कंगोमा नेपाली सेना अब्बल

विकास–निर्माणमा बंगलादेशी पहिलो, नेपाली सेना दोस्रो
चन्द्रशेखर अधिकारी

बुनिया (कंगो) — संयुक्त राष्ट्रसंघले द्वन्द्वग्रस्त मुलुकमा शान्ति सेनामातहत विकास कार्यक्रम अघि बढाएको छ । विकाससम्बन्धी काम अन्य निकायले गर्ने भए पनि द्वन्द्वग्रस्त मुलुकमा शान्ति मिसन टिकाइराख्न राष्ट्रसंघले सेनालाई विकास–निर्माणमा लगाएको हो ।

Yamaha

विकाससम्बन्धी काममा बंगलादेशी सेना पहिलो स्थानमा छ भने नेपाली सेना दोस्रो । कंगोमा शान्ति स्थापनार्थ १५ वर्षदेखि नेपाली सेनाले विकास योजना बनाएर काम गरिरहेको राष्ट्रसंघीय शान्ति मिसन सेक्टर कमान्डको एक युनिटले जनाएको छ ।
नेपाली सेनाले १९ पुल, १४ कल्भर्ट, तीन विद्यालय, एउटा फुटबल ग्राउन्ड, सात ठाउँमा ठूला टेन्ट, दुई दर्जन बढी सार्वजनिक शौचालय निर्माण गरिसकेको छ ।
सन् २००३ मा पहिलोपटक नेपाली सेना कंगो आएको हो । सेनामातहतको ‘नेपाली इन्जिनियर्स कम्पनी २१’ ले कंगोमा विकास परियोजना सञ्चालन गरिरहेको छ । उसले कंगोमा २५ सय किलोमिटर कच्ची बाटो तयार गरेको छ । दर्जन विद्यालय, शौचालय, पुल, फुटबल ग्राउन्ड, विमानस्थलको धावनमार्ग मर्मतलगायत काम अघि बढाइरहेको छ । नेपालमा असजिलो स्थानमा सडक बनाएर अनुभव बटुलेका सेनाका इन्जिनियरहरूले यहाँ काम गरिरहेका छन् । नेपाली सेनाले गर्ने काममा अन्य मुलुकका सेनाले समेत सुरक्षा दिइरहेका छन् ।

विकासका काममार्फत नेपाली सेनाले यहाँका स्थानीयको मनसमेत जितिरहेको छ । फिल्डमा डोजर चलाइरहेका एक सिपाहीले भने, ‘यहाँ त झन्डा लिएर दुईतर्फको युद्धको बीचमा बस्ने मात्रै होइन रहेछ, विकास–निर्माणका काम पनि गर्नुपर्दो रहेछ ।’ समाजमा घुलमिल भएर काम गर्न राष्ट्रसंघले विकासको ‘सफ्ट पावर’ उपयोग गरिरहेको एक सैनिक अधिकारीले बताए ।

ती अधिकारीका अनुसार अन्य माध्यमबाट विकासका काम अघि बढन नसक्ने भएपछि राष्ट्रसंघले नयाँ बाटो तय गरेको हो । ‘हाम्रो कामको चाप निकै छ, कामसँगै सुरक्षा चुनौती पनि उत्तिकै छ’, आफ्नो फोर्सको कार्यकाल सकेर फर्कन लागेका लेफिेटनेन्ट कर्णेल दिव्यराज प्रसाईंले भने, ‘डोजर, डम्फर, लोडर लिएर निकै टाढासम्म जानपर्ने हुन्छ । टाढा बस्नसक्ने अवस्था नभएकाले हरेक दिन फर्केर आउनुपर्छ ।’ उनका अनुसार बिहानदेखि खटिएर बेलुका मात्रै फर्कनुपर्ने भएकाले काम सजिलो छैन । ‘सुरक्षाको चुनौती अझै छ । विद्रोही फोर्सले सधैं बाटो ढुकेर बसेको आभास हुन्छ’, उनले भने ।

नेपाली सेनाले १९ पुल, १४ कल्भर्ट, तीन विद्यालय, एउटा फुटबल ग्राउन्ड, सात ठाउँमा ठूला टेन्ट, दुई दर्जन बढी सार्वजनिक शौचालय निर्माण गरिसकेको छ । विद्यालयमा कापी–कलम किट, खाद्यान्न बाँड्नेलगायत कामसमेत सेनाले गरिरहेको छ । विकासका कारण स्थानीयको मन जितेकाले काम गर्न सहज भएको अर्का कर्णेल विजितराज रेग्मीले बताए । ‘विकासको काम सेनाले गरेको भन्न मिल्दैन, सेनाले शान्ति स्थापना कार्य सहज बनाउन जनतालाई समेत उपयोग हुने गरी काम गरेको हो’, रेग्मीले भने । सेनाले कंगोका सर्वसाधारणलाई पानी उपलब्ध गराउनेदेखि नि:शुल्क स्वास्थ्य परीक्षणका काम पनि गर्दै आएको उनले जानकारी दिए ।

नेपाली सेनाको शान्ति मिसनले अफ्रिकी मुलुक कंगोमा विकास–निर्माणका काममा पाएको यही सफलताकै कारण अन्य देशका मिसन कार्यालय बन्द गरेर फर्कंदा पनि नेपालीको भने माग बढिरहेको छ । कंगोमा नेपाल, बंगालादेश, उरुग्वे, चीन, इन्डोनेसिया र दक्षिण अफ्रिकाका सेनाले विकासको काम गरेकोमा पछिल्लो मूल्यांकनपछि उरुग्वे र दक्षिण अफ्रिकाको पूरै मिसन फर्किएको छ । बंगलादेशी र नेपाली सेनापछि कंगोमा चीन र इन्डोनेसियाका सेनाले विकासका काममा सफलता पाएका छन् ।

नेपाली सेनाले आगामी केही वर्ष गर्ने कामको वार्षिक योजना राष्ट्रसंघलाई दिइसकेको छ । राष्ट्रसंघले दिएको निर्देशनअनुरुप नै सेनाले कार्ययोजना पेस गरेको र त्यसैअनुसार काम अघि बढाउने सैनिक अधिकारीले बताएका छन् । यसमा सफलता मिलेमा नेपाली सेनाले थप केही वर्ष विकास–निर्माणसम्बन्धी काममा सहभागिता जनाउनेछ ।

प्रकाशित : श्रावण १३, २०७५ १८:२२
ADVERTISEMENT
प्रतिक्रिया
पठाउनुहोस्

मृगौला तस्करीको आरोपमा पाँचजना पक्राउ

रमेशकुमार पौडेल

चितवन — मृगौला तस्करीमा संलग्न रहेको आरोपमा चितवन प्रहरीले पाँचजनालाई पक्राउ गरेको छ ।

प्रहरीमा गुनासो गर्न आएका मृगौला तस्करहरुबाट पिडित सर्वसाधरण । तस्बिर: रमेशकुमार पौडेल/कान्तिपुर

पक्राउ पर्नेमा नुवाकोटको पञ्चकन्या गाउँपालिका–४ का ४१ वर्षीय हरि परियार भन्ने दुर्गाबहादुर दर्जी, रौतहट चन्द्रपुर नगरपालिका–४ का ३५ वर्षीय विक्रम पहारी, मकवानपुर बकैया गाउँपालिका–५ का २८ वर्षीय प्रकाश तमाङ, मोरङ बयरबन गाउँपालिका–६ का ३४ वर्षीय दिपक लिम्बु र रसुवा उत्तरगया गाउँपालिका–३ का २८ वर्षीय विशाल नेपाली रहेको चितवन प्रहरीले जनाएको छ ।

‘यी व्यक्तिहरुले गाउँ गाउँमा गएर मान्छे खोज्ने र उनीहरुलाई फकाएर दिल्ली पुर्‍याएर मिर्गौला झिकेर बेच्ने गरेको सूचनाका आधारमा हामीले पक्राउ गरेका हौँ’ चितवन जिल्ला प्रहरी कार्यालयका प्रवक्ता प्रहरी नायब उपरीक्षक प्रभुप्रसाद ढकालले भने ।

उनीहरुको पछि लागेर दिल्ली पुगको र मृगौला बेच्ने कुरा सुनेपछि भागेर आएका चितवनका एकजना पिडितको उजुरीको आधारमा प्रहरीले अनुसन्धान सुरु भएको हो ।

‘मान्छे खोजेर उनीहरुले प्रारम्भिक परीक्षण नेपालमै गर्दा रहेछन् । त्यसपछि दिल्ली पुर्‍याएर मृगौला झिक्न मिल्ने नमिल्ने परीक्षण गर्दा रहेछन् । दिल्लीमा परीक्षण गर्दा मेसो पाएपछि फुत्केर आएका एकजना व्यक्तिले दिएको सूचनाको आधारमा हामीले खोजी सुरु गरेका हौँ’ डिएसपी ढकालले भने । प्रहरीले यसका लागि मेडिकल रेस्पोन्स टिम (एमआरटी) गठन गरेको थियो ।

‘मृगौला दिने व्यक्ति खोजेर सम्पर्क गराए बापत ५० हजारदेखि एक लाख रुपैयाँसम्म कमिशन पाउने लोभमा उनीहरु यस्तो काममा लागेको पाइएको छ । भारतको बिरामी व्यक्ति जस्ले मृगौला किन्ने हो उसले ३७ लाख रुपैयाँसम्म खर्च गर्छ रे भन्ने हाम्रो प्रारम्भीक अनुसन्धानबाट खुलेको छ’ चितवन जिल्ला प्रहरी कार्यालयका प्रमुख, प्रहरी उपरीक्षक (एसपी) सुशिलसिंह राठौरले भने ।
पक्राउ परेकाहरु विरुद्ध मानव बेचबिखन तथा ओसारपोसार नियन्त्रण ऐन अन्तर्गत मुद्दा दायर गर्न अनुसन्धान भइरहेको प्रहरीले जनाएको छ । ‘यो काममा ठूलै गिरोह लागेको भन्ने आशंका हाम्रो छ । हामीले प्रहरीको केन्द्रीय अनुशन्धान ब्युरो (सिआईबी)सँग पनि सहयोग मागेका छौं’ डिएसपी ढकालले भने ।

प्रकाशित : श्रावण १३, २०७५ १८:१२
पूरा पढ्नुहोस्
ADVERTISEMENT
प्रतिक्रिया
पठाउनुहोस्
ADVERTISEMENT
ADVERTISEMENT