दीपकराज जोशीले घोषणा गरे आफैंलाई ‘कामू प्रधानन्यायाधीश’

कान्तिपुर संवाददाता

काठमाडौँ — प्रधानन्यायाधीशमा अस्विकृत भएपछि १५ दिन बिदामा रहेका सर्वोच्च अदालतका वरिष्ठतम न्यायाधीश दीपकराज जोशीले आफैंलाई ‘कायममुकायम प्रधानन्यायाधीश’ भनी दाबी गरेका छन् । उनी गत साउन १८ गते संसदीय सुनुवाईबाट प्रधानन्यायाधीशमा अस्विकृत भएका थिए । 

हाल बिदामा रहेका जोशीले देवानी तथा फौजदारी संहिता जारी हुने पूर्वसन्ध्यामा कामू प्रधानन्यायाधीशका हैसियतले शुभकामना मन्तव्य पठाएका हुन् । प्रधानन्यायाधीशको स्वकीय सचिवालयको तर्फबाट भन्दै अधिवक्ता प्रविन्द्रराज जोशीले सञ्चारकर्मीहरुलाई शुभकामना मन्तव्यको प्रति इमेल पठाएका हुन् । उनी प्रधानन्यायाधीशमा अस्विकृत जोशीका छोरा समेत हुन् ।

Yamaha


प्रधानन्यायाधीशको स्वकीय सचिवालय, बालुवाटारका नामबाट जारी विज्ञप्तिमा संविधान र कानूनको उचित पालना हुनुपर्ने भनी व्यंग्य मिश्रित टिप्पणी गरेका छन् । शुभकामना मन्तव्यमा उनले भनेका छन्, ‘संविधान, कानूनको उचित पालना नगरी आफूखुसी गरिने व्याख्याको कुसंस्कार कायमै रहेमा जतिसुकै नया संविधान, कानून बनेपनि हामी न्यायको गन्तव्यमा पुग्न सक्दैनौं ।’ करिव डेढ पेज लामो वक्तव्यमा जोशीले आफूलाई कामू प्रधानन्यायाधीश तथा न्यायपरिषदका अध्यक्ष भनी परिचय गराएका छन् ।

सर्वोच्च अदालतको बेवसाइटमा कायम मुकायम प्रधानन्यायाधीश भनी ओमप्रकाश मिश्रको नाम उल्लेख छ । न्यायाधीशहरुको नामावलीको सूचीमा जोशीको नाम पहिलो क्रममा रहेपनि उनलाई न्यायाधीशका रुपमा मात्रै परिचय गराइएको छ । संसदीय सुनुवाई समितिले न्यायाधीश हुने धरातल समेत नरहेको कारण र आधार देखाई जोशीको नाम अस्विकृत गरेपनि उनी राजीनामा नदिई हाल १५ दिनको बिदामा रहेका छन् ।

प्रकाशित : भाद्र १, २०७५ १८:५६
ADVERTISEMENT
प्रतिक्रिया
पठाउनुहोस्
ADVERTISEMENT
ADVERTISEMENT

एक सातामा सवा ५ अर्ब छलीका मुद्दा

कृष्ण ज्ञवाली

काठमाडौँ — सरकारले करिब आधा दर्जन घटनामा ५ अर्ब २२ करोड रुपैयाँ राजस्व छली भएको दाबीसहित विभिन्न जिल्ला अदालतमा मुद्दा दायर गरेको छ ।

एक साताको अवधिमा राजस्व अनुसन्धान विभागले काठमाडौं, रूपन्देही, पर्सा र बारा जिल्ला अदालतमा मुद्दा दायर गरेको हो । घटनामा ६ जना सरकारी कर्मचारीसमेत मुछिएका छन् ।

व्यापारी विनोदकुमार गुप्ता र उनी संलग्न फर्म तथा कम्पनीहरूबाट भएको राजस्व छलीका दुई मुद्दा शुक्रबार जिल्ला अदालत काठमाडौंमा दर्ता गरिएको विभागका महानिर्देशक दीर्घराज मैनालीले जनाए । ‘उनीलगायत परिवार सदस्य र फर्ममा संलग्न व्यक्तिहरूमाथि आयकर छली र नक्कली प्रज्ञापनपत्र बनाएको आरोप छ,’ मैनालीले भने, ‘एउटा ट्रकमा ल्याइएको सामानमाथि अनुसन्धान हुँदा २२ जनामाथि १० करोड रुपैयाँभन्दा बढीको बिगो मागदाबी छ । अन्य घटनाको पनि अनुसन्धान गर्दैछौं ।’

हिमालयन कार्गोका नाममा सामान ढुवानी/पैठारी गर्ने गुप्ता भारतीय नागरिक हुन् । उनले आव २०६५/६६ देखि हरेक वर्ष वार्षिक ५ हजार रुपैयाँ आयकर बुझाउँदै आएका थिए । पछिल्लो तीन वर्ष भने एक रुपैयाँ पनि आयकर नतिरेको विभाग स्रोतले बतायो । विभागले उनको खाता अनुसन्धान हुँदा हरेक वर्ष ५० करोडदेखि एक अर्ब रुपैयाँसम्म कारोबार भएको भेट्यो । विभागले गुप्तासहित पत्नी मधुकुमारीविरुद्ध ५४ करोड ४२ लाख ४७ हजार ७५२ रुपैयाँ बिगो र त्यति नै जरिवाना माग गरेको छ । गुप्ता दम्पतीमाथि मात्रै २ अर्ब ७२ करोड १२ लाख ३८ हजार ७६० रुपैयाँ बिगो र जरिवाना मागदाबी भएको देखिन्छ । उनीहरूमाथि ३ वर्ष कैद हुनुपर्ने मागदाबी अभियोगपत्रमा गरिएको छ ।

गुप्ताले शृंखलाबद्ध रूपमा राजस्व छली र भन्सार चुहावट गरेको थाहा पाएपछि विभागले उनीमाथि निगरानीसमेत बढायो । दूध र घ्युको नक्कली भन्सार प्रज्ञापनपत्र बनाई सामान ल्याउँदै गरेको अवस्थामा उनको गाडी बरामद भयो । २३ लाख २० हजार रुपैयाँको उक्त सामान ल्याउन २२ जना संलग्न रहेको विभागको दाबी छ । गुप्ताका दाइ रवीन्द्र र वीरेन्द्र, छोरा राहुल, श्रीमती मधुलाई राजस्वले ४६ लाख ४० हजार रुपैयाँका दरले बिगो र जरिवाना मागदाबी गरेको छ ।

उक्त छलीमा रवीन्द्र वनवारी माता ट्रेडर्समा जोडिएको फेला परेको विभागस्रोतले जनायो । गुप्ताको फर्ममा काम गर्ने र अन्य सहयोगी गरी १० जना उक्त मुद्दामा मुछिएका छन् । गुप्ता गत असोजमा समेत नक्कली राजस्व स्टिकरसहित पक्राउ परेका थिए । तर बन्दी प्रत्यक्षीकरणको निवेदनमार्फत सर्वोच्च अदालतका न्यायाधीश पुरुषोत्तम भण्डारीको एकल इजलासले २०७४ असोज १८ मा दिएको आदेशमा उनी रिहा भएका थिए । उनीमाथि वीरगन्जको राजस्व कार्यालयले जरिवानासमेत गरेको थियो ।

नक्कली प्रज्ञापनपत्रका आधारमा सामान ल्याउन सहयोग गरेको आरोपमा भन्सार एजेन्टसहित ६ जना कर्मचारीविरुद्ध समेत राजस्वले मुद्दा दायर गरेको छ । प्रमुख भन्सार अधिकृत जनार्दन आचार्य, भन्सार अधिकृत बटुकृष्ण अधिकारी, भन्सार जाँचकी वसन्तकुमार सुवेदी, कम्प्युटर अधिकृत चन्द्रबहादुर क्षत्री, नासु जितबहादुर श्रेष्ठ र भन्सार संकेत निरीक्षक रामबहादुर थापाविरुद्ध राजस्वले जिल्ला अदालत काठमाडौंमा मुद्दा दायर गरेको छ । अख्तियारले सक्रियता देखाए यी ६ कर्मचारीमाथि भ्रष्टाचार आरोपमा समेत छानबिन हुन सक्छ । दूध र घ्युको नक्कली प्रज्ञापनपत्र तयार गरिएको मुद्दाको कुल बिगोमात्रै १० करोड २० लाख रुपैयाँँ छ ।

राजस्व अनुसन्धान क्षेत्रीय कार्यालय बुटवलले अर्कै व्यक्तिको कागजात लिई फर्म खडा गरी राजस्व चुहावट गरेको आरोपमा ४ जनाविरुद्ध मुद्दा दायर गरेको छ । भन्सार एजेन्ट नवराजप्रसाद उपाध्याय खनालले कमला रसाइलीको कागजात लिई शिव इन्टरप्राइजेज नामक फर्म खडा गरेको भेटिएको हो । उक्त कम्पनीका सञ्चालकमाथि भन्सार चोरी पैठारी, नक्कली भ्याट बिल र झूटा कागजातका आधारमा राजस्व छलेको आरोप छ । रसाइली सामान्य टेलरिङ सञ्चालन गरी बस्ने व्यक्ति रहेको अनुसन्धानका क्रममा खुलेको राजस्वको दाबी छ ।

यो घटनामा एक अर्ब २३ करोड ४५ लाख ५८ हजार ७२८ रुपैयाँ बिगो मागदाबी गरिएको छ । उनीहरूमाथि तीन वर्ष कैदको मागदाबी छ ।

राजस्वले मण्डला अजिमा इन्टरप्राइजेज खडा गरी राजस्व छलेको आरोपमा शशांक खनाल र राजकुमार गुप्तामाथि ६ करोड ७९ लाख ४६ हजार ३१९ रुपैयाँ बिगो मागदाबी गरेको छ । राजस्वले ६ किलो र ३ किलो सुन तस्करीको आरोपमा ५० करोड ५५ लाख रुपैयाँ बिगो मागदाबी गरेको छ । उक्त घटनामा तेन्जिङ तामाङ, दीपककुमार मौर्यसहित ६ जनालाई प्रतिवादी बनाई काठमाडौं जिल्ला अदालतमा मुद्दा दायर भएको छ ।

कालो हिराको भन्सार चोरी निकासीको आरोपमा ४४ करोड ६५ लाख ४४ हजार रुपैयाँ बिगो मागदाबी गरी रमेश रजकसहित ८ जनामाथि मुद्दा चलाइएको छ ।

छाला उल्लेख गरी मरिचको चोरीनिकासी गरेको आरोपमा सञ्जय अग्रवालसहित ४ जनामाथि ६ करोड ७३ लाख रुपैयाँ बिगो र जरिवाना मागदाबी गरिएको छ । उनीहरूमाथि डेढ वर्षका दरले कैद सजाय हुनुपर्ने राजस्वको दाबी छ । रसुवा र वीरगन्ज भन्सार नाकाबाट सेन्डिल, वाई–फाई राउटर, विभिन्न कपडालगायतका सामानको नाममा एक करोड ८४ हजार रुपैयाँको बिगो मागदाबी भएको छ ।

सुन तस्करी र फोटोकपी मेसिनको राजस्व छलेको आरोपमा राजस्वले करिब साढे ७ करोड रुपैयाँको बिगो मागदाबी गरेर ४ जनामाथि मुद्दा दायर गरेको छ ।

प्रकाशित : भाद्र १, २०७५ १८:४३
पूरा पढ्नुहोस्
ADVERTISEMENT
प्रतिक्रिया
पठाउनुहोस्
ADVERTISEMENT
ADVERTISEMENT
ADVERTISEMENT
ADVERTISEMENT