मुलुक समृद्ध बनाउन उत्पादनमा लाग्नुस् : प्रधानमन्त्री ओली

अर्जुन राजवंशी

दमक — प्रधानमन्त्री केपी शर्मा ओलीले उत्पादनमुखी पेशामा लाग्न आग्रह गरेका छन् । उनले कृषिमा आधुनिकीकरण गर्न सके ठूलो फड्को मार्न सकिने दाबी गर्दै त्यसतर्फ लाग्न आग्रह गरेका हुन् । बुधबार झापाको गौरादहमा प्रधानमन्त्री ओलीलाई गरिएको नागरिक अभिनन्दन कार्यक्रम गरिएको छ । अभिनन्दनपछि बोल्दै प्रधानमन्त्री ओलीले ठूलो स्केलमा उत्पादन हुने गरी कृषिमा लाग्न आम किसानलाई आग्रह गरे । 

उनले कृषिमा आधुनिकीकरण गर्न सके, मुलुकलाई समृद्ध बनाउन धेरै समय नलाग्ने बताए । ओलीले किसानले आधुनिक कृषि पेशा गर्न चाहे सरकार जस्तोसुकै सहयोग गर्न तयार रहेको बताए । ‘आधुनिक हिसाबले खेती गर्ने हो भने, समृद्धिको ढोका त्यहीबाट खोल्न सकिन्छ । त्यसैले कृषिमा लागौं । प्राकृतिक उत्पादन गरौं, जमिन पर्याप्त छ । अब सबै मिलेर उत्पादन बढाउनेतिर लागौं’ उनले भने ।

Yamaha


प्रधानमन्त्री ओलीले कृषिका लागि झापा र मोरङमा कुनै समस्या नभएको दाबी गरे । उनले उच्च बाँध बाँधेर तमोरको पानी चिसाङमा ल्याएर मोरङमा तथा कनकाईको पानीले झापामा सिँचाइको व्यवस्था गर्न सकिने बताए । प्रधानमन्त्री ओलीले सरकार सुशासन र विकासको बाटोमा हिडेको बताए । उनले कानुनको गलत प्रयोग गर्न नदिन सरकार कटिबद्ध भएर लागेको बताए । उनले भने,‘एक हिसाबले म राजनीतिक जोगी जस्तै भईसकेको छु । हामीलाई कुनै ढाट–छल गर्नु छैन । त्यसैले सरकार कानुनी राज्य स्थापित गर्न लागिपरेको छ ।’

प्रधानमन्त्री ओलीले आफूले विकास कसरी गर्नुपर्छ भन्ने कुरा राम्ररी बुझेको बताए । ‘मैले जेल–नेल भोगेको छु । लात–सलाद खाएको छु । ७७ वटै जिल्ला घुमेको छु । सबै जिल्लाका भूगोल बुझेको छु । देश–विदेश सबै देखेको छु । मलाई राम्ररी थाहा छ, विकास कसरी गर्नुपर्छ,’ उनले भने । उनले केही गरेर देखाउने राम्रो अवसर पाएकाले त्यसको भरपूर उपयोग गर्ने बताए । उनले भने,‘मेरा लागि यो एउटा ठूलो अवसर बनेको छ । यतिबेला राजनीतिक रुपले, स्वास्थ्यको हिसाब पनि यो मेरा लागि अवसर हो । त्यसैले मैले यो अवसरलाई पूरा उपयोग गर्न राम्रा कामहरु गर्नुको विकल्प छैन ।’

उनले आफूले भनेका सबै कुराहरु पूरा गराएरै छाड्ने उद्घोष गरे । अघिल्लो पटक राम्रा काम गर्ने योजना बनाउदै गर्दा पदबाट हटाएकाले देखिने गरी काम गर्न नसकेको बताए । तर, यस पटक त्यो अवस्था नरहेकाले विस्तारै सबै प्रतिबद्धताहरु पूरा हुदै जाने बताए । ‘तपाईहरु हेर्दै जानुस्, अबको दुई वर्षपछि पूर्वपश्चिम रेल कसरी गुड्छ । तुइन अबको केही समयमा विस्थापित हुँदैछ,’ उनले भने,‘घर घरमा पाइपबाट ग्यास पुग्ने सिस्टमको मैले विराटनगरमा उद्घाटन गरिसके ।’

ओलीले हल्ला भएजस्तो कर वृद्धि नभएको बताए । उनले जनप्रतिनिधिलाई जनताको सेवामुखी भएर काम गर्न निर्देशन दिए । अनुभवको अभावमा वा भुलचुक कतै करको मात्रा बढेको भए, त्यसलाई समायोजन गर्न पनि जनप्रतिनिधिलाई निर्देशन दिए । उनले स्थानीय सरकारसँग कर वृद्धि गर्ने अधिकार भएकाले कर वृद्धि भएको टिप्पणी गरे । सरकारबाट सेवा सुविधा लिदा कर पनि तिर्नुपर्छ भन्ने मानसिकताबाट विचलित नहुन आग्रह गरे ।

प्रधानमन्त्री ओलीले बुधबार नै कमल गाउँपालिकास्थित प्रादेशिक आयुर्वेद चिकित्सालय भवनको शिलान्यास गरेका थिए । निर्धारित समयभन्दा करीब ३ घण्टा ढिला गरी आएका प्रधानमन्त्री ओलीले बाटो हिलो भएकाले कार्यक्रम स्थलमै नपुगी शिलान्यास गरेका थिए । पानीमा भिज्दै ३ घण्टाभन्दा बढी समयसम्म बसेका स्थानीय प्रधानमन्त्री कार्यक्रम स्थलसम्म नआउदा रुष्ट बनेका थिए । शिलान्यास कार्यक्रममा आउनुअघि प्रधानमन्त्री ओलीले नेकपाको जिल्ला कमिटी चयनबारे जिल्ला नेताहरुसँग छलफल गरेका थिए ।

अध्यक्ष, सचिवसहित तत्कालीन एमाले र माओवादी केन्द्रबाट कति जना नेता जिल्ला कमिटीमा बस्ने भन्ने विषयमा सहमति जुटेपनि नेतृत्व तहमा को–को जानेबारे टुंगो लागेको छैन । त्यस विषयमा कमल गाउँपालिकास्थित सशस्त्र प्रहरीको पाथीभरा गणमा जिल्लास्तरीय नेताहरुसँग करीब ३ घण्टा छलफल गरेका थिए ।

प्रधानमन्त्री ओलीले बुधबार बिहान मोरङको पथरीशनिश्चरे नगरपालिकामा कार्यकर्ता भेटघाट गरेका थिए । मोरङ ३ बाट निर्वाचित भानुभक्त ढकाल कानुन मन्त्री भएकोमा बधाई ज्ञापन गर्न आयोजित कार्यक्रममा ओलीले मुलुकलाई समृद्ध बढाउने प्रतिज्ञासहित सरकारको नेतृत्व गरिरहेको बताएका थिए ।

उनले आफूले मुलुकको बागडोर सम्हाले पनि समृद्ध मुलुक निर्माणमा सबैको सहयोग आवश्यक रहेको बताएका छन् । उनले आफ्नो कार्यकालमा कुनै किसिमको भ्रष्टाचार हुन नदिने बताए । उनले विगतमा शासकले बैमानीले गर्दा मुलुक पछि परेकाले अब त्यस्तो हुन नदिने प्रतिवद्धता व्यक्त गरे ।

प्रकाशित : भाद्र ६, २०७५ १८:०९
ADVERTISEMENT
ADVERTISEMENT
प्रतिक्रिया
पठाउनुहोस्

नजिकिँदै कोइराला दाजुभाइ, पार्टी नेतृत्वमा आउने रणनीति

‘शेखर दासँग कुरा भइरहेको छ । हामीमध्ये एकजना सभापतिका उम्मेदवार बन्नेमा शंका छैन । तर म कि ‘दा’ भन्ने अन्तिम टुंगो लाग्न बाँकी छ’ – शशांक कोइराला ।
लीलाबल्लभ घिमिरे

विराटनगर — कांग्रेस महामन्त्री शशांक कोइराला र केन्द्रीय सदस्य शेखर कोइरालाबीच पछिल्लो समय भेट र छलफल बाक्लै हुन थालेको छ । यसपटक एउटै कार्यक्रमलाई सम्बोधन गर्न आएका दुई नेताको बास पनि एकै घरमा भयो । अरू बेला विराटनगर आउँदा होटलमा बस्ने शशांक यसपालि पिताजीको घर कोइराला निवासमा बसे । उनले त्यहाँ एक रात बिताए ।

कांग्रेस महामन्त्री शशांक कोइराला (बायाँ) र नेता शेखर कोइराला ।

पुरानो घर शेखरको अंशमा परेको छ भने शशांक र प्रकाशको भागमा परेको जग्गा बिक्री भइसकेको छ । सुजाता कोइरालाले आफ्नो भागमा परेको जग्गामा घर बनाएकी छन् ।
निकै अघि शेखर, शशांक र सुजाता कोइरालाको सामूहिक तस्बिर सामाजिक सञ्जालमा सार्वजनिक भएसँगै तीनैजनालाई एक हुन दबाब बढेको थियो । दाजु शेखरको घरमा बसेका शशांकलाई निवासमा पुगेका कार्यकर्ताहरूले २ मध्ये एकजना चौधौं महाधिवेशनमा सभापतिको उम्मेदवार बन्न आग्रह गरे । थोरै बोल्ने तर हाँसिरहने शशांकले प्रस्ट जवाफ कार्यकर्तालाई दिएनन् । टाउको हल्लाएर स्वीकृति प्रदान गरे जस्तो गरे ।

शनिबार ‘प्रजातान्त्रिक विचार समाज’ ले आयोजना गरेको कार्यक्रममा पनि विराटनगरका वुद्धिजीवी र जिल्लाका अगुवा नेता कार्यकर्ताले दुईमध्ये एकजनाले पार्टीको नेतृत्व लिन दबाब दिएका थिए । मन्तव्यमा त्यसबारे केही पनि नबोलेका शशांकले कार्यक्रमपछि संवाददाताहरूसँग भने २ मध्ये एकजना अघि बढ्ने खुलासा गरेका थिए ।

‘शेखर दासँग कुरा भइरहेको छ । हामीमध्ये एकजना सभापतिका उम्मेदवार बन्नेमा शंका छैन,’ उनले भने, ‘तर म कि ‘दा’ भन्ने अन्तिम टुंगो लाग्न बाँकी छ ।’ उम्मेदवारीका विषयमा सुजाता, शेखर र आफूबीच पटकपटक कुरा भएको शशांकले बताए । ‘समय आएपछि एकैमतको निर्णय आउनेछ,’ उनले भने, ‘को हुने भनेर अहिले नै निर्णय गर्ने बेला पनि भएको छैन ।’ तर यस अघि नै शेखरले भने आफु सभापतिको उम्मेदवार बन्ने घोषणा गरी सकेका छन् । शेखरको दौडाहा जिल्ला जिल्लामा बाक्लिँदै गएको छ ।

‘यहाँ पनि दुई जनाबीच आगामी नेतृत्व र पार्टीको गिर्दो साखका बारेमा गहन छलफल भयो,’ प्रदेशसभा सदस्य केदार कार्कीले भने, ‘दुई जनामध्ये एक जना उठ्ने कुरामा अब शंका छैन ।’ दुई दाजुभाइबीच भएको गहन सल्लाहको कारण शशांकले सभापति शेरबहादुर देउवाको विरोधमा बोल्न थालेको कार्यकर्ताहरूको बुझाइ छ । शेखर भने केही समय अघिबाट देउवाविरुद्ध आक्रामक बन्दै आएका छन् ।
तेह्रौं महाधिवेशनमा शेखरले महामन्त्रीमा लड्ने तयारी गरेका थिए । तर अन्तिममा आएर शशांक उठ्ने भएपछि उनी पछि हटे । पछिल्लो समय पार्टी सुधारको एजेन्डा बोकेर शेखर जिल्ला घुमिरहेका छन् । तर त्यसलाई कार्यकर्ताहरूले आगामी नेतृत्वको दौडका रूपमा लिएका छन् । ‘शेखर दा मैदानमा उत्रने कुरामा कुनै शंका छैन । यति मात्र हो, आम कार्यकर्ताहरूले दुईजनामा सहमति गर्नुहोस् भन्ने चर्को दबाब छ,’ कार्कीले भने, ‘त्यसका लागि आन्तरिक छलफल भइरहेको छ ।’
प्रजातान्त्रिक विचार समाजले आयोजना गरेको कार्यक्रममा पूर्वमहामन्त्री कृष्णप्रसाद सिटौला पनि सहभागी थिए । कार्यकर्ताहरूले सिटौलालाई दुई दाजुभाइबीच एकता गराउन आग्रह गरेका थिए । महाधिवेशसनमा तेस्रो पोल खडा गरी सभापति पदमा उम्मेदवार बनेका सिटौलाले दोस्रो चरणको मतदानमा देउवालाई सहयोग गरेका थिए । पछिल्लो समय देउवासँगको सम्बन्धमा चिसोपन आएपछि सिटौला कोइरालाहरूसँग नजिकिएका छन् ।

प्रकाशित : भाद्र ६, २०७५ १७:११
पूरा पढ्नुहोस्
ADVERTISEMENT
प्रतिक्रिया
पठाउनुहोस्
ADVERTISEMENT
ADVERTISEMENT
ADVERTISEMENT