एकीकरण टुंग्याउँदै नेकपा

कान्तिपुर संवाददाता

काठमाडौँ — तीन महिनाअघि केन्द्रमा पार्टी एकता गरेको नेकपाले यसै साताभित्र तल्लो तहको एकीकरण टुंग्याउने भएको छ । त्यसका लागि दिनहुँजसो प्रदेश र जिल्लाको नेतृत्व मिलाउन कार्यदलका बैठक बसिरहेका छन् ।

केन्द्रीय नेता र सांसद अन्य काम छोडेर एकता प्रक्रिया टुंग्याउन व्यस्त भएका छन् । धेरै केन्द्रीय नेता र सांसद जिल्ला पुगेका छन् । नेतृत्वका लागि तत्कालीन एमाले र माओवादी पक्षको होडबाजी छ । आफ्नो पक्षका नेतालाई नेतृत्वमा पुर्‍याउन केन्द्रीय नेताले लबिइङ थालेका छन् ।

नेतृत्वको दाबी बढेपछि साउन मसान्तसम्म समय तोकिए पनि सबै प्रदेश र जिल्लाले टुंगो लगाउन सकेनन् । त्यसैले कार्यदललाई ५ गतेभित्र सबै मिलाइसक्न समय थपिएको थियो । उक्त समयसमेत घर्किन लागेपछि जिल्ला र प्रदेशका नेताहरू राजधानीभित्रै र बाहिर दिनहुँ बैठक गरिरहेका छन् ।

Yamaha

‘स्थायी समितिको आउँदो बैठकले एकता प्रस्ताव अनुमोदन गर्ने भएकाले जिल्लाको एकीकरण प्रस्ताव तयार गर्ने काम भइरहेको छ,’ नेतृत्व मिलाउने कार्यदलका सदस्य एवं नेकपा केन्द्रीय सदस्य विशाल भट्टराईले भने, ‘दुवै पक्षलाई मिलाउनुपर्ने भएकाले केही समय लागेको हो ।’ नेकपाले आउँदोभदौ ८ र ९ गते स्थायी समिति बैठक बोलाएको छ ।

स्थायी समितिमा प्रदेश, जिल्ला र जनवर्गीय संगठनको एकता गर्न गठित कार्यदलका प्रतिवेदन पेस हुनेछन् । ती प्रतिवेदनको आधारमा नेतृत्व र कार्यसमितिले अनुमोदन गर्नेछ । नेताहरूका अनुसार एकीकरण प्रस्ताव तयार भएका सिन्धुपाल्चोक, ओखलढुंगालगायत जिल्लामा विवाद देखिएको छ ।

विवाद भएका स्थानमा केन्द्रबाट नेतृत्व टुंगो लगाउने गरी प्रस्ताव पठाउने तयारी जिल्लाहरूले गरेका छन् । विद्यार्थी संगठनले एकीकरण प्रस्ताव तयार गरेको छ तर नेतृत्व कसको भन्ने टुंगिन सकेको छैन । त्यस्तै युवा संघ, मजदुर संगठनलगायतमा पनि एकीकरणपछिको नेतृत्वबारे टुंगो लाग्न सकेको छैन । नेकपाभित्र दुई दर्जन भ्रातृ संगठन छन् ।

स्थायी समितिले केन्द्र र प्रदेश सरकार एवं संसदको पदीय जिम्मेवारीमा रहेकालाई जिल्ला र प्रदेशको इन्चार्ज, अध्यक्ष र सचिवको जिम्मेवारी नदिने मापदण्ड बनाएको छ । तर यो मापदण्डभन्दा बाहिर रहेकै नेताहरूको संख्या ठूलो भएकाले जिम्मेवारी टुंग्याउन कार्यदललाई सकस छ ।

Esewa Pasal

प्रकाशित : भाद्र ४, २०७५ ०९:४८
ADVERTISEMENT
प्रतिक्रिया
पठाउनुहोस्
ADVERTISEMENT

पुल बगेपछि उत्तरी नाका ठप्प

कृष्ण थापा

गेर्खु (नुवाकोट) — रसुवा र नुवाकोट जोड्ने पासाङ ल्हामु राजमार्गको त्रिशूली–बेत्रावती खण्डको गेर्खु खोलाको पक्की पुल शनिबार रातिको बाढीले बगाउँदा आउजाउ बन्द भएको छ ।

नुवाकोटको पासाङ ल्हामु मार्गको त्रिशूली–वेत्रावती खण्डमा भत्किएको गेर्खु खोला पुल । शिशु बोकेर गन्तव्यतर्फ जाँदै महिला । तस्बिर : कृष्ण

उक्त पुल विदुर नगरपालिका १ र १० जोड्ने गेर्खु खोलामा ०३६/३७ सालमा बनेको थियो । चीन जोडिने हाल चल्तीको नाका रसुवागढी जाने पुल भत्किँदा रसुवासँग आवतजावत बन्द भएको हो । पुलको दायाँ पिलर बाढीले हानेर भाँचिएको छ । बायाँपट्टि काटेर पुलै भत्किएको छ । स्ल्याब भाँचिएको छ ।

आइतबार बिहान साढे १ बजेतिरको बाढीले पुल बगाएको स्थानीयले बताए । पुलनजिकको बालुवा धुने खानीमा बसेका १२ कामदारले बाढी पसेपछि भागेर ज्यान बचाएका थिए ।

‘मध्य रातमा गड्याङ्ङ गरेर सुतिरहेको ठाउँमा पानी पस्यो,’ एक कामदारले भने, ‘भागेर सबैले ज्यान बचायौं । एकछिन ढिलो भए भेलले त्रिशूलीमा मिसाउँथ्यो ।’ पुलबाटै सदरमुकाम विदुर ल्याइएको खानेपानीमा समेत समस्या भएको छ । विदुरबाट गेर्खुटारस्थित ओममाने पब्लिक विद्यालय जाने विद्यार्थी र शिक्षकलाई समेत कठिनाइ भएको छ ।

उक्त पुल हुँदै दैनिक साना–ठूला गरी ३ हजार सवारी आवतजवात गर्ने जिल्ला ट्राफिक प्रमुख शम्भु बहादुर अधिकारीले बताए । बस, सामान बोक्ने कन्टेनर, खाद्यान्न, निर्माण सामग्री बोक्ने सानाठूला गाडी यही पुल हुँदै वारपार गर्थे ।

‘गेर्खु खोलामा भेल आउन छाडेको छैन,’ जिल्ला प्रहरी प्रमुख वसन्तबहादुर कुँवरले भने, ‘सवारी आउजाउ गर्ने बनाउन ३/४ दिनभन्दा बढी लाग्ला ।’ जोखिम मोलेर आवतजावत गर्न कसैलाई नदिएको उनले बताए ।

चीनसँगको उत्तरी नाकामा रसुवागढी हुँदै केरुङबाट सामान आयातनिर्यात गर्नै समस्या भएको छ । त्रिशूलीपारि हुँदै साबिक मनकामना जाने सडकसमेत अवरुद्ध छ । रसुवा–काठमाडौंका सयौं गाडी बीचबाटोमै अलपत्र छन् । स्थानीय प्रशासन, प्रहरी, गल्छी–मैलुङ–स्याफ्रुबेंसी–रसुवागढी सडक आयोजनाका ठेकेदारले पुलको निरीक्षण गरेका थिए । विदुर १० गेर्खुटारभन्दा एक किलोमिटरमाथि गेर्खु खोलाको बाढीले ७ घरमा क्षति पुर्‍याएको छ । ‘स्थानीयलाई बस्नै समस्या भएको छ,’ वडाध्यक्ष गणेशकुमार नेपालले भने, ‘ती घर चर्केका छन् ।

बाढी आउन रोकिएको छैन ।’ जनैपूर्णिमा पर्वमा लाग्ने गोसाइँकुण्ड मेला सुरु भएको छ । तीर्थयात्री रसुवा आउने क्रम जारी छ । उक्त पुल बगाएपछि मेलाका यात्रीलाई समस्या हुने स्थानीयले बताए ।

प्रकाशित : भाद्र ४, २०७५ ०९:३८
पूरा पढ्नुहोस्
ADVERTISEMENT
प्रतिक्रिया
पठाउनुहोस्
ADVERTISEMENT
ADVERTISEMENT