न्यायाधीशविरुद्ध गंगामायाको उजुरी

कृष्णप्रसादको हत्याका दोषीलाई कारबाही माग गर्दै परेको उक्त मुद्दा सुनुवाइका लागि साउन २० गतेको पेसी तोकिएको थियो । न्यायाधीशले इजलासबाहिरै मुद्दाको फैसला फलानो दिन गर्छु भन्न नपाउने जिकिर गर्दै गंगामायाले कारबाही माग गरेकी हुन् । उनले सोमबार दिएको उजुरीमा विचाराधीन मुद्दाका सम्बन्धमा पहिल्यै धारणा सुनाउने काम न्यायाधीशको आचरणविपरीत भएको र उनबाट निष्पक्ष फैसला होला भन्ने आशा हराएको उल्लेख छ ।

कानुनविदका अनुसार मुद्दाका सम्बन्धमा न्यायाधीशले इजलासबाहिर बोल्न मिल्दैन । ‘न्यायाधीशले यसरी पत्रकार सम्मेलन गरेर मुद्दा छिन्छु भन्न मिल्दैन,’ नेपाल बारका पूर्वअध्यक्ष शम्भु थापाले भने, ‘तर यति बोलेबापत न्यायाधीशलाई कारबाहीचाहिँ गरिँदैन, बरु विवादमा परेको न्यायाधीशलाई मुद्दा हेर्नचाहिँ दिनु हुँदैन । यस्तो विवाद भएपछि निजले पनि त्यो हेर्छु भन्नु हुँदैन ।’

लामो समयदेखि चल्दै आएको उक्त मुद्दामा चितवन जिल्ला अदालतले जाहेरवालामध्येका एक नूरप्रसाद अधिकारीलाई पनि इजलासमा झिकाउन आदेश गरेको थियो । नूरप्रसाद गंगामायाका जेठा छोरा हुन् र उनी चार वर्षदेखि बेपत्ता छन् । खोज्दा नभेटिएपछि अदालतले अधिकारीका नामको म्याद २०७४ फागुन १२ गते पीपलको रुखमा टाँसेको थियो । गोरखा फुजेलको आफ्नो गाउँमा म्याद तामेल नगरी अज्ञात गाउँको पीपल बोटमा यसरी म्याद तामेल गर्ने काम नै बेरीतको भएकाले अदालतले त्योसमेत बदर गर्नुपर्ने र रीतअनुसार फेरि म्याद तामेल हुनुपर्ने अधिकारीको माग छ । त्यसो नगरीकनै अदालतले एकोहोरो मुद्दा छिन्न खोजेको र न्यायाधीश शर्माले सार्वजनिक रूपमै छिन्छुसमेत भनेको हुँदा आफूहरूले निवेदन दिनुपरेको गंगामायाको जिकिर छ । जाहेरवाला छोराको हाजिरी र अदालती बयानबिनै मुद्दाको एकतर्फी फैसला गरे मान्य नहुने उनको भनाइ छ ।

उक्त निवेदन गंगामायाका तर्फबाट उनका अधिवक्ता पुष्पराज पौडेलले न्यायपरिषद्मा दर्ता गर्न ल्याएका थिए । उजुरीका साथ प्रमाणका रूपमा न्यायाधीश शर्माको पत्रकार सम्मेलनका सम्बन्धमा छापिएका समाचार पनि पेस गरिएको छ ।