महेन्द्र राजमार्गमा खाल्टैखाल्टा

नारायण शर्मा

काठमाडौँ — व्यस्त महेन्द्रराजमार्गको दाउन्ने गैंडाकोट खण्डमा खाल्टैखाल्टा छन् । बढी तौल बोकेका गाडी चौबिसै घण्टा ओहोरदोहार गर्ने त्यो सडकमा लगातार वर्षातका कारण सडकमा खाल्टैखाल्टा बनेको हो ।

महेन्द्रराजमार्गमा खाल्टो परेको २४ घण्टा भित्रै टालीसक्नुपर्ने भएपनि सडक डिभिजन कार्यालयको हेल्चेक्राईंले महिनौसम्म पनि खाल्टाहरु पुरिएको छैन । त्यसले दुर्घटनाको जोखिम बढेको छ भने यात्रुले सास्ती भोगिरहेका छन् ।

खासगरी दाउन्ने, दुम्किवास बजार, होङसी सिमेन्टमा आउजाउ गर्ने चोक र सबैजसो पेट्रोलपम्प अघिल्तीरको राजमार्गको खाल्टा पानी जमेर हिलाम्य छ । दुम्किवास बजारमा मुख्य राजमार्गमा ठुल्ठुला खाल्टा परेको ७ महिना बितिसक्दापनि मर्मत सम्भारमा कसैले चासो देखाएका छैनन् ।

विनयी त्रिवेणी गाउँपालिकाले खाल्टा पुर्न १ लाख रकम बिनियोजन गरेर काम गरेको थियो । ग्राभल हालेर खाल्टा पुर्न खोजिएपनि लगातारको वर्षात् र ठुला खाल्टा भएकाले सम्याउन सकेन । दुम्किवास खण्डको ५ सय मिटर खण्डभन्दा बढी क्षेत्रमा ठुल्ठुला खाल्टामा पानी जमेर हिलाम्य भएको छ ।


Yamaha

‘पानी जमेकामारण राजमार्गमा हुईंकिने गाडीले पैदलयात्रुलाई हिलाम्य बनाउने गरेको छ,’ दुम्किाबासका स्थानीय दानबहादुर चौधरी भन्छन्, ‘भत्केको ७ महिना भैसक्यो सडकले चासो दिएको छैन ।’ खाल्टोमा पानी जमेका कारण राजमार्गमा जाम पनि हुने गरको छ ।

जिल्ला ट्राफिक प्रहरी निरिक्षक लक्ष्मणबहादुर शाही सडक कार्यलयको बेवास्ताले सडक समयमै नबनाउँदा दुर्घटना समेत भएको बताउँछन् । ठुला खाल्टाकै कारण साउन दाश्रो साता एउटा कार उछिट्टीएर दुर्घटना भएको उनले बताए । खाल्टोका कारण साउनमा ३ वटा दुर्घटना भएको छ ।

सडकमा देखिएका खाल्टो र पानी जमेको स्थान मर्मतकालागि सडक डिभिजन कार्यालयमा पटकपटक पत्राचार गरेपनि वास्ता नभएको उनको भनाई छ । ‘बजारको सौन्दर्यता बिग्रीएको छ यात्रुले सास्ती भोगेका छन,’ उनले भने ।

डिभिजन सडक कार्यालय बर्दघाटका ईन्जिनियर युवराज पाण्डेले सडक पुरानो भएकाले भत्किनु स्वभाविक भएको बताए । उनले भने, ‘४ लेनको सडक चाँडो बन्ने भएकाले एकैचोटि उसैले गरोस् भनेकाले हिलाम्य भएको हो ।’ वर्षातमा सडक बनाउन खोजेपनि नबन्ने भएको र थोरै पुरेर नहुने भएकाले सडक क्षतिग्रस्त भएको दाबी गरे ।

सडकका उपभोक्ता बढेको र धेरै भार बोकेका गाडी थेग्न सक्ने सडक नबनेको उनले दाबी गरे । २४ घण्टा भित्र बनाउनुपर्ने भएपनि बजेट अभावका कारण बनाउन नसकिएको उनको तर्क थियो । भैरहवा–बुटवल खण्ड झैं ४ लेनको सडक चाँडो ठेक्का लाग्ला भनेर पनि बनाउन ढिलो गरिएको उनको भनाई छ । राजमार्गमा बाक्लो पीच गर्नुपर्ने भएपनि बजेट अभावले पतलो गर्नुपर्ने बाध्यताका कारण पनि सडक छिटो भत्किने गरेको पाण्डेको दाबी छ ।

प्रकाशित : श्रावण २४, २०७५ १२:५३
ADVERTISEMENT
प्रतिक्रिया
पठाउनुहोस्

पहिरो पीडितलाई राहत हस्तान्तरण

भीमबहादुर सिंह

जाजरकोट — गत आइतबार पहिरोमा आफन्त गुमाएका परिवारलाई एक लाखका दरले राहत सहयोग उपलब्ध गराएको छ । प्रमुख जिल्ला अधिकारी ललितकुमार बस्नेतले पहिरोमा ज्यान गुमाएका ९ जनाका आफन्तलाई उक्त राहत उपलब्ध गराएका हुन् । 

पहिरो पीडित परिवारलाई राहत हस्तान्तरण गर्दै जाजरकोटका प्रजिअ ललितकुमार बस्नेत । तस्बिर : भीमबहादुर सिंह/कान्तिपुर । 

भेरी नगरपालिका–३ ठाँटीबजारमा पहिरोले दुई घर पुरिँदा मृत्यु भएका ८ बालबालिकासहित ९ जनाका पीडित परिवारलाई उक्त राहत दिएको हो । प्रजिअ बस्नेतले पीडितहरुले आश्रय लिएको बृद्धाश्रममा पुगेर चेक हस्तान्तरण गरेका हुन् । पहिरोले घर पुरिएर विस्थापित भएका पत्रकार तीर्थ बोहरा र गोपाल सुनारलाई तत्काल व्यवस्थापनका लागि १०/१० हजार नगदसमेत हस्तान्तरण गरेको प्रजिअ बस्नेतले बताए ।

त्यस्तै कर्णाली प्रदेश सरकारले पीडित परिवारलाई एक मृतकको २५ हजार दरले रकम उपलब्ध गराएको छ । प्रदेश सरकारले २० हजार बराबरका खाद्य सामग्री पनि वितरण गरेको प्रजिअ बस्नेतले बताए ।
भेरी नगर कार्यपालिकाले मृतकका आफन्तलाई ३० हजार र कुशे गाँउपालिकाले पनि ४ जना मृतकका आफन्तलाई २५ हजारका दरले राहत उपलब्ध गराउने निर्णय गरेको छ । भेरी नपाले घाइते लालबहादुर लुहारको उपचारका लागि २० हजार दिएको प्रमुख प्रशासकीय अधिकृत डिल्लीराज बेल्बासेले बताए ।
कुशे गापाले पीडित परिवारलाई तत्काल राहतका लागि भाडाँकुडाँ, दाल, चामल, नून, तेल, कम्बल लगायतका सामग्री वितरण गरेको उपाध्यक्ष रामछाया शाहीले बताइन् ।

त्यसैगरी नेपाल निजामती कर्मचारी संगठन जाजरकोटले प्रतिपरिवारलाई २५ केजी चामल, २ केजी दाल, २ केजी चिनी, २ केजी चिउरा, १ लिटर तेल, १ केजी नुन र १ कम्बलका दरले राहात उपलब्ध गराएको बताए । नेपाल रेडक्रस, उद्योग बाणिज्य संघ लगायत संघसंस्थाले पनि राहत सामग्री उपलब्ध गराएका छन् । पत्रकार बोहरालाई नेपाल पत्रकार महासंघ जाजरकोट शाखाले १० हजार, अर्थसरोकार अनलाइनले ५ हजार ५ सय ५५, मिरमिरे अनलाइनले ५ हजार १ सय र गर्जनपोष्ट साप्ताहिकले ५ हजार ५ सय सहयोग गरेका छन् ।

पहिरोले पुरिएर ९ जनाको मृत्यु भएको थियो । घटनामा परेका लालबहादुर लुहारको जीवित उद्धार गरिएको थियो । पहिरोले घर भत्किँदा पुरिएका १२ वर्षीय गोविन्द परियारको शव अझै निकाल्न सकिएको छैन ।

प्रकाशित : श्रावण २४, २०७५ ११:४९
पूरा पढ्नुहोस्
ADVERTISEMENT
प्रतिक्रिया
पठाउनुहोस्
ADVERTISEMENT
ADVERTISEMENT
ADVERTISEMENT
ADVERTISEMENT
ADVERTISEMENT