पूर्व लडाकु बिष्टलाई अन्तर्राष्ट्रिय विमानस्थलबाट फर्काइयो

तानाशाही राज्यको संकेत : मानव अधिकार आयोग
कान्तिपुर संवाददाता

काठमाडौँ — पूर्व माओवादी लडाकु लेनिन बिष्टलाई बैंककमा हुन लागेका एक कार्यक्रममा सहभागी हुन जानबाट रोकिएको छ । उनी बाल सैन्यविरुद्धको अभियानमा सक्रिय छन् ।

नेपाल एयरलाइन्सको शुक्रबार बिहान ९.५० को उडानबाट बैंकक जान लागेका विष्टलाई भ्रमण अनुमति नभएको भन्दै विमानस्थलस्थित अध्यागमनबाट फर्काइएको हो।

Yamaha

'म बैंककमा हुन लागेको युवा सम्बन्धी एउटा कार्यक्रममा भाग लिन जान लागेको थिएँ,' विष्टले कान्तिपुरसँग भने, 'अध्यागमनमा छाप लगाइसकेपछि मलाई बोलाएर केही सोधपुछ गर्नु छ भने, अनि मेरो यात्रा अनुमति नभएको बताए।'

विष्टले आफूलाई के कारणले यात्रा अनुमतिको नभएको भन्ने सम्बन्धमा लिखित चाहिने अडान राखेपछि विमानस्थल अध्यगमन कार्यालयले यात्रा अनुमति नभएको पत्र दिएको छ।

'जुन कार्यक्रममा जान लागेको हो त्यस विषयसँग सम्बन्धित नेपाल सरकारको कुनै पनि निकायको सिफारिस तथा स्वीकृति नदेखिएकोले प्रस्थान अनुमति नदिएको' पत्रमा उल्लेख छ।

बिष्टले भने आफूले बाल सैन्यविरोधी अभियान चलाउँदै आएकाले अन्तर्राष्ट्रिय कार्यक्रममा पनि उक्त विषय उठाउने आशंकामा यात्रा रोकिएको हुन सक्ने बताएका छन्।

बिष्ट बाल सैनिकका रुपमा माओवादी लडाकुमा सहभागी भएका व्यक्ति हुन्। शान्ति प्रक्रियाका क्रममा उनी आयोग्य ठहरिएका थिए। उनले अयोग्य घोषित लडाकुहरुको नेतृत्व गरेर तत्कालीन माओवादी मुख्यालय पेरिस डाँडामासमेत धर्ना दिएका थिए।

विमानस्लथस्थित अध्यागमन कार्यालयका निमित्त प्रमुख लक्ष्मण थापाले सुरुमा सरकारको अनुमति बिना जान लागेकाले रोकिएको बताए। विदेशमा कार्यक्रममा सहभागी हुनका लागि सरकारको अनुमति चाहिन्छ र? भन्ने कान्तिपुरको प्रश्नमा भने विभागीय आदेशमा रोकिएको बताए।

उनले भने, 'अध्यागमन विभागले दिएको निर्देशन अनुसार हामीले उनलाई रोकेका हौं ।'

तरविभागका महानिर्देशक इश्वरी पौडेलले भने यस घटनाबारे आफूलाई केही जानकारी नभएको बताए । उनले कान्तिपुरले घटनाबारे जानकारी माग्दा भने, 'यो विषयमा डिटेलमा मलाई थाहा छैन । हामीले यो व्यक्तिलाई विदेश जान दिनु, त्यो व्यक्तिलाई नदिनु भनेर निर्देशन दिएको छैनौं ।'

गृह मन्त्रलायका प्रवक्ता रामकृष्ण सुवेदीले भने आफू कहाँ जानकारी आइनसकेकाे बताए। उनले आफ्नो नाम जोडिएर आएका समाचार भ्रामक भएको बताए ।

बिष्टलाई अध्यागमन कार्यालयले दिएको पत्र:
तानाशाही राज्यको संकेत

मानव अधिकार समुदायले भने यसले हिंडडुल गर्न पाउने अधिकारको गम्भिर उल्लंघन भएको बताएका छन्। राष्ट्रिय मानव अधिकार आयोगकी प्रबक्ता मोहना अन्सारीले सरकारको यो कदमले तानाशाही राज्यको संकेत दिएको बताइन्।

यसअघि २०५९ सालमा राज ज्ञानेन्द्र शाहले शासन हात लिएपछि राजनीतिक नेता तथा अधिकारकर्मीलाई यसरी नै यात्रा अवरोध गरिएको थियो।


प्रकाशित : भाद्र ८, २०७५ १५:३७
ADVERTISEMENT
ADVERTISEMENT
प्रतिक्रिया
पठाउनुहोस्
ADVERTISEMENT

बिमस्टेक सम्मेलन : भारतीय प्रधानमन्त्रीसँग रेल्वेसहित दुईवटा छुट्टै सम्झौत

म्यानमारका प्रधानमन्त्री र श्रीलंकका राष्ट्रपति लुम्बिनी जाने
बुद्धिष्ट सर्किट बनाउने विषयमा नेपालको विशेष जोड हुने छ : परराष्ट्रमन्त्री 
कृष्ण आचार्य

काठमाडौँ — आगामी १४ र १५ हुने बहुपक्षिय प्राविधिक तथा आर्थिक सहयोगका लागि बंगालको खाडीकाको प्रयास (बिमस्टेक) सम्मेलनको अवसरमा भारत र नेपालबीच छुट्टै दुई सम्झौता हुने भएका छन् ।परराष्ट्रमन्त्री प्रदिप ज्ञावलीका अनुसार रक्सौल–काठमाडौं रेल्वे र बल्क कार्गो सम्बन्धी सम्झौतामा हस्ताक्षर हुने भएको हो ।

नेपालका प्रधानमन्त्री केपी शर्मा ओली र भारतका प्रधानमन्त्री नरेन्द्र मोदी उपस्थीत कार्यक्रममा उक्त सम्झौता हुने भएका हुन्।

बिमस्टेक बैठकबारे जानकारी दिन आयोजित पत्रकार सम्मेलनमा परराष्ट्रमन्त्री
ज्ञावलीले सबै तयारी पुरा भएको बताएका छन्। उनका अनुसार बिमस्टेक सदस्य राष्ट्रका कार्यकारी प्रमुखहरुले बैठकमा आउने निधो गरी नेपाललाई जानकारी पठाइसकेका छन्।

बैठकमा बंगलादेशकी प्रधानमन्त्री शेख हसीना, भारतका प्रधानमन्त्री नरेन्द्र मोदी, श्रीलंकाका राष्ट्रपति राष्ट्रपति मैथ्रिपाला सिरीसेना, थाइल्यान्डका प्रधानमन्त्री प्रायुत व चा, म्यानमारका प्रधानमन्त्री वीन मिन्ट, भुटानका अन्तरिम मन्त्रीपरिषदका अध्यक्ष छिरिङ तोग्वे सहभागी हुने भएका हुन्।

‘आगामी १२, १३ र १४ गते सबै प्रमुखहरु आउनु हुने छ,’ परराष्ट्रमन्त्री ज्ञावलीले भने, ‘बैठकको तयारीको अन्तिम चरणमा छौं। सानातिना कामहरु मात्रै बाँकी छन्।’ श्रीलंकका राष्ट्रपती मैथ्रिपाला र म्यानमारका प्रधानमन्त्री वीन मिन्ट लुम्बिनी भ्रमणमा जाने कार्यतालिका तय भएको छ। भारतका प्रधानमन्त्री नरेन्द्र मोदीले पशुपति दर्शन गर्ने र धर्मशाला उद्घाटन गर्ने कार्यक्रम छ।

बैठकको तयारीका लागि १२ गते विदेश मामिला सचिवहरुको बैठक हुने छ। १३ गते विदेश मामिला मन्त्रीहरुको बैठक बस्ने छ। यी दुई बैठकले बिमस्टेक बैठकका ऐजेन्डा र छलफलका विषयहरुलाई अन्तिम रुप दिने कार्यक्रम रहेको परराष्ट्रमन्त्री ज्ञावलीले बताए।
उनका अनुसार पाँचवटा क्षेत्रमा केन्द्रित रहेर बैठक सञ्चालन हुने छ। कनेक्टीभिटि, गरिबि निवारण, व्यापार र लगानी, जलविद्युत र जलवायु परिवर्तन सम्बन्धी ऐजेन्डामा छलफल हुने छ। ‘बिमस्टेक सदस्य राष्ट्रहरुबीचको महत्वपूर्ण विषय लगायत बुद्धिष्ट सर्किट बनाउने विषयमा नेपालको विशेष जोड हुने छ,’ उनले भने।

बैठकमा बिमस्टेक सदस्य राष्ट्रहरु भारत, बंगलादेश, भुटान, म्यानमार, श्रीलंका, थाइल्यान्ड र आयोजक नेपालका राष्ट्रप्रमुख, विदेशमन्त्री र राज्य मन्त्रीहरु सहभागी हुने छन्। चार वर्ष अघिबाट अध्यक्ष भएको नेपाल आयोजक राष्ट्र हो।

यो संगठन सन् १९९७ मा स्थापना भएको हो। यसको पहिलो सम्मेलन थाइल्याण्डमा सन् २००४ मा भएको थियो। दोस्रो भारतमा सन् २००८ मा भएको थियो। तेस्रो शिखर सम्मेलन ६ वर्षपछि सन २०१४ मा म्यानमारमा भएको थियो। त्यसपछिको अध्यक्ष नेपाल हो। कार्य तालिका अनुसार नेपालमा चौथो सम्मेलन हुन लागेको हो। आयोजक राष्ट्रको व्यवस्थापन गर्ने प्रमुख निकाय परराष्ट्र मन्त्रालयले बैठकका लागि तयारी अन्तिम चरणमा रहेको जनाएको छ।

प्रकाशित : भाद्र ८, २०७५ १५:११
पूरा पढ्नुहोस्
ADVERTISEMENT
प्रतिक्रिया
पठाउनुहोस्
ADVERTISEMENT
ADVERTISEMENT
ADVERTISEMENT