पूर्वाञ्चल विश्वविद्यालय: निर्देशन मिचेर सम्बन्धन तयारी

कान्तिपुर संवाददाता

विराटनगर — पूर्वाञ्चल विश्वविद्यालयले सरकारी निर्देशनविपरीत सम्बन्धन खोल्ने तयारी गरेको छ । सरकारले कुनै पनि विश्वविद्याललाई आंगिक र निजी कलेजलाई सम्बन्धन दिन रोक लगाएको छ ।

यही विषयलाई लिएर उपकुलपति प्राडा घनश्यामलाल दाससँग विज्ञान तथा प्रविधि संकायका डिन शुभनारायण पाठक र चिकित्साशास्त्र संकायका डिन डा. सिद्धार्थ कोइरालाको मतभेद भएको विश्वविद्यालय स्रोतले जनाएको छ । दुवै डिनले लिँदै आएको प्रवेश परीक्षाको जिम्मेवारी खोसेर विश्वविद्यालयले परीक्षा नियन्त्रक सूर्यप्रसाद संग्रौलालाई दिएको छ ।


विश्वविद्यालयले ब्याचलर कार्यक्रम सञ्चालन गरिरहेका आंगिक र निजी कलेजलाई चिकित्साशास्त्र, विज्ञान तथा प्रविधि, कानुन र कला संकायको स्नातकोत्तर कार्यक्रमको सम्बन्धन दिन गृहकार्य गरिरहेको स्रोतको दाबी छ । ‘कुनलाई दिने र कुनलाई नदिने भन्नेमा उपकुलपति र डिनबीच मतभेद भएको हो,’ स्रोतले भन्यो, ‘सम्बन्धन दिँदा आर्थिक चलखेल हुने भएकाले कुरा नमिलेको हो ।’

Yamaha


शैक्षिक कार्यक्रम सञ्चालन गरिरहेका कलेजलाई स्नातकोत्तर कार्यक्रमको अनुमति दिन विश्वविद्यालयले दुई वर्षदेखि गृहकार्य गरिरहेको स्वीकार्दै उपकुलपति दासले अहिले पनि प्रयासरत रहेको बताए । ‘यसका लागि प्रयास दुई खुड्किला अघि बढिसकेको छ,’ उनले भने ‘अन्तिम खुड्किलो पार गर्न बाँकी छ ।’ विज्ञान तथा प्रविधि संकाय र चिकित्साशास्त्र संकायको प्रवेश परीक्षाको जिम्मेवारी परीक्षा नियन्त्रकलाई दिइएको पनि उनले स्वीकारे । दुई संकायको प्रवेश परीक्षामा निकै खर्च हुने भएकाले कटौतीका लागि त्यसो गरिएको दासको दाबी छ ।


प्रवेश परीक्षाको जिम्मेवारी परीक्षा नियन्त्रकलाई सहमतिमै दिएको विज्ञान तथा प्रविधि संकायका डिन पाठकले बताए । ‘सम्बन्धन दिन सरकारले नै रोक लगाएको छ,’ उनले भने, ‘त्यसैले यसबारे उपकुलपतिसँग कुनै मतभेद छैन ।’


विश्वविद्यालयले विज्ञान तथा प्रविधि संकायअन्तर्गतको वन तथा विज्ञानमा विद्यार्थी नै नभए पनि एकै व्यक्तिलाई सहडिन र क्याम्पस प्रमुख नियुक्त गरेको छ । उक्त संकायमा अहिले एकजना पनि विद्यार्थी छैनन् ।


विश्वविद्यालय स्रोतका अनुसार अभयकुमार साहलाई सहडिन र क्याम्पस प्रमुख नियुक्त गरिएको छ । वातावरण व्यवस्थापन संकायमा स्नातकोत्तर र वन विज्ञान संकायमा ब्याचलर शैक्षक कार्यक्रम सञ्चालन गर्ने विश्वविद्यालयको तयारी छ । ‘दुवै संकायमा अहिले एकै जना विद्यार्थी भर्ना नभए पनि विश्वविद्यालयले क्याम्पस प्रमुख र सहडिन नियुक्त गरेको हो,’ स्रोतले भन्यो । उक्त शैक्षिक कार्यक्रम सञ्चालनका लागि सहडिन र क्याम्पस प्रमुख नियुक्त गरिएको डिन पाठकको भनाइ छ । ‘दुवै कार्यक्रममा चाँडै विद्यार्थी भर्ना गर्न क्याम्पसको पूर्वाधार र पुस्तकालय व्यवस्थापनका लागि नियुक्त गरिएको हो,’ उनले भने ।

प्रकाशित : श्रावण १८, २०७५ ०७:५१
ADVERTISEMENT
ADVERTISEMENT
प्रतिक्रिया
पठाउनुहोस्
ADVERTISEMENT

सुन अभावमा मनकामना पुनर्निर्माण रोकियो

कान्तिपुर संवाददाता

गोरखा — छनामा जलप लगाउन तीन किलो सुन अपुग भएपछि मनकामना मन्दिर पुनर्निर्माणको काम रोकिएको छ । गजुर र छानामा जलप लगाउन मात्र हालसम्म १५ किलो सुन खर्च भइसकेको जीर्णोद्घार समितिका संयोजक नरेन्द्रबाबु श्रेष्ठले बताए ।

‘छानामा मात्र साढे १६ किलो सुन लाग्ने अनुमान थियो,’ उनले भने, ‘१५ किलो खरिद गरेका थियौँ । त्यो पनि सकियो ।’ उनका अनुसार पुरातत्त्व विभागबाट निकासा भएको चार करोड रुपैयाँले सात किलो र काठ तथा मन्दिरको आन्तरिक स्रोतबाट आठ किलो सुन खरिद गरिएको थियो । सुन नपुगेपछि डेढ सातादेखि काम रोकिएको श्रेष्ठले बताए । ‘काम गर्ने मान्छेले पनि रेस्ट भने । सुन पनि पुगेन,’ उनले भने, ‘अब सुन ल्याएर एक साताभित्रै काम सुरु गरिहाल्छौं । मन्दिरको मात्र काम गर्न अब १५/२० दिन लाग्ला ।’ सबै संरचना तयार भइसकेकाले अब १० जनामात्रै कामदार खटिएका छन् ।


मन्दिर पहिल्यै ६ इञ्च ढल्किएको थियो । २०७२ वैशाखको भूकम्पले थप ढल्किएपछि जगैदेखि पुनर्निर्माण थालिएको हो । मूलढोका, कंकालको मूर्ति, तोरण, भित्रपट्टिको सिलिङ र छानाछेउको मुकुटमा पनि सुनको जलप लगाउने तयारी छ । ‘अपुग भएको सुन इस्टिमेटभन्दा बाहिरको हो,’ श्रेष्ठले भने । तल्लो छानामा जलप लगाउने काम लगभग सकिएको उनले बताए । प्रक्रियाअनुसार पुरातत्त्व विभागसँग स्वीकृति लिएर राष्ट्र बैंकबाट सुन खरिद गर्नुपर्छ । ‘असार मसान्तको क्लोजिङले गर्दा पनि सुन ल्याउन सकेनौं,’ श्रेष्ठले भने, ‘अब आइतबार–सोमबारतिर काठमाडौं गएर सुन ल्याउँछौं ।’ बाँकी सुन किन्न डेढ करोड रुपैयाँ लाग्ने अनुमान छ । आन्तरिक स्रोतबाटै लगानी गर्ने समितिले जनाएको छ । छानामा तामाको पाता बिछ्याएर सुनको जलप लगाइएको हो ।


‘गजुर मर्मतमा पाँच लाखको अनुमान गरिएकोमा २३ लाख लाग्यो,’ श्रेष्ठले भने, ‘गजुरमा प्वाल परेको रहेछ, त्यसैले सोचेभन्दा बढी लाग्यो ।’ सबै खर्च विवरण सबै पुरातत्त्व विभागलाई बुझाइने उनको भनाइ छ । आँगनमा ढुंगा छाप्ने र पश्चिम पटि टेवा पर्खाल उठाउनेलगायतका काम पनि बाँकी छ ।


मन्दिर जीर्णोद्घारका लागि भक्तजनबाटै हालसम्म आठ करोड रुपैयाँ संकलन भएको छ भने काम सुरु भएयता करिब १० करोड खर्च भइसकेको छ । २०६८ सालमा पुनर्निर्माणका लागि लागत इस्टिमेट गर्दा करिब आठ करोड खर्च लाग्ने अनुमान गरिएको थियो । सामान र कामदारको ज्यालादर महँगिँदा लागत बढेको समितिले जनाएको छ ।

प्रकाशित : श्रावण १८, २०७५ ०७:५१
पूरा पढ्नुहोस्
ADVERTISEMENT
प्रतिक्रिया
पठाउनुहोस्
ADVERTISEMENT
ADVERTISEMENT
ADVERTISEMENT
ADVERTISEMENT