सुन तस्करी र हत्या मुद्दा : अभियुक्तलाई थुनामा राख्ने जिल्लाको आदेश उच्च अदालतद्वारा सदर

तीन अभियुक्तको सुनुवाइ सकियो, २७ जनाको बाँकी
माधव घिमिरे, विनोद भण्डारी

विराटनगर — संगठित अपराध, सुन तस्करी र सनम शाक्य हत्या मुद्दाका तीन अभियुक्तलाई थुनामा राख्ने जिल्ला अदालतको आदेश उच्च अदालत मोरङले सदर गरेको छ । जिल्ला अदालत मोरङको थुनछेकको आदेशअनुकूल हुने गरी बिहीबार उच्च अदालतले यस्तो आदेश गरेको हो ।

Yamaha

अभियुक्तहरू पुण्यप्रसाद लामा, सम्बिर तोलाङगे र राजन कुमारको हकमा जिल्लाको आदेश बेरीतको नरहेको उच्च अदालतको ठहर छ ।

मुख्य न्यायाधीश कुलरत्न भुर्तेल र उमेशकुमार सिंहको इजलासले लामा र तोलाङगेको मुद्दामा सुनुवाइ गरेको थियो । त्यसैगरी हरिप्रसाद भण्डारी र ऋषिराम दवाडीको इजलासले राजन कुमारको मुद्दा सुनुवाइ गरेको थियो ।

अभियुक्तका तर्फबाट कानुन व्यवसायीहरू रमिता महर्जन, उद्धवचन्द्र घिमिरेलगायतले बहस गरेका थिए । त्यस्तै सरकारका तर्फबाट न्यायाधिवक्ताहरू पुण्यप्रसाद पाठक र पदम वस्तीले बहस गरेका थिए ।

यसैबीच, अभियुक्तमध्येका पूर्वडीआईजी गोविन्द निरौला, एसएसपी दिवेश लोहनी, एसपी विकासराज खनाल, डीएसपी सञ्जय राउत र हेमन्त गौतमको मुद्दामा भने बेग्लाबेग्लै ‘कैफियत प्रतिवेदन’ पेस गर्न आदेश दिइएको छ । न्यायाधीश थिरबहादुर कार्की र जनक पाण्डेको इजलासले यस्तो आदेश दिएको हो । जिल्ला अदालतले यसअघि उनीहरूको एउटै प्रतिवेदन पेस गरेको थियो ।

अर्का अभियुक्त राजन थापाको पनि बिहीबारै पेसी रहेकामा समय अभावका कारण अर्को साता सरेको रजिस्ट्रार नारायणप्रसाद रेग्मीले बताए ।

यसअघि जिल्ला न्यायाधीश नारायणप्रसाद शर्माको इजलासले प्रारम्भिक रूपमा ३१ जना अभियुक्तलाई तत्काल देखिएको प्रमाणका आधारमा दोषी देखिएको भन्दै पुर्पक्षका लागि थुनामा राख्ने आदेश दिएको थियो ।

यसअघि पुर्पक्ष थुनामा रहेका ३१ मध्ये ३० अभियुक्तले जिल्लाको आदेश बेरीतको भएको भन्दै उच्च अदालतमा निवेदन दिएका थिए । निवेदन परेपछि उच्च अदालतले जिल्ला अदालतबाट उनीहरूको मुद्दासम्बन्धी सम्पूर्ण बेहोरासहितको प्रतिवेदन मगाएको थियो । उच्च अदालतले मुलुकी ऐन अदालती बन्दोबस्तको १७ नम्बर महलअन्तर्गतको यो मुद्दा प्रत्येक बिहीबार मात्र हेर्दै आएको छ ।

रजिस्ट्रार रेग्मीका अनुसार अब बाँकी अभियुक्तको हकमा साताको दुईपटक पेसी चढाउने प्रयास भइरहेको छ । निवेदन दर्तापछि यसअघि चारपटक पेसीमा राखिएको थियो । तर न्यायाधीशहरूको संख्या कम भएकोलगायत प्राविधिक कारणले मिति सारिँदै आएको थियो । साढे ३३ किलो सुन तस्करी र सनम शाक्य हत्या प्रकरणमा सरकारी वकिलको कार्यालयले वैशाख तेस्रो साता मुख्य कारोबारी गोरे भनिने चूडामणि उप्रेतीसहित ६३ जनाविरुद्ध जिल्ला अदालत मोरङमा मुद्दा दर्ता गरेको थियो ।

यो मुद्दामा १७ अर्ब १ करोड ८० लाख ७१ हजार ४ सय १३ रुपैयाँ ९० पैसा बिगो मागदाबी गरिएको छ ।३३ मध्ये ३१ जनालाई जिल्ला अदालतले पुर्पक्ष थुनामा राख्न आदेश दिएको थियो । एक जनालाई धरौटी र अर्का एक जनालाई सादा तारेखमा छाड्ने आदेश भएको थियो ।

प्रकाशित : श्रावण ३१, २०७५ २१:०३
ADVERTISEMENT
प्रतिक्रिया
पठाउनुहोस्
ADVERTISEMENT

उपभोक्तालाई नहर हस्तान्तरण 

माधव घिमिरे, विनोद भण्डारी

सितागञ्ज(सुनसरी) — विश्व बैंकले ३८ करोड खर्च गरेर सुनसरी मोरङ सिँचाई योजनाका दुईवटा शाखा नहरको अतिआवश्यक संरचनाको मर्मत र सुधार गरी सञ्चालनकालागि असार दोस्रो सता स्थानीय उपभोक्तालाई हस्तान्तरण गरेको छ । 

विश्व बैंकले सिँचाई तथा जलस्रोत व्यवस्थापन आयोजना अन्र्तगत योजनाको सुनसरीमा पर्ने सितागञ्ज र रामगञ्ज शाखा नहरको अतिआवश्यक स्थानमा लाइनिङ सहित र ढुङगा तारजालीले ब्याक प्रोटेक्सन निर्माण गरेर सञ्चालनकालागि स्थानीय उपभोक्तालाई हस्तान्तरण गरेको हो।

सञ्चालन र मर्मतकालागि स्थानीय उपभोक्तालाई हस्तान्तरण गरिएको योजनाका शाखा नहर मध्ये सितागञ्ज शाखाले सुनसरीको ७ हजार ६ सय र रामगञ्ज शाखाले ६ हजार ८ सय ४८ हेक्टर क्षेत्रमा सिँचाई पुर्‍याउदै आएको छ।

योजनाका इन्जिनियर प्रदीप वान्तवाका अनुसार दुवै शाखा नहरको अतिआवश्यक संरचना मर्मत सहित नहरवाट किसानको खेतसम्म पानी पुर्‍याउने अढाई सय भन्दाबढी वाटर कोष समेत मर्मत गरी सञ्चालनकालागि प्राविधिक र उपकरणसहित उपभोक्तालाई बुझाइएको हो।

विश्व बैंकले २०७२ भदौदेखि उक्त दुई शाखा नहरको अतिआवश्यक संरचनाको पहिलो, दोस्रो र तेस्रो चरणमा मर्मत र सुधार कार्य सुरुगरी गत असार १५ गते विश्व धान दिवसका उपलक्ष्यमा उपभोक्तालाई प्राविधिक र उपकरण हस्तान्तरण गरेको इन्जिनियर वान्तवाले बताए।

हस्तान्तरणपछि उपभोक्ता समितिले नहरको मर्मत सम्भार आफै गरेर त्यसका उपशाखा समेत आफैँले सञ्चालन गर्नुपर्ने हुन्छ। त्यसकालागि विश्व बैंकले दुईवटै शाखाका उपभोक्ता समितिलाई कार्यालय भवन सहित एकएक थान जेसीभी, स्काभेटर ट्याक्टर, मोटरसाइकल, साइकल र कम्प्युटर प्रिन्टर उपलब्ध गराएको छ।

विश्व बैंककै लगानीमा चिनीयाँ निर्माण कम्पनीले मुलुककै सबैभन्दा ठूलो सुनसरी मोरङ सिचाई योजनाका संरचना निर्माण भएको थियो। सुनसरीको चतरामा मुहान भएको योजनाको मूल नहरको लम्बाई ५३ किलोमिटर र यसका २१ वटा शाखा छन्।

सुनसरी र मोरङको ६८ हजार हेक्टर क्षेत्रफलमा सिँचाई पुर्‍याउँदै आएको योजनाका सबै संरचनाको आयु सकिसकेकाले योजनाले हरेक वर्ष मर्मत र टालटुल गरेर सञ्चालन गर्दै आएको छ। योजनाको नहरमा वर्खायाममा ६० क्यूमेक्स पानी बग्छ।

प्रकाशित : असार २५, २०७५ १५:३३
पूरा पढ्नुहोस्
ADVERTISEMENT
प्रतिक्रिया
पठाउनुहोस्
ADVERTISEMENT
ADVERTISEMENT
ADVERTISEMENT