फोनिजले स्थापना दिवस मनायो, चार पत्रकार पुरस्कृत
काठमाडौँ — नेपाल आदिवासी जनजाति पत्रकार महासंघ (फोनिज)ले आइतबार १९औं स्थापना दिवस मनाएको छ ।
काठमाडौंमा आइतबार आयोजित समारोहमा पत्रकारलाई पुरस्कार वितरणलगायत कार्यक्रम गरी फोनिजले स्थापना दिवस मनाएको हो । उक्त अवसरमा ‘आदिवासी जनजाति राष्ट्रिय पत्रकारिता पुरस्कार–२०७५’ बाट चार पत्रकार पुरस्कृत भए ।
पुरस्कृत हुनेमा पत्रकार उजिर मगर (अनलाइन), भैरव आङला (टेलिभिजन), छेटु शेर्पा (छापा) र विमला चौधरी (रेडियो) छन् । उनीहरुलाई सञ्चार तथा सूचना प्रविधिमन्त्री गोकुल बाँस्कोटाले पुरस्कार हस्तान्तरण गरेका हुन् । पुरस्कार राशि जनही ४० हजार रुपैयाँ रहेको छ ।
कार्यक्रममा सम्बोधन गर्दै सञ्चारमन्त्री बाँस्कोटाले पत्रकारिता क्षेत्रको समग्र विकासमा सरकार लागिरहेको बताए । उनले निर्बाध रुपमा पत्रकारिता गर्न आग्रह गर्दै प्रेस स्वतन्त्रतामा सरकारले काँडेतार नलगाउने प्रस्टिकरण दिए । स्वतन्त्रताको नाममा केही मिडियाले विषयवस्तु बंग्याएर 'ट्वीस्ट जर्नालिजम्' गरेकोमा आपत्ति जनाउँदै उनले स्वच्छ, मर्यादित र जिम्मेवार पत्रकारिता गर्न आग्रह गरे ।
सरकारी सबै सञ्चारमाध्यम समावेशी रहेको दाबी गर्दै मन्त्री बाँस्कोटाले निजी समाचारमाध्यममा समावेशी हुन नसकेको बताए ।
प्रकाशित : श्रावण २७, २०७५ १६:४५