प्रदेश १ को नाम किरात नै रहनेछ : दाहाल

कान्तिपुर संवाददाता

काठमाडौँ — पूर्वप्रधानमन्त्री तथा नेकपाका अध्यक्ष पुष्पकमल दाहालले प्रदेश नं.१ को नाम किरात नै रहने बताएका छन् । किरात राई यायोक्खाको ३१औं स्थापना दिवसको उद्घाटन गर्दै मंगलबार उक्त विचार व्यक्त गरेका हुन् ।

‘नेपालको इतिहास किरातबिना सम्भव छैन,’ मुलुकको इतिहास र सभ्यतामा यलम्बरसँग जोडिएको उल्लेख गर्दै अध्यक्ष दाहालले भने, ‘किरात शब्द इतिहास, सभ्यता, संस्कृति र जीवन प्रणालीसँग जोडिन्छ । त्यसैले एक नम्बर प्रदेशको नामाकरण किरात नै हुनुपर्छ भन्नेबारे पार्टी र सरकारमा गम्भीर रुपमा छलफलमा छौं । प्रधानमन्त्रीसँग सोच मिलेनको महसुस गरेको छु ।’

Yamaha

मुलुकमा लामो समयसम्म सामन्ती शासकले उत्पीडन गरेविरुद्ध भएको 'जनयुद्ध'मा हजारौंले ज्यानको बलिदान गर्नुपरेको उल्लेख गर्दै उनले मधेस, पहाड र हिमाल मिलेर गरेको संघर्षबाट संघीय लोकतान्त्रिक गणतन्त्र प्राप्त भएको बताए । ‘बाइसे, चौबिसे राज्य नामेट पार्न सफल पृथ्वीनारायण शाह त ओल्लो किरात, माझकिरात र पल्लो किरातलाई मान्न बाध्य भए भने हामी कम्युनिस्टले नेपाली सभ्यतासित जोडिएका किरातलाई कदापि मेट्ने छैनौं,’ किराती समुदायको बृहत् जमघटमा उनले भने ‘यदि कसैले किरातको अपव्याख्या, अपमान गरे म तपाईंहरुको साथमा रहेर लडिरहनेछु ।’

त्यसैगरी संघीय संसद्का सांसदहरु सुरेशकुमार राई, हेमकुमार राई, प्रमिला राईलगायतले प्रदेश नं.१ लाई किरात नामकरणको पक्षमा विचार व्यक्त गरेका थिए । यायोक्खाका अध्यक्ष तिलक राई र सल्लाहकार दुर्गा राई, नेपाल आदिवासी जनजाति महासंघका उपाध्यक्ष गोविन्द छन्त्याललगायत बोलेका थिए ।

त्यस अवसरमा विद्यावारिधी प्राप्त मन्दिप राई, सगरमाथा आरोही गजुरमान राई र राई समुदायको पहिलो महिला पाइलट सृष्टि राईलाई सम्मान गरिएको थियो । साथै, विभिन्न क्षेत्रका प्रतिभाहरुलाई पुरस्कार र छात्रवृत्तिसमेत प्रदान गरिएको थियो ।

प्रकाशित : श्रावण २२, २०७५ २०:२२
ADVERTISEMENT
प्रतिक्रिया
पठाउनुहोस्

स्मार्ट लाइसेन्सका लागि कहिलेसम्म कुर्ने ?

दीपेन्द्र विष्ट

काठमाडौँ — बुटवलका दीपक आचार्यले एक वर्षअघि यातायात कार्यालय बुटवलमा ‘स्मार्ट लाइसेन्स’ का लागि आवेदन दर्ता गराएका थिए ।

मंगलबार यातायात व्यवस्था विभाग कार्यालय मीनभवनमा भेटिएका उनले भने, ‘अस्ट्रेलिया जाने समय आइसक्यो, अझै लाइसेन्स पाएको छैन । पाँच महिनापछि आउँछ भनेका थिए, एक वर्षसम्म पाइएन । विभागका कर्मचारीले केही दिनमा आउँछ भनेका छन् ।’

यातायात कार्यालय धाउँदा–धाउँदा हैरान भइसकेको उनले गुनासो गरे । ‘यातायात कार्यालयले सेवाग्राहीलाई किन दु:ख दिइरहेको होला ?’ उनले भने, ‘यति सानो काममा पनि सरकारले जनतालाई सेवा दिन सक्दैन भने अरू के आशा गर्ने ?’

ललितपुर लेलेका सुजन तामाङले पनि स्मार्ट लाइसेन्स लागि आवेदन दिएको ९ महिना भइसक्यो । यातायात कार्यालय एकान्तकुनाबाट आवेदन दिएका तामाङलाई विभागका कर्मचारीले स्मार्ट लाइसेन्स लिन अझै एक महिना कुर्न भनेका छन् । ‘एकान्तकुना जाँदा विभागबाट स्मार्ट लाइसेन्स छापिएर आएको छैन भन्छन्,’ उनले भने ।

तीन वर्षअघि भौतिक पूर्वाधार तथा यातायात मन्त्रालयले खुला प्रतिस्पर्धाबाट भारतको मद्रास सेक्युरिटी प्रिन्टर्स कम्पनीलाई स्मार्ट लाइसेन्स छाप्ने जिम्मा दिएको थियो ।

प्रिन्टर्सले १५ करोड रुपैयाँको लागतमा ‘स्मार्ट कार्ड’ छाप्ने तीनवटा लेजर इन्ग्रेडिङ मेसिन, हार्डवेयर सामग्री र स्मार्ट कार्ड छाप्ने कागज ल्याएको छ । विभागले २०७२ मंसिर २० देखि स्मार्ट कार्डको दरखास्त लिएर पुस ३ देखि वितरण गर्न थालेको हो ।

प्रिन्टर्सले दैनिक ४ सयभन्दा बढी स्मार्ट कार्ड प्रिन्ट गर्न सकेको छैन । तीनवटा उपकरणबाट कार्ड प्रिन्ट भइरहे पनि माग थेग्न नसकेको विभागका प्रवक्ता तुल्सीराम अर्यालले बताए । उनका अनुसार मुलुकभरबाट दैनिक ४ हजार कार्डको माग आउँछ ।

प्रिन्टर्स कम्पनीले अहिलेसम्म दुई लाखभन्दा बढी स्मार्ट कार्ड छापेको छ । विभागका अनुसार अझै ५ लाख कार्ड प्रिन्ट गर्न बाँकी छ । ‘गुनासो निकै बढेको छ, त्यसभन्दा बढी प्रिन्ट गर्ने मेसिनको क्षमता नै छैन,’ अर्यालले भने ।

उनका अनुसार भदौ पहिलो साता बढी क्षमताको मेसिनका लागि विभागले टेन्डर आहवान गर्ने तयारी गरेको छ । हाल १३ वटा यातायात कार्यालयबाट ‘स्मार्ट कार्ड’ वितरण भइरहेको छ ।

५ वर्षमा हस्तलिखित चालक अनुमति पत्रलाई ‘स्मार्ट कार्ड’ मा परिवर्तन गरिसक्ने विभागको योजना थियो । मागअनुसारको आपूर्ति हुन नसकेकाले ५ वर्षमा ‘स्मार्ट कार्ड’ वितरण सक्न मुस्किल देखिएको विभागका अधिकारी नै बताउँछन् ।

‘पाँच वर्षमध्ये करिब अढाई वर्षभन्दा बढी सकिन लागेको छ,’ ती अधिकारीले भने, ‘बाँकी नवीकरण र नयाँ बन्ने सबैलाई ‘स्मार्ट कार्ड’ वितरण गर्नु चुनौतीपूर्ण छ ।’

प्रकाशित : श्रावण २२, २०७५ २०:०१
पूरा पढ्नुहोस्
ADVERTISEMENT
ADVERTISEMENT
प्रतिक्रिया
पठाउनुहोस्
ADVERTISEMENT
ADVERTISEMENT
ADVERTISEMENT