चौरजहारी अस्पतालमा तनाव, तीन राउन्ड हवाई फायर
काठमाडौँ — चौरजहारी नगरपालिका–१, मा सञ्चालित चौरजहारी अस्पतालमा तोडफोड भएको छ । अस्पतालमा उपचारत एक महिलाको लापरबाहीको कारण मृत्यु भएको आरोप लगाउँद मृतकका आफन्तले आइतबार अस्पतालमा तोडफोड गरेका हुन् ।
जाजरकोट भेरी नगरपालिका १३ कुदुकी २८ वर्षीया यशोधा मल्ल आरसीको उपचारको क्रममा मृत्यु भएपछि आक्रोशित उनका आफन्तले अस्पतालको इमर्जेन्सी, ढोका तथा काउन्टरमा तोडफोड गरेका हुन् । अहिले पनि चौरजहारी अस्पतालमा मृतकका आफन्तले ढुङ्गामुढा गरिरहेका छन् । अस्पताल परिसरमा प्रहरी छ । प्रदर्शनकारीले प्रहरीतर्फ ढुङ्गामुढा गरिरहेकाले प्रहरीले तीन राउन्ड हवाई फायरसमेत गरेको छ । प्रहरीको उपस्थिति संख्या कम भएकाले अस्पतालमा थप क्षति हुने र भर्ना भएका अन्य बिरामी समस्यामा पर्ने सम्भावना बढेको अस्पतालले बताएको छ । अस्पतालमा स्वास्थ्यकर्मी नभएकाले अन्य बिरामीको हेरचाहमा समस्या देखिएको छ ।
गत शुक्रबार अस्पतालमा भर्ना भएकी यशोधा मृगौला र पत्थरीको बिरामी थिइन् । रोगले च्यापेपछि उनका आफन्तले जिल्ला बाहिर लिन चाहेका थिए । उनलाई जिल्ला बाहिर लिन मगाइएको हेलिकप्टर अवतरण भइसकेपछि मात्रै बिरामीको मृत्यु भइसकेको खबर आफन्तलाई दिइएको थियो । मृत्युको खबर पाउनासाथ आक्रोशित आफन्तले अस्पतालमा तोडफोड गरेका हुन् ।
उनीहरुले गलत सुई (इजिेक्सन) लगाइएपछि बिरामीको मृत्यु भएको आरोप लगाएका छन् । अस्पतालका डाक्टर कालेव बुढाले स्वास्थ्यकर्मीको लापरबाहीले बिरामीको मृत्यु नभएको दाबी गरे ।
प्रकाशित : श्रावण २०, २०७५ २०:३९