[अपडेट] किशोरी हत्या प्रकरण : कञ्चनपुरमा कर्फ्यू

चित्रांग थापा, भवानी भट्ट

कञ्चनपुर — जिल्ला प्रशासन कार्यालय कञ्चनपुरले कर्फ्यू आदेश जारी गरेको छ । जिल्लामा केही दिनदेखि जारी आन्दोलन उग्र बनेपछि स्थानीय प्रशासनले बिहीबार साँझ पाँच बजेदेखि शुक्रबार बिहान पाँच बजेसम्मका लागि कर्फ्यू आदेश जारी गरेको हो । आज दिउँसो बसेको सुरक्षा समितिको बैठकले उक्त निर्णय गरेको प्रमुख जिल्ला अधिकारी कुमारबहादुर खड्काले बताए ।

तस्बिर : रासस

स्थानीय प्रशासन ऐन २०२८ को दफा १६ ‘क’ बमोजिम कर्फ्यू जारी गरिएको प्रजिअ खड्काले जानकारी दिए।

Yamaha

जिल्ला प्रशासन कार्यालयमा बसेको सुरक्षा निकायको बैठकले पूर्वमा भीमदत्त नगरपालिका-१८ को जनज्योति चोक भासी हुँदै कारागारसम्म, पश्चिममा भीमदत्त नगरपालिका-६ को त्रिपुरा युवा क्लव बनगाउँदेखि वडा नं-१५ को निंगलाशैनी स्कुलसम्म, उत्तरमा खैरानी चोक र दक्षिणमा सीप विकास केन्द्रदेखि मदन भण्डारी स्कुलसम्म कर्फ्यू लगाउने निर्णय गरेको थियो।

बलात्कारपछि हत्या गरिएकी १३ वर्षीया निर्मला पन्तको घटनामा संलग्नलाई कारवाहीको माग गर्दै जारी आन्दोलन उग्र बनेपछि कर्फ्यू आदेश जारी गरिएको हो।

अपडेट...

१३ वर्षीया किशोरीको बलात्कारपछि हत्या प्रकरणको विरोधमा कञ्चनपुरमा भइरहेको प्रदर्शन उग्र बन्दै गएपछि जिल्ला प्रशासन कार्यालयले कर्फ्यू लगाउने निर्णय गरेको छ। बिहीबार दिउँसो बसेको सुरक्षा निकायको बैठकले उक्त निर्णय गरेको हो।

कर्फ्यू कति बजेदेखि लगाउने भन्ने यकिन भइनसकेको प्रमुख जिल्ला अधिकारी कुमारबहादुर खड्काले बताए। उनका अनुसार भीमदत्त नगरपालिकाको बजार क्षेत्रमा किनमेलका लागि आएका सर्वसाधारणहरु पनि भएकाले उनीहरुलाई आफ्नो गन्तव्यसम्म पुग्न समय दिइएकोले यति नै बजे कर्फ्यु लगाउने भन्ने निर्णय हुन नसकेको हो।

उनले भने, 'कर्फ्यू बजार क्षेत्रमा लगाउन लागिएको हो। यात्रु, बटुवाहरुलाई आफ्नो बासस्थानमा त पुग्ने समय दिनु पर्‍यो भनेर हामीले ४ बजेदेखि कर्फ्यू लगाउने कि ५ बजेदेखि लगाउने भनेर निर्णय गरिसकेका छैनौं। परिस्थिति हेरेर हामी निर्णय लिन्छौं।'

प्रजिअ खड्काका अनुसार कर्फ्यू आज भीडन्त भएको क्षेत्र आसपास र भीमदत्त बजार आसपासको क्षेत्रमा लगाइने छ।

उनले थप जनधनको क्षति नहोस् भनेर कर्फ्यू लगाउन लागिएको स्पष्ट पारे।

अपडेट...
...
कान्तिपुरसँग टेलिफोनमा कुराकानी गर्दै प्रजिअ कुमारबहादुर खड्काले कर्फ्यू आदेश जारी नगरिसकिएको, तर सो बारे छलफल भने भइरहेको जानकारी दिएका छन्। 'हामी के गर्ने भनेर छलफल मै छौं। कर्फ्यू आदेश जारी भइसकेको छैन,' उनले भने।

साथै प्रहरीले पनि सार्वजनिक स्थानमा रहेका मानिसहरुलाई केहीबेरमा कर्फ्यू लाग्ने भन्दै आ-आफ्नो गन्तव्य तर्फ छिटो गइदिन आग्रह गर्दै हिँडेका छन्। तर, प्रशासनले औपचारिक निर्णय नगरिसकेकोले कुन-कुन स्थानमा र कति समयका लागि कर्फ्यू लगाउने यकिन भएको छैन।

ट्राफिक चोकमा भइरहेको प्रदर्शनमा प्रहरीले गोली चलाउँदा बिहीबार चार जना घाइते भएका छन्।

घाइतेहरुको महाकाली अञ्चल अस्पतालमा उपचार भइरहेको छ। घाइते भएकाहरु बारेखुल्न सकेको छैन।जिल्ला प्रशासन कार्यालय अगाडि प्रदर्शनकारी माथि प्रहरीले अश्रु ग्यास प्रहार गरेको थियो। अश्रु ग्यास सकिए पछि गोली चलाएको हो।

कञ्चनपुरको भीमदत्त नगरपालिका–२ उल्टाखामकी १३ वर्षीया किशोरीको बलात्कारपछि हत्या भएको घटनामा प्रहरीले दोषीलाई उम्काउने कोशिस गरेको भन्दै स्थानीयले तीन दिनदेखि प्रदर्शन जारी राखेका छन्।प्रदर्शनकारीहरुले ठाँउठाँउमा टायर बालेर प्रदर्शन गरिरहेका थिए।

बुधबारसम्म महेन्द्रनगर बजारमा केन्द्रित रहेको आन्दोलन बिहीबारदेखि राजमार्ग केन्द्रित भएको छ। प्रहरीले वास्तविक अपराधी लुकाउन मानसिक अवस्था ठिक नभएका व्यक्तिलाई नाटकीय ढंगले सार्वजनिक गरेको भन्दै स्थानीय आन्दोलित बनेका हुन्।

दुई दिनदेखि बन्द रहेको महेन्द्रनगर बजार तेस्रो दिन पनि बन्द छ। बिहीबार बिहानैदेखि पुर्व–पश्चिम राजमार्गको चोक चोकमा टायर बालेर यातायात अवरुद्ध पारिएको छ। बेदकोट नगरपालिकाको सुडा, लालपुर र दैजीलगायतका चोकहरुमा टायर वालेर स्थानीयले प्रदर्शन गरिरहेका छन्। यसैगरी जिल्ला प्रशसन कार्यालय अगाडि पनि उग्र प्रदर्शन भइरहेको छ।

Esewa Pasal

प्रकाशित : भाद्र ७, २०७५ १४:३९
प्रतिक्रिया
पठाउनुहोस्

किशोरी हत्या प्रकरण: प्रहरी दबाबमा दाहसंस्कार

चित्रांग थापा, भवानी भट्ट

कञ्चनपुर — महेन्द्रनगर बजारको व्यस्त चोकमा एक किशोरीको तस्बिर टाँगिएको छ, ‘हार्दिक श्रद्धाञ्जली’ लेखेर । हत्यारालाई कारबाही माग गर्दै श्रद्धाञ्जली प्रकट गर्नेको घुइँचो लागिरहेको छ ।

प्रतिकात्मक तस्बिर

गत बिहीबार साथीको घरमा पढ्न गएकी किशोरी एकाएक बेपत्ता भइन् । अर्को दिन एक किलोमिटर टाढाको उखुबारीमा मृत भेटिइन् ।


बलात्कारपछि हत्या भएको भन्दै महेन्द्रनगरका स्थानीय आन्दोलित छन् । तनाव साम्य हुन सकेको छैन । ‘हाम्रो केही ठूलो र पूरा गर्नै नसकिने माग छैन,’ किशोरीका बुबाले भने, ‘छोरीको हत्यारा को हो, पहिचान गरी कडा कारबाही गरियोस् ।’ शव भेटिएपछि स्थानीयले हत्यारा पत्ता लगाउनुपर्ने भन्दै आन्दोलन थाले । तीन दिनसम्म शव अस्पतालमै रह्यो ।


पीडित परिवार र स्थानीयले अपराधी पत्ता नलागेसम्म दाहसंस्कार नगर्ने अडान लिएका थिए तर प्रहरीको दबाबमा परिवारले सोमबार दाहसंस्कार गरेका छन् ।


उनको हत्या अघिल्लो बिहीबार राति भएको प्रहरी अनुमान छ । शव शुक्रबार फेला परेको थियो । दोषीलाई कारबाही माग गर्दै महिला आन्दोलनमा उत्रिएका छन् । प्रहरीसँगको झडपमा केही घाइते भएका छन् ।


‘प्रहरीले आन्दोलनका कारण अनुसन्धानमा कठिनाइ आएको भन्दै शव उठाउन दबाब दिन थाल्यो,’ किशोरीका बुबाले भने, ‘कफ्र्यु लाग्न सक्ने चेतावनी दिएपछि शव बुझ्न सहमत भएँ ।’ एक्लै सहमति गरेको भन्दै स्थानीय रिसाएर मलामीसम्म नगएको उनको गुनासो छ ।


छोरी हराएको खबर गर्दा प्रहरीले ‘भोलि खोजौंला’ भनेर आलटाल गरेकाले परिवार थप पीडामा छ । ‘मैले छोरीको साथीको घरमा सोध्दा उल्टै मलाई घरबेटीले धम्क्याइन्, एक्लै घरभित्र जान सकिनँ,’ मृतक किशोरीकी आमाले भनिन्, ‘प्रहरीलाई सँगै गइदिन भनेको थिएँ । भोलि हेरौंला भन्दै टारे ।’


किशोरीकी आमाको घरमै चटपटे पसल छ । उनले त्यसैको कमाइले परिवारको गुजारा चलाउँदै आएकी थिइन् । घटनाको दिन उनी पसलको सामान ल्याउन सीमावर्ती वनबसा बजार गएकी थिइन् । किशोरीका बुबा पनि महेन्द्रनगर बजारमा पानीपुरी बेच्छन् । घटनाको दिन उनी उपचारका लागि भारतको इलाहाबाद गएका थिए ।


खबर सुनेकै दिन घर फर्किए । भीमदत्त नगरपालिका–२ का वडाध्यक्ष डम्बर कार्कीले किशोरीको स्मृतिमा चिल्ड्रेन पार्क बनाउने प्रतिबद्धता जनाएका छन् । पीडित परिवारलाई भने पहिला न्याय चाहिएको छ । छोरीको हत्यारा पत्ता लागे मात्र उनीप्रतिको सच्चा श्रद्धाञ्जली ठहरिने उनीहरू बताउँछन् ।


कहाँ पुग्यो अनुसन्धान ?
किशोरी हत्याको ८ दिन बितिसकेको छ । प्रहरीले घटना अनुसन्धान भइरहेको जनाएको छ । जिल्ला प्रहरी प्रमुख एसपी दिल्लीराज विष्टले अनुसन्धान अपराधी नजिक–नजिक पुगिसकेको बताए । ‘सीआईबीको टोलीले सूक्ष्म अनुसन्धान गरिरहेको छ । हामी अपराधीनजिक पुगिसकेका छौं,’ उनले भने ।


अनुसन्धान क्रममा ६ जनालाई सोधपुछका लागि नियन्त्रणमा लिइएको उनले जानकारी दिए ।


गत आइतबार प्रहरीको केन्द्रीय अनुसन्धान ब्युरो (सीआईबी) का डीएसपी अंगुर जीसीको नेतृत्वमा आएको टोलीले अनुसन्धान गरिरहेको छ । उक्त टोली अझै केही दिन यहीं रहने एसपी विष्टले बताए ।


अनुसन्धानमा संलग्न एक प्रहरी अधिकृतका अनुसार हालसम्म शंकास्पद व्यक्तिलाई झिकाएर केरकार गर्ने काम मात्र भएको छ, वास्तविक अपराधीनजिक प्रहरी अनुसन्धान पुग्नै सकेको छैन । ‘जिल्ला प्रहरी र केन्द्रीय अनुसन्धान ब्युरोका ३ जनासमेत १० जनाको टोली अनुसन्धानमा खटिएको छ,’ उनले भने, ‘बिहीबार बिहानसम्म पनि अपराधी पत्ता लाग्न
सकेको छैन ।’


किशोरीको बलात्कारपछि घाँटी थिचेर हत्या भएको दाबी प्रहरीको छ । पोस्टमार्टम रिपोर्ट भने आइसकेको छैन । ‘घटना कुनै एक व्यक्ति वा समूहले गरेको हो भन्ने निक्र्योल गर्न मृतकको भिसेरालगायत परीक्षणका लागि काठमाडांै पठाइएको छ । रिपोर्ट प्राप्त भएपछि धेरै कुरा खुल्नेछ,’ उनले भने । प्रदेशसभा र संघीय संसद्मा समेत अपराधीलाई तत्काल कानुनी कठघरामा ल्याई हदैसम्म सजाय गरिनुपर्ने माग उठेको थियो ।

प्रकाशित : श्रावण १८, २०७५ ०७:०१
पूरा पढ्नुहोस्
ADVERTISEMENT
प्रतिक्रिया
पठाउनुहोस्
ADVERTISEMENT
ADVERTISEMENT