कञ्चनपुर घटनाका दोषीलाई कारबाही हुन्छ : प्रधानमन्त्री

कान्तिपुर संवाददाता

काठमाडौँ — प्रधानमन्त्री केपी ओलीले कञ्चनपुर घटनाका दोषीलाई कारबाहीको दायरामा ल्याउन सरकारले कुनै कसर बाँकी नराख्ने बताएका छन् । घटनाका विषयमा प्रधानमन्त्री ओली र नेपाल कम्युनिष्ट पार्टीका अध्यक्ष पुष्पकमल दाहाललाई ध्यानाकर्षण गराउन बालुवाटार पुगेका नेकपाका तर्फबाट कैलाली र कञ्चनपुरका सांसद तथा नेकपाका केन्द्रीय सदस्यहरुसँग कुरा गर्दे ओलीले उक्त धारणा राखेका हुन् । 

उनले घटनालाई सरकारले गम्भीर रुपमा लिएकोले छानबिन समिति गठन गरेर काम अघि बढाएको प्रस्ट पारे । 'यस घटनाको आवरणमा हिंसा भड्काउने प्रयास भएका छन् । यसमा सरकार गम्भीर छ' प्रधानमन्त्री ओलीले भने, 'यस्ता व्यक्तिहरुको पहिचान गरी कारबाही गर्न र स्थितिलाई सहज बनाउन सुरक्षा निकायलाई निर्देशन दिइसकिएको छ ।' घटनामा आशंका गरिएका व्यक्तिहरुलाई अनुसन्धानको घेरामा ल्याउन र दोषी भए कडा कानुनी कारबाही गर्न प्रधानमन्त्रीको निर्देशन छ ।

Yamaha

प्रधानमन्त्री ओलीले आन्दोलनको बहानामा व्यक्तिगत र सार्वजनिक सम्पत्ति तोडफोड गर्नेलाई कानुनबमोजिम कारबाही गर्न सरकार प्रतिबद्ध रहेको पनि बताए । 'बालिका बलात्कार गरी हत्या गर्ने, आन्दोलनका नाममा तोडफोड गर्ने र हिंसा मच्चाउने सबैलाई कारबाही हुन्छ । यसमा सरकारले कुनै कसर बाँकी राख्दैन ।' ओलीले घटनालाई राजनीतिकरण गर्नेहरुबाट सजग हुन पनि आग्रह गरेका छन् ।

ओली र दाहाललाई भेट्न नेकपाका स्थायी समिति सदस्य भीम रावल नेतृत्वको टोली बालुवाटार पुगेको थियो ।

प्रकाशित : भाद्र ९, २०७५ १७:४५
ADVERTISEMENT
प्रतिक्रिया
पठाउनुहोस्
ADVERTISEMENT

कांग्रेस महासमिति बैठक दुई महिनापछि सर्‍यो

मंसिर ५ देखि ९ सम्म काठमाडौंमा हुने
कान्तिपुर संवाददाता

काठमाडौँ — अन्तत: कांग्रेस महासमिति बैठक दुई महिनापछि सरेको छ । कांग्रेस केन्द्रीय कार्यसमितिको आइतबारको बैठकले महासमिति बैठक मंसिर ५ देखि ९ गते काठमाडौंमा गर्ने निर्णय लिएको हो । यसअघि वैशाख १६ को केन्द्रीय कार्यसमितिको बैठकले नै भदौ महिनाभित्र महासमिति बैठक गर्ने निर्णय गरेको थियो । 

सभापति शेरबहादुर देउवाले महामन्त्री पूर्णबहादुर खड्काको नेतृत्वमा गठित विधान मस्यौदा समितिले दुई साताभित्र विधानको मस्यौदा सम्पन्न गर्न नसक्ने र त्यसपछि चाडपर्व सुरु हुने भएकाले मंसिरमा महासमिति बैठक गर्ने प्रस्ताव गरेका थिए । जसलाई सर्वसम्मतिले पारित गरेको कांग्रेस केन्द्रीय सदस्य अर्जुननरसिंह केसीले बताए । ‘वैचारिक द्वन्द्वबीच महासमिति बैठक मंसिरको पहिलो सातामा गर्ने निर्णय भएको छ’ उनले भने,‘जुन उद्देश्य पूरा गर्न महासमिति बैठक गर्न लागिएको हो त्यसलाई पन्छाएर आयोजना गर्नुको कुनै तुक नभएकाले मंसिरमै गर्ने निर्णय भयो ।’

तर, आन्तरिक विवादका कारण पार्टीको केन्द्रीय कार्यसम्पादन समिति र अनुशासन समिति गठन भने हुन सकेन । वरिष्ठ नेता रामचन्द्र पौडेल पक्षले यसअघि नै सदस्य संख्याको अनुपातमा आफ्नो पक्षले पाउनु पर्ने माग गरेका कारण कार्यसम्पादन समितिमा सहमति जुट्न नसकेको हो । अनुशासन समितिको काममा निष्पक्ष र पारदर्शिता हुनुपर्ने भएकाले समितिमा बस्ने सदस्यहरु सर्वस्वीकार्य हुनुपर्नेमा पौडेल पक्षले जोड दिएको छ ।

प्रकाशित : भाद्र ९, २०७५ १७:३१
पूरा पढ्नुहोस्
प्रतिक्रिया
पठाउनुहोस्
ADVERTISEMENT
ADVERTISEMENT
ADVERTISEMENT