प्रधानमन्त्रीद्वारा गाडी नकिन्न जनप्रतिनिधिलाई निर्देशन

‘कर नउठाई कहाँबाट ल्याएर दिनु ?’
लीलावल्लभ घिमिरे

विराटनगर — प्रधानमन्त्री केपी ओलीले प्रदेश र स्थानीय तहका प्रतिनिधिलाई गाडी नकिन्न निर्देशन दिएका छन् । मंगलबार नेकपा प्रदेश कमिटीको कार्यकर्ता भेलालाई सम्बोधन गर्दै उनले आफूभन्दा पहिला जनतालाई ध्यानमा राख्न आग्रह गरे ।

Yamaha

‘तपाईंहरू पहिला आफूलाई गाडी किन्ने काम नगर्नुस्, यस्ता कुरामा सधैं होसियार रहनुपर्छ,’ उनले भने, ‘पहिला म र मेरा लागि होइन, जनताका लागि भन्ने हेक्का सबैमा हुनुपर्छ ।’

जनताले अनुभूति गर्ने गरी काम गर्न निर्देशन दिँदै उनले जनताले वामपन्थीलाई कुर्सीमा बस्नका लागि मात्र सरकारमा नपठाएको बताए । ‘जनताले मन पराउने काम गर्नुस्, सस्तो लोकप्रियताका लागि झूट नबोल्नुस्,’ ओलीले भने, ‘देश बनाउने जिम्मा हाम्रो काँधमा छ, अर्को वर्ष सबै थोकमा फरक हुनुपर्‍यो । धान अघिल्लो वर्षभन्दा बढी फल्नुपर्‍यो, व्यापार घाटा घट्नुपर्‍यो ।’ पहिले अनुभव नभएका कारण प्रदेश र स्थानीय सरकार सञ्चालनमा केही समस्या देखिएको प्रधानमन्त्रीले बताए । ‘केही कमजोरी भए पनि हल्ला चलाएजस्तो भने होइन,’ उनले भने, ‘गल्ती भएको ठाउँमा सुधार गर्नुपर्छ ।’

‘कर नउठाई कहाँबाट ल्याएर दिनु ?’

प्रधानमन्त्री ओलीले पहिले पनि सबैजसो कुरामा कर तिरिँदै आएको र अब पनि आयमा मात्र कर लाग्ने बताए । ‘लिपस्टिकमा पनि कर तिरैकै हो, अहिले केको कोलाहाल नि ?’ उनले भने, ‘सय माउ भैँसी पाल्दा कर लाग्दैन तर एउटा बिक्री गर्दा लाग्छ । हजार लिटर दूध उत्पादन गर्दा कर लाग्दैन, बेचेपछि लाग्छ । आयमा मात्र कर लाग्ने हो, यसमा आत्तिनुपर्ने कुरा छैन ।’ ओलीले प्रश्न गरे, ‘जनताबाट कर नउठाउने अनि जनतालाई चाहिँ सरकारले सबै थोक दिनुपर्ने ? कहाँबाट ल्याएर दिनु ?’ कहीँ–कतै अनुभवको कमीका कारण अनावश्यक कर लगाइएको भए तत्काल सच्याउन उनले स्थानीय तहलाई आग्रह गरे । धेरैजसो स्थानीय तह र ६ वटा प्रदेश सरकारसहित केन्द्रीय सरकार नेकपाको एकलौटी भएकाले नफुर्की जनपक्षीय काम गर्न ओलीले अग्रह गरे । ‘अब प्रचण्डजी र मेरो उमेर ढल्किसक्यो, हामीले जिन्दगीमा केही पाउनुछैन, दुवै जनाले देशका लागि केही गर्ने अठोट गरेका छौं,’ ओलीले भने । आफूहरूसँग धृतराष्ट्रको जस्तो पुत्रमोह नभएकाले अनुहार नहेरी भ्रष्टाचारीलाई कारबाही गर्ने उनले बताए ।

ओलीले आफूहरू भारतविरोधी नभएको प्रस्ट पारे । ‘अघिल्लो पटक प्रधानमन्त्री हुँदा मुलुकमा नाकाबन्दी थियो । भारतसँग खुलस्त कुरा गरेर नाकाबन्दी खोलेँ,’ उनले भने, ‘दुई देशबीच कुनै समस्या छैन । खुला सीमा भएकाले सानातिना समस्या आउन सक्छन् । छिमेकीको सानो बच्चा आएर आज आफ्नो घरमा सिसाको कप फुटायो भने पर्सि आफ्नो नानीले छिमेकीकोमा गएर प्लेट फुटाइदिन्छ । यसमा कुनै कोलाहाल गर्ने कुरा आउँदैन् । एउटा छिमेकीविरुद्ध अर्कोलाई कार्डका रूपमा प्रयोग गर्ने काम अब हुँदैन ।’

नेकपाका अध्यक्षसमेत रहेका ओलीले जिल्लास्तरसम्म केही विवाद भए पनि कार्यकर्ता तहमा कुनै विवाद नरहेको बताए । ‘जिल्ला अध्यक्ष र सचिवसम्मका पदमा केही विवाद छ । केही केही ग्रन्थी समातेर बस्नेहरू छन्,’ उनले भने, ‘पूर्वएमालेको समूह बनाए पावर बढ्ने र पूर्वमाओवादी केन्द्रको समूह मिलाएर पद पाउने सपना नदेखे हुन्छ । यो पार्टी झुन्डझुन्ड मिलाएर एक बनाएको होइन, चिनीलाई पानीमा घोले जस्तै हो । अब गुट होइन, योग्यता र क्षमता भएकाले नै पाउँछन् ।’

Esewa Pasal

प्रकाशित : भाद्र ५, २०७५ २०:५३
ADVERTISEMENT
ADVERTISEMENT
प्रतिक्रिया
पठाउनुहोस्

इमरान सरकारी निवासमा बसेनन् 

 प्रधानमन्त्री निवास अनुसन्धान विश्वविद्यालय बन्ने
एजेन्सी

इस्लामावाद — पाकिस्तानका नवनियुक्त प्रधानमन्त्री तथा पूर्वक्रिकेटर इमरान खानले सोमबार विभिन्न लोकप्रिय निर्णय गरेका छन् । 

आफ्नो इनिङ आक्रामक रुपमा सुरु गरेका खानले दरबार जस्तो प्रधानमन्त्री निवासलाई अनुसन्धान विश्वविद्यालयमा परिणत गर्ने घोषणा गरेका छन्। उक्त घोषणासँगै खान सैनिक सचिवालयको सामान्य तीन बेडरुमको घरमा सरिसकेका छन्।

उनले आफूले बानिगालास्थित घरमा बस्न चाहेपनि सुरक्षा अधिकारीले खतरा देखाएकाले सैनिक सुरक्षा भएको घरमा बस्नुपरेको उनले बताएका छन्।

उनले विगतमा प्रधानमन्त्रीका सहयोगी र सहायकका रुपमा कार्यरत ५ सय २४ जनाको टिमलाई २ मा सीमित पार्ने जनाएका छन्।

खानले विगतमा प्रधानमन्त्रीका लागि छुट्याइएका ३३ वटा बुलेट प्रुफ कारसहित ८० वटा गाडी लिलामीमा बिक्री गरी शिक्षाबाट वञ्चित करिब २ करोड बालकालिकालाई विद्यालय पढ्न पठाउने जनाए। खानले लिलामीमा राखिने गाडी खरिदका लागि व्यपारीलाई आह्वान समेत गरे।

प्रधानमन्त्रीको लागि छुट्याइएको अतिरिक्त हेलीकोप्टर समेत विक्री गर्ने जनाउँदै खानले उक्त रकम मातृशिशु मृत्युदर घटाउन खर्चने घोषणा गरे। उनले राष्ट्रका नाममा सम्बोधन गर्दै राज्यको खर्च कम गर्न आफुले सेवासुविधा कम गर्न लागेको बताए।

‘प्रधानमन्त्रीसँग ३३ बुलेटप्रुफ कार, उड्नलाई हेलिकप्टर र जहाज छन्। तर जनताका आवश्यकता पुरा गर्ने पैसा छैन,’ इमरानले भने। उनले विगतका शासकले नवउपनिवेश कायम गर्ने गरेको आरोप लगाए।

खानले प्रधानमन्त्री तथा उच्चपदस्थ व्यक्तिको भ्रमणमा हुने अनावश्यक खर्च कटौती गर्ने जनाए। उनले सबै सरकारी निवासहरु सकेसम्म सामान्य बनाउने बताए। उनले नयाँ सोचले मात्र नयाँ पाकिस्तान बन्ने उल्लेख गरे।

यसअघि खानले देशमा भ्रष्टाचारको अत्य गर्न अभियान नै चलाउने बताएका थिए। भ्रष्टाचारीप्रति शून्य सहनशिलता अपनाउने बताउँदै इमरानले राष्ट्रको सम्पत्ति लुट्नेलाई आफूले नछोड्ने प्रतिबद्धता व्यक्त गरेका थिए।

पाकिस्तान मुस्लिम राष्ट्रका रुपमा स्थापित भएदेखि नै जनताले स्थायित्व र सुशासनको लागि प्रतिक्षा गरेपनि ७१ वर्ष खेर गएको दाबी गर्दै उनले भने, ‘अब म देशवासीको परिवर्तनको चाहना पूरा गरेरै छाड्छु।’

उनले आफू राजनीतिक परिवारको सदस्य नभएको बताउँदै आफूले जनतासमक्ष गरेका बाचा पुरा गर्ने प्रतिबद्धता जनाए। उनले पाकिस्तानमा भ्रष्टाचार मौलाएका कारण जनतामा छाएको निराशाको अन्त्य गर्ने दाबी गरे।

प्रकाशित : भाद्र ५, २०७५ २०:५१
पूरा पढ्नुहोस्
ADVERTISEMENT
प्रतिक्रिया
पठाउनुहोस्
ADVERTISEMENT
ADVERTISEMENT
ADVERTISEMENT
ADVERTISEMENT
ADVERTISEMENT