भारतद्वारा ३० एम्बुलेन्स र ६ बस सहयोग

कान्तिपुर संवाददाता

काठमाडौँ — भारतको ७२औं स्वतन्त्रता दिवसका अवसरमा नेपालस्थित भारतीय दूतावासले एम्बुलेन्स, बस र शैक्षिक सामग्री प्रदान गरेको छ । दूतावासले विभिन्न अस्पताल, गैरनाफामूलक परोपकारी संस्थालाई ३० वटा एम्बुलेन्स र ६ वटा बस सहयोग गरेको हो ।

६८ पुस्तकालय तथा सबै प्रदेशमा फैलिएका शैक्षिक संस्थालाई १७ लाखबराबरको पुस्तक वितरणसमेत गरिएको दूतावासले जनाएको छ । राजदूत मंजिभसिंह पुरीले सहयोगले भारत सरकारको नेपालको सामाजिक–सांस्कृतिक विकासको यात्रामा साझेदारी गर्ने प्रतिबद्धता प्रमाणित गरेको बताए ।

भारत सरकारले नेपालका ७७ जिल्लाका विभिन्न अस्पताल, गैरनाफामूलक परोपकारी संस्था तथा शैक्षिक संस्थालाई हालसम्म ६ सय ९२ एम्बुलेन्स र १ सय ३६ बस उपहारस्वरुप प्रदान गरिसकेको दूतावासले जनाएको छ । पाकिस्तानले पनि मंगलबार स्वतन्त्रता दिवस मनाउँदै नेपालीलाई शैक्षिक छात्रबृत्ति सहयोग घोषणा गरेको थियो ।

प्रकाशित : श्रावण ३०, २०७५ १९:०३
प्रतिक्रिया
पठाउनुहोस्

पहिरोमा पुरिएर सासु बुहारीको मृत्यु

प्रकाश बराल

बागलुङ — केही दिनदेखि लगातार परेको वर्षाका कारण पहिरो खस्दा निसीखोलामा एकै घरका दुई जनाको पुरिएर मृत्यु भएको छ ।

निसीखोला–३ को बोहोरा गाउँस्थित धुसौरा भन्ने स्थानमा खसेको पहिरोले स्थानीय मानबहादुर शाहीको घर पुरिदा शाहीकी ६५ वर्षीया श्रीमती धनकुमारी र ३५ वर्षीया बुहारी डल्ली शाही पुरिएको ईलाका प्रहरी कार्यालय बुर्तिवाङका प्रहरी निरीक्षक ओमप्रकाश यादवले बताए।

मृत्यु हुने सासु बुहारी हुन्। पुरिएपछि स्थानीय बासिन्दा, प्रहरी र सेनाको खोजीपछि शव निकालिएको थियो। बिहान पुरिएका उनीहरुको दिउँसो साँढे तीन बजे मात्र शव भेटिएको थियो।मृतक डल्लीका श्रीमान भारतमा रोजगारी गर्छन्।

पहिरोले पुरिएका शाहीका ५ वर्षीय नाती विनोद भने सकुशल भेटिएका छन्। ‘टाँड परेर पुुरिएकाले उनी बाँचेका रहेछन्’ बोहोरा गाउँ स्वास्थ्य चौकीका प्रमुख टोपबहादुर चन्दले भने, ‘बालकको सबै स्वास्थ्य परीक्षण गर्दा केही भएको छैन।’ अहिले पनि बच्चा खेलिरहेको उनले बताए।

मंगलबार राति नै बोहोरा गाउँ र देविस्थानमा खसेका अरु पहिरोले थप ६ घरमा क्षति पुगेको छ। केही घरपरिवार पहिरोको डरले बिस्थापित भएर आफन्तकोमा बसेका छन्।

घटनास्थल सदरमुकामदेखि १ सय २० किमी पश्चिममा पर्छ।

दुई सातादेखि बिजुली बन्दः
निसीखोलाकै विभिन्न वडामा पहिरोका कारण बिजुली अवरुद्ध बनेको छ। चन्दा संकलन गरेर गाउँलेले बनाएका निसीखोला पहिलो र दोस्रो लघुविद्युत आयोजना बन्द भएपछि २ हजार घरमा बिद्युत अवरुद्ध भएको छ।

बिजुली नभएपछि उनीहरुले मोबाइल सेमत चार्ज गर्न पाएका छैनन्। मोबाइल चार्ज नहुँदा वर्षातमा भएका घटनाको सूचना दिन नसकेको गाउलेहरुले गुनासो गरेका छन्।

प्रकाशित : श्रावण ३०, २०७५ १८:५८
पूरा पढ्नुहोस्
प्रतिक्रिया
पठाउनुहोस्