'कांग्रेसले अल्झाए महाअभियोग'

‘सुनुवाइ समितिलाई निर्णय गर्ने अधिकार हुन्छ’
दुर्गा खनाल

काठमाडौँ — सत्तारूढ नेकपाका सांसदहरूले प्रधानन्यायाधीशमा सिफारिस दीपकराज जोशीको विषयमा निर्णय गर्ने प्रक्रियामा प्रतिपक्षी कांग्रेसले अल्झाइरहे उनीविरुद्ध महाअभियोग प्रस्ताव ल्याउन पार्टीभित्र लबिइङ गरेका छन् ।

संसदीय सुनुवाइ समितिको बैठक पटक–पटक सरिरहेको र समितिभित्रको दुई तिहाइ मतलाई कांग्रेसले बन्धक बनाइरहेको उनीहरूको निष्कर्ष छ । सर्वसम्मत निर्णय गर्ने भन्दै समिति बैठक तीनपल्ट सरिसकेको छ । शुक्रबार पनि बैठक बोलाइएको छ ।

‘संसद्को प्रक्रियामा प्रवेश गर्न कांग्रेसले मानिरहेको छैन, समितिमा छलफलै गर्न नपाउने अवस्था छ, यो ठीक छैन,’ सुनुवाइ समिति सदस्य एवं नेकपाका सांसद सुमन प्याकुरेलले भने, ‘शुक्रबारको बैठक पनि यस्तै भयो भने जोशीविरुद्ध महाअभियोग प्रस्ताव अघि बढाउनुपर्छ, पार्टीले यसतर्फ प्रक्रिया थाल्नुपर्छ ।’

Yamaha

समितिको प्रक्रियामा अवरोध भइरहेको भन्दै प्रधानमन्त्री केपी ओलीले पनि असन्तुष्टि जनाएका छन् । उनले संसदीय समितिमा छलफल गर्नै नहुने जस्तो गरी अवरोध गरिएको बताएका छन् । तुलसीलाल स्मृति दिवसको अवसरमा बिहीबार राजधानीमा आयोजित कार्यक्रममा ओलीले भने, ‘सुनुवाइ समितिलाई सोधपुछ, छलफल र निर्णय गर्ने अधिकार हुन्छ । तर प्रश्न सोध्नै पाइँदैन भनेझैं गरी अवरुद्ध गर्न खोजिँदै छ ।’

ओलीले सांसदहरूसँग जोशीको विषयमा बुझ्न व्यक्तिगत र सामूहिक रूपमा पनि भेटिरहेका छन् । सांसदहरूले सबै तथ्य पेस गरेपछि उनी जोशीलाई अनुमोदन गर्न नहुने निष्कर्षमा पुगेको स्रोतले बतायो ।

नेकपाका सांसद समितिबाट जोशीको नाम अस्वीकृत गर्ने निर्णयमा पुगेपछि कांग्रेस भने झनै रुष्ट भएको छ । जोशीलाई अनुमोदन नगरे बैठक नै बहिष्कार गर्ने उसले संकेत दिएको छ ।

के छ महाअभियोग प्रक्रिया ?
संविधानको धारा १०१ को उपधारा २ मा ‘संविधान र कानुनको गम्भीर उल्लंघन गरेको, कार्यक्षमताको अभाव वा खराब आचरण भएको वा इमानदारीपूर्वक पदीय कर्तव्य पालना नगरेको वा आचारसंहिताको गम्भीर उल्लंघन गरेका कारणले पदीय जिम्मेवारी पूरा गर्न नसकेको आधार’ मा प्रतिनिधिसभाका एक चौथाइ सांसदले महाअभियोग प्रस्ताव पेस गर्न सक्ने व्यवस्था छ ।

महाअभियोग प्रस्ताव पेस भए जोशी तत्काल निलम्बनमा पर्नेछन् । महाअभियोग दर्तापछि त्यसको आधार र कारण भए/नभएको छानबिन गरी सिफारिस गर्न प्रतिनिधिसभामा ११ सदस्यीय महाअभियोग सिफारिस समिति गठन हुन्छ । समितिले छानबिन गरी प्रतिनिधिसभामा सिफारिस पेस गरेपछि प्रस्ताव पारित भए पदमुक्त व्यक्तिले कुनै सुविधा लिन र भविष्यमा सार्वजनिक पदमा रहन पाउँदैन ।

Esewa Pasal

प्रकाशित : श्रावण १८, २०७५ ०६:५५
ADVERTISEMENT
प्रतिक्रिया
पठाउनुहोस्

एक विद्यार्थी एक तरकारी

प्रतीक्षा काफ्ले

स्याङ्जा — कालीगण्डकी गाउँपालिका ६, दब्छेस्थित धु्रवज्योति माविको कक्षा ८ मा अध्ययनरत प्रकृति भट्टराई स्कुलमा तरकारी खेती गर्छिन् । उनी मात्रै होइन, कक्षाका सबैजना पालैपालो तरकारी बारीमा खटिन्छन् । उनीहरूले स्कुलको बारीमा थरीथरी तरकारी फलाएका छन् ।

विद्यार्थीलाई व्यावहारिक ज्ञान दिन विद्यालयले आफ्नै परिसरमा तरकारी बारी बनाएको छ । त्यहाँ विद्यार्थीले थरीथरी तरकारी फलाएका छन् । ‘कक्षामा पढेका विषय व्यवहारमा उतार्न स्कुलकै बारीमा जान्छौं, कक्षाको बीचमा तरकारी बारीमा काम गर्दा रमाइलो लाग्छ, सिकिन्छ पनि’ प्रकृति भन्छिन् ।


उनीसँगै पढ्ने अस्मिता राना पनि कक्षा खाली भएका बेला बारीमै बिताउँछिन् । पाँच वर्षदेखि विद्यार्थीलाई बारीमै लगेर प्रयोगात्मक शिक्षा दिएको प्रध्यानाध्यापक हीराबहादुर गाहाले बताए । विद्यालयले ‘एक विद्यार्थी एक तरकारी’ उत्पादनको नारा बनाएर प्रयोगात्मक कक्षा सुरु गरेको हो । मावि तहसम्मका कुल ३ सय ११ विद्यार्थीले बारीमा कम्तीमा एकवटा तरकारीको बिरुवा रोपेर स्याहार गर्नुपर्छ । कहिलकाहीँ उनीहरू तरकारी स्याहार्न विद्यालय समयभन्दा छिटो स्कुल आउँछन् । ‘सामूहिक रूपमा लगाएको तरकारी खेतीले उनीहरूलाई हौसला मिलेको छ,’ प्रधानाध्यापक गाहाले भने, ‘पढेकाले कलम मात्र होइन, कुटो, कोदालो पनि चलाउन जरुरी छ । सबैले कृषि पेसालाई सम्मान गर्नुपर्छ ।’


अभिभावक पूर्णबहादुर विकले स्कुलले तरकारी खेती गर्न सिकाएकामा खुसी व्यक्त गरे । ‘स्कुलमा सिकेर छोरीले घरमा तरकारी लगाएकी छन्,’ उनले भने । ०३४ सालमा स्थापना भएको यो विद्यालयमा जनजाति र दलित समुदायका विद्यार्थी धेरै छन् । कक्षा नर्सरीदेखि कक्षा ११ सम्म कुल विद्यार्थीमध्ये ब्राह्मण ९ जना मात्र रहेको विद्यालयले जनाएको छ ।


विद्यालयमा ८६ जना दलित र बाँकी सबै जनजाति रहेको प्रध्यानाध्यापक गाहाले जानकारी दिए । शिक्षा मन्त्रालयले क्षेत्रीयस्तरमा उत्कृष्ट छानिएको यस विद्यालयमा व्यावहारिक र सैद्धान्तिकसंँगै गुणस्तरीय शिक्षा दिएको प्रधानाध्यापक गाहाले दाबी गरे । यो विद्यालयमा अंग्रेजी माध्यमबाट पढाइ हुने भएकाले विद्यार्थीको संख्या बढदै गएको उनी बताउँछन् ।
जिल्ला शिक्षा विकास तथा इकाई कार्यालयले विद्यालयमा सूचना र सञ्चार प्रविधि (आईसीटी) माध्यमबाट पढाइ हुने भएकाले गुणस्तर राम्रो भएको बताएको छ । ‘एक विद्यार्थी एक फूल’ यो विद्यालयको अर्को विशेषता हो । त्यसैले यो विद्यालयमा फूलबारी पनि चिटिक्क छ । यो विद्यालयको भूतपूर्व विद्यार्थी मञ्चले सामाजिक सञ्जालको माध्यमबाट रकम संकलन गरी एम्बुलेन्स खरिद गरेको छ । त्यो एम्बुलेन्सको आम्दानीबाट अंग्रेजी शिक्षकको व्यवस्था गरेको छ ।

प्रकाशित : श्रावण १८, २०७५ ०६:५३
पूरा पढ्नुहोस्
ADVERTISEMENT
प्रतिक्रिया
पठाउनुहोस्
ADVERTISEMENT
ADVERTISEMENT