जोशीको योग्यतामा पहिले नै ‘प्रश्न’ 

कृष्ण ज्ञवाली

काठमाडौँ — न्याय सम्पादनका क्रममा गम्भीर त्रुटि गरेकाले कार्यक्षमताको अभाव रहेको भनी प्रस्तावित प्रधानन्यायाधीश दीपकराज जोशीमाथि करिब १५ वर्षअघि नै न्यायिक टिप्पणी उठेको भेटिएको छ ।

गाँजा बरामद भएको लागू औषधसम्बन्धी एक मुद्दामा जोशीमाथि सर्वोच्च अदालतकै संयुक्त इजलासले न्यायिक टिप्पणी उठाएको हो ।

Yamaha

तत्कालीन कायममुकायम प्रधानन्यायाधीश भैरवप्रसाद लम्साल र न्यायाधीश बलराम केसीको संयुक्त इजलासले २०६१ पुस ११ गते उक्त मुद्दामा प्रस्तावित प्रधानन्यायाधीश जोशीका साथै अर्का न्यायाधीश विश्वनाथ जोशीमाथि छानबिन र कारबाहीका लागि न्यायिक टिप्पणी उठाएको थियो । ‘आरोपितहरूलाई निर्दोष ठहर गर्ने पर्याप्त आधार र प्रमाण नदेखिएको अवस्थामा’ फैसलामा भनिएको थियो, ‘कार्यक्षमताको प्रश्न भएको देखिएको र पुनरावेदकबाट न्यायिक टिप्पणीको मागसमेत भएकाले विश्वराज जोशी र दीपकराज जोशीको कार्यक्षमताको मूल्यांकनसमेतका लागि न्यायपरिषद् सचिवालयमा पठाउने गरी न्यायिक टिप्पणीसमेत जारी हुने ।’ यो आदेश २०६१ वैशाखको सर्वोच्च अदालत बुलेटिनमा प्रकाशित छ ।

गाँजा मुद्दाका आरोपित छाडिए
गाँजासहित पक्राउ परेका हर्कबहादुर लिम्बूविरुद्ध लागूऔषध ओसारपसारको आरोपमा मुद्दा चलेको थियो । उनले घरको आँगनबाट सेतो प्लास्टिकको बोरामा बरामद भएको गाँजा आफ्नो भएको स्वीकार गरी बयान दिएका थिए । २०५२ पुस १७ मा गाँजा बरामद भएको घटनामा आरोपित लिम्बूले अदालतमा समेत आफू गाँजासहित पक्राउ गरेको स्विकारेका थिए ।

प्रहरी प्रतिवेदनमा उनको आँगनबाट १५ किलो गाँजा बरामद भएको उल्लेख थियो तर पुनरावेदन अदालत इलामले परिणाम नखुलेको भन्ने आधार देखाई लिम्बूलाई आरोपबाट सफाइ दियो । तत्कालीन पुनरावेदनका न्यायाधीश विश्वराज जोशी र दीपकराज जोशीको इजलासले यस्तो फैसला गरेको हो । ‘हर्कबहादुर लिम्बूलाई कसुरदार कायम गर्ने पर्याप्त आधार र प्रमाण हुँदाहँुदै सफाइ दिने पुनरावेदन अदालतको फैसला मिलेको देखिएन’ सर्वोच्चको फैसलामा भनिएको छ । सर्वोच्च अदालतले लिम्बूलाई दुई वर्ष कैद र १५ हजार रुपैयाँ जरिवानाको फैसला गरेको हो ।

शाहकै फरक मत
सर्वोच्च अदालतमा न्यायाधीश सिफारिसका लागि न्यायपरिषदमा पनि जोशीको नाम सर्वसम्मत भएको थिएन । २०७१ वैशाख ९ को न्यायपरिषदको बैठकमा सर्वोच्च अदालतका तत्कालीन वरिष्ठतम न्यायाधीश रामकुमार प्रसाद शाहले जोशीको कार्यक्षमतामा प्रश्न उठाई सिफारिसमा फरक मत राखेका थिए । उनले जोशीमाथि आफ्नो फरक मत हुनुमा ५ आधार खुलाएका थिए । उनले न्यायपरिषदकै माइन्युटमा जोशीको कार्यसम्पादनको स्तर, कार्यक्षमता र विषयवस्तुको ज्ञान न्यून स्तरको रहेको भनी टिप्पणी गरेका थिए ।

‘कारागार निरीक्षणका क्रममा मुद्दाको मिसिल नै नहेरी थुनुवालाई छाड्ने गरेको’ शाहले निर्णयमा लेखेका छन्, ‘माथिल्लो अदालतबाट सचेत गराउँदा समेत त्यही काम दोहोर्‍याएको समेत कारणबाट उनमा सर्वोच्च अदालतको न्यायाधीश हुने योग्यता नदेखिएको ।’ शाहले सर्वोच्च अदालतका लागि सिफारिस गोविन्द उपाध्यायका हकमा पनि फरक मत राखेका थिए ।

जोशीलाई सर्वोच्च अदालतमा ल्याउने न्यायपरिषदमा तत्कालीन प्रधानन्यायाधीश दामोदरप्रसाद जोशी अध्यक्ष थिए ।

विवादास्पद सिफारिसका कारण तत्कालीन कानुनमन्त्री नरहरि आचार्यमाथि चौतर्फी आलोचना भएको थियो । परिषदमा सर्वोच्च अदालतका वरिष्ठतम न्यायाधीशका हैसियतले शाहसमेत सदस्य थिए । न्यायपरिषदमा दुई कानुन व्यवसायी खेमनारायण ढुंगाना र उपेन्द्रकेशरी न्यौपानेसमेत सदस्य थिए ।

प्रकाशित : श्रावण १७, २०७५ २१:३२
ADVERTISEMENT
ADVERTISEMENT
प्रतिक्रिया
पठाउनुहोस्

तारकेश्वरका गाँजा फँडानी

शिल्पा कर्ण

काठमाडौँ — करिब १५ रोपनीमा लगाइएको गाँजा खेती प्रहरीले फँडानी गरेको छ । बालाजु वृत्तबाट बिहीबार डीएसपी चिरञ्जीवी कोइरालाको नेतृत्वमा खटेको प्रहरी टोलीले तारकेश्वर नगरपालिका-१ का विभिन्न स्थानमा लगाइएको गाँजा फँडानी गरेको थियो ।

त्यहाँका ढकालचौर, डाँडागाउँ, उपल्लागाउँलगायतका स्थानमा लगाइएको गाँजा नष्ट गरिएको थियो ।

बिहान ८ बजेदेखि डेढ दर्जन प्रहरी, वडाध्यक्ष तथा वडाका जनप्रतिनिधि र स्थानीय समेतको सहयोगमा गाँजा खेती नष्ट गरिएको हो । प्रहरीको उपस्थितिपछि केहीले आफैं आफ्नो जग्गामा पर्ने गाँजाको बोट काटेका थिए । वडा नं. १ ठूलो इलाका भएकाले एकैदिन सबै क्षेत्रमा नष्ट गर्न वडाध्यक्ष विदुर सापकोटाले बताए । युवाहरुले यसअघि पनि गाँजा फँडानी अभियान चलाएको तर स्थानीयको साथ नपाएको गुनासो गरे । ढकालचौर युवा क्लबका अध्यक्ष तथा स्थानीय युवा अमर तामाङले भने, ‘जनप्रतिनिधि आइसकेपछि वडाबाट नै सूचना निकालेर यस्तो कार्य गरेमा कारवाही गरिने हो भने यो कम हुन सक्छ ।’

उक्त नगरपालिकाको विकट इलाकामा सुरक्षा निकाय र प्रशासनको आँखा छलेर गाँजा खेती र बिक्रि वितरण हुने गरेको प्रहरीको भनाइ छ । विशेषगरी शिवपुरी राष्ट्रिय निकुञ्जसँगै जोडिएका क्षेत्रमा बारीमा अन्नबाली र तरकारी सँगसँगै गाँजाका बोट छन् । स्थानीयले भने ‘आफै उम्रिने गरेको र खेती गरिएको कुरा गलत रहेको’ बताए । गाइबाख्रालाई घाँस भनि काट्ने नगरेको उनीहरुको भनाइ छ । डीएसपी कोइरालाले भने, ‘लागूऔषधले यहाँको समाजमा मात्र नभइ देशकै युवालाई दिग्भ्रमीत बनाइरहको सन्दर्भमा यसलाई न्युनीकरण गर्न यस्तो अभियान चलाएका हौं ।’ उनले पटक पटक फँडानी गर्दा पनि फेरि खेती गरेको पाइएमा जग्गाधनीलाई नै कारवाही गर्न पछि नपर्ने बताए ।

वडाध्यक्ष तथा नगरपालिकाका प्रवक्ता सापकोटाले यस वर्षको असारदेखि तेस्रो पटक यो क्षेत्रमा यस कार्यका लागि आएको बताए । ‘यहाँ सबैजसो स्थानमा गाँजा खेती देख्न सकिन्छ,’ सापकोटाले भने, ‘गाईवस्तु पाल्ने भएकाले उनीहरूलाई ख्वाउन पनि यो काम लाग्छ । तर गाँजा खेती अवैध भएकाले हामीले समय समयमा फँडानी गर्दै आएका छौं ।’ यस वडाका तिमल्सिना टोल, देवीथान, नेपालथोक, जगात जस्ता स्थानमा यसको खेती छ ।

प्रकाशित : श्रावण १७, २०७५ २१:२४
पूरा पढ्नुहोस्
ADVERTISEMENT
ADVERTISEMENT
प्रतिक्रिया
पठाउनुहोस्
ADVERTISEMENT
ADVERTISEMENT
ADVERTISEMENT
ADVERTISEMENT
ADVERTISEMENT
ADVERTISEMENT