावित हुँदै आएको थियो । तर पछिल्लो समय शिक्षकको नियमित उपस्थितिसँगै अत्यावश्यक सुधार गरिएपछि माहोल फेरिएको छ । ‘पहिले पनि शिक्षक नियमित नआएका होइनन् तर विद्युतीय हाजिरीपछि सबैले जिम्मेवारी बढेको महसुस गरेका छौं,’ प्रधानाध्यापक देवकुमार दाहालले भने।

Yamaha

Esewa Pasal

प्रकाशित : श्रावण १३, २०७५ ०७:२५
प्रतिक्रिया
पठाउनुहोस्
ADVERTISEMENT

शिक्षक पदपूर्ति पुरानै संरचनामा

कान्तिपुर संवाददाता

काठमाडौँ — शिक्षा ऐन आठौं संशोधनपछि विद्यालय तहको संरचना परिवर्तन भइसकेको छ । शिक्षक सेवा आयोगले भने पुरानै संरचनाअनुसार शिक्षक पदपूर्ति गर्न लागेको छ ।

संशोधित ऐनअनुसार कक्षा १–८ आधारभूत र कक्षा ९–१२ माध्यमिक तह कायम भए पनि आयोगले पुरानै प्राथमिक, निम्नमाध्यमिक र माध्यमिक तहको संरचनाअनुसार शिक्षक पदपूर्ति गर्न लागेको हो । ‘विद्यालय तहको नयाँ संरचनाअनुसार शिक्षकको न्यूनतम शैक्षिक योग्यता स्नातक तह रहेको छ,’ शिक्षाविद् विद्यनाथ कोइराला भन्छन्, ‘तर फेरि पनि प्रावि, निमावि र मावि तहमै शिक्षक भर्ना गर्ने निर्णय गरिएछ ।’

पुरानो संरचनाअनुसार प्राथमिक तह पढाउने शिक्षकको न्यूनतम योग्यता कक्षा १२ उत्तीर्ण गरी तालिम प्राप्त गरेको हुनुपर्छ । माध्यमिक तह कक्षा १० सम्म पढाउन स्नातक पास गरेको हुनुपर्छ । यसअघि कक्षा ११ र १२ पढाउन स्नातकोत्तर उत्तीर्ण गरेको हुनुपर्ने व्यवस्था थियो । संविधानअनुसार विद्यालय तह सञ्चालन जिम्मेवारी स्थानीय सरकारको हो ।

विद्यालय व्यवस्थापनको सम्पूर्ण जिम्मेवारी उसैको भए पनि स्थायी शिक्षक भर्ना गर्ने अधिकार प्रत्यायोजन नभएको विज्ञले बताएका छन् । आयोग अध्यक्ष ताना गौतमले संविधानको धारा ३१२ अनुसार शिक्षक पदपूर्ति गरिएको बताए । ‘संविधानमा भएको व्यवस्थाअनुसार ७५ प्रतिशत आन्तरिक पदपूर्तिको परीक्षा लिइसकेका छौं,’ उनले भने, ‘खुलातर्फ २५ प्रतिशतको आवेदन लिएका छौं ।’

प्रकाशित : श्रावण १३, २०७५ ०७:२२
पूरा पढ्नुहोस्
ADVERTISEMENT
प्रतिक्रिया
पठाउनुहोस्
ADVERTISEMENT
ADVERTISEMENT
ADVERTISEMENT
ADVERTISEMENT