कञ्चनपुर घटनामा कहाँ चुक्यो गृह ?

कान्तिपुर संवाददाता

काठमाडौँ — गृह मन्त्रालयले समयमै निर्णय लिन नसक्दा कञ्चनपुर घटनाको छानबिनमा चुकेको विश्लेषण जानकारहरूले गरेका छन् ।

घटना भएलगत्तै पीडित र स्थानीयवासीले अनुसन्धानका लागि दबाब दिए पनि २४ दिनपछि वास्तविक दोषी लुकाएर अर्कै व्यक्तिलाई सार्वजनिक गर्नुले घटनामा स्थानीय प्रहरी–प्रशासनको लापरबाही देखिएको गृह प्रशासन मामिलाका जानकारहरूको बुझाइ छ । ‘स्थानीयले विश्वासै गर्न नसक्ने व्यक्तिलाई दोषीका रूपमा खडा गर्नु नै गलत हो,’ गृह प्रशासनका एक जानकारले शनिबार कान्तिपुरसँग भने, ‘२४ दिन अनुसन्धान गरिसकेपछि कम्तीमा सत्यको नजिक पुग्न सक्नुपथ्र्यो ।’

गृह मन्त्रालयले भदौ ७ गते (बिहीबार) जारी गरेको विज्ञप्तिमा ‘घटना लगत्तैदेखि स्थानीय प्रहरीले अनुसन्धान गर्नुका साथै केन्द्रीय अनुसन्धान ब्युरोबाट डीएसपीको नेतृत्वमा विशेष अनुसन्धान टोली खटाएर अनुसन्धानलाई तीव्रता दिएको’ दाबी छ । तर, दोषी भनी सार्वजनिक गरिएका व्यक्ति (दिलीपसिंह विष्ट) लाई स्थानीयले तत्कालै अस्वीकार गर्नुले ‘अनुसन्धान अधुरो र बनावटी’ भएको प्रस्ट हुन्छ ।

पीडित परिवार र स्थानीयवासीले प्रहरीले दोषी पहिचान गर्न चासो नदिएको र वास्तविक दोषी लुकाउन विष्टलाई खडा गरिएको दाबीसहित एसपी डिल्लीराज विष्टप्रति नै आशंका गर्दै प्रदर्शन चर्काए । ‘सतहमा आएका केही प्रमाणले प्रहरी प्रमुखका हिसाबले विष्टले घटनालाई ढाकछोप गर्न खोजेको देखिन्छ,’ गृहका एक जानकारले भने, ‘गृहले घटनालगत्तै ताकेता गरेको भए अवस्था यस्तो नहुन सक्थ्यो ।’

गृहले स्थानीय प्रहरी–प्रशासनलाई बेलैमा सचेत गराउन नसक्दा वा घटनालाई प्राथमिकतामा नराख्दा घटनाले उग्र रूप लिँदै गएको कतिपय जानकारको विश्लेषण छ । ‘यस्तो जघन्य घटनालाई गृह प्रशासनले सुरुमा सामान्य हिसाबले लिएको हो कि भन्ने देखिन्छ,’ एक अधिकारीले भने, ‘घटनाका दृश्य एकपछि अर्को सार्वजनिक हुन थालेपछि थेग्न सक्ने अवस्था भएन र बचाउको अभ्यास भएको देखिन्छ ।’

प्रदर्शनलाई मत्थर पार्न गृह मन्त्रालयले बिहीबार मन्त्रीस्तरीय निर्णय गरी ५ सदस्यीय छानबिन समिति गठन गर्नुका साथै प्रहरी प्रमुख विष्टसहितका अधिकृत र प्रमुख जिल्ला अधिकारी कुमारबहादुर खडकालाई फिर्ता बोलाएको छ । ‘गृहले माहोललाई शान्त गर्ने प्रयास त गर्‍यो तर यो एक्सन ढिलो भयो,’ एक पूर्वगृहसचिवले भने, ‘घटनाको गाम्भीर्यतालाई तत्कालै बुझ्न सक्नुपथ्र्यो, त्यो हुन सकेन ।’

गृह मन्त्रालयले घटना भएको दिनदेखि स्थानीय प्रहरी र केन्द्रीय अनुसन्धान ब्युरोकै टोली खटाउँदा पनि त्यति धेरै सफलता हात पारेको देखिन्न । बरु वास्तविकता लुकाउन धेरै समय खर्चिएको संकेत देखिएका छन् ।

किशोरीको बलात्कारपछि हत्या भएको घटनाबारे सहसचिव हरिप्रसाद मैनाली नेतृत्वको समितिले छानबिन सुरु गरेको छ । गृहले बिहीबारै कञ्चनपुरका प्रजिअ खडका, एसपी विष्ट र डीएसपी सेठीलाई राजधानी फिर्ता गरी तारानाथ अधिकारी, कुवेरसिंह कठायत र कृष्णराज ओझालाई पठाएको छ । ‘ढिलै भए पनि कारबाही प्रक्रिया अघि बढेको छ, अनुसन्धान सुरु भएको छ,’ ती अधिकारीले भने, ‘यो सकारात्मक पक्ष हो, आशा गरौं, वास्तविकता बाहिर आउला ।’

Yamaha

Esewa Pasal

प्रकाशित : भाद्र १०, २०७५ ०७:०८
ADVERTISEMENT
प्रतिक्रिया
पठाउनुहोस्

१५ दिनपछि महिलाको शव

भरत जर्घामगर

सिरहा — १५ दिनदेखि घरबाटै हराएकी गोलबजार नगरपालिका–१०, चोहर्वाकी ५५ वर्षीया कारीदेवी यादवको शव शनिबार बिहान बाँसघारीमा भेटिएको छ ।

शव उत्खननस्थलमा भेला भएका स्थानीय ।तस्बिर : भरत

नरहा गाउँपालिका–१ स्थित रामदेव यादवको बाँसघारीमा गाडेको अवस्थामा स्थानीयवासीले यादवको शव फेला परेका हुन् ।

साउन २५ गते बेलुका घरबाटै हराएकी उनको खोजी गर्दै हिँडेका गाउँलेले बाँसघारीमा माटोले पुरेको देखेपछि खनेका थिए । कपडाको आधारमा गाउँलेले शव पहिचान गरेका थिए । शव पोस्टमार्टमका लागि सिरहा अस्पताल लगिएको छ । बेपत्ता भएको १५ दिन बितिसक्दा पनि प्रहरीले चासो नदेखाएको भन्दै गाउँले आफैं खोजीमा जुटेका थिए । स्थानीयका अनुसार बाँसघारीमा एउटा बोरा र बाँसका झिक्राले छोपिएको आलो माटो देखेपछि खन्दा खुट्टा देखिएको थियो । खुट्टा देखिएपछि स्थानीयले प्रहरीलाई खबर गरेका थिए ।

शव भेटिएलगत्तै खोजीमा बेवास्ता गरेको भन्दै स्थानीयले प्रहरीविरुद्ध नाराबाजी गरेका थिए । उनीहरूले पूर्व–पश्चिम राजमार्गअन्तर्गत चोहर्वा खण्ड दुई घण्टा अवरोध गरेका थिए । आक्रोशित स्थानीयले हत्यारालाई कडा सजाय गर्न माग गरे । दुई घण्टापछि प्रमुख जिल्ला अधिकारी रुद्रप्रसाद पण्डित र प्रहरी प्रमुख जीवन श्रेष्ठ उपस्थित भएर छलफल गरेपछि राजमार्ग खुलेको थियो ।

डीएसपी माधवराज खरेलले गाडिएको शव पुरानो भएको र शवको पहिचानपछि पोस्टमार्टमका लागि जिल्ला अस्पताल पठाइएको जानकारी दिए । कारीदेवी र उनका जेठाजु रामदेव यादवबीच अंशसम्बन्धी मुद्दाको कारण हत्या भएको स्थानीयको दाबी छ । कारीदेवीले पुख्र्यौली सम्पत्तिको रूपमा ससुराको नाममा रहेको १ बिघा १६ धुर जग्गामध्ये १० कठ्ठा ८ धुर पाएकी थिइन् ।

तर ससुरा र पतिको निधनपछि ससुराको नामको तीन ठाउँमा गरी १६ कठ्ठा १६ धुर जग्गा लुकाएर राखेको भेटिएपछि त्यसमा अंश दाबीसहित कारीदेवीले २०७४ भदौ ५ मा सिरहा जिल्ला अदालतमा मुद्दा हालेकी थिइन् । उक्त मुद्दा फैसला हुनुअगावै भतिज लक्ष्मणले ‘मुद्दा फिर्ता नलिए जे पनि हुन सक्छ’ भन्दै पटक–पटक कुटपिट गर्ने र धम्क्याउने गरेको स्थानीयको भनाइ छ ।

कारीदेवी हराएको साँझ लक्ष्मण, उनका मामाका छोरा राधेश्याम र नाम नखुलेका अन्य दुई जना चोहर्वाको एक पसलमा मदिरा सेवन गरी लक्ष्मण ससुराली जान्छु भन्दै हिँडेको केही बेरमै कारीदेवी घरबाट हराएको स्थानीयको भनाइ छ । कारीदेवी हराएको दुई सातासम्म पनि आफन्त मौन बसेपछि खोजीका लागि उनकी बहिनीका छोरा यमकुमार यादवले जेठाजु रामदेव र लक्ष्मण यादवविरुद्ध इलाका प्रहरी कार्यालय गोलबजारमा किटानी जाहेरी दिएका थिए । जाहेरीका आधारमा प्रहरीले जेठाजु रामदेव र लक्ष्मणलाई गत मंगलबार नै नियन्त्रणमा लिएको थियो ।

जेठाजु रामदेवले पक्की घरमा बस्न नदिएपछि कारीदेवी सँगैको टालीको झुपडीमा एक्लै बस्थिन् । माइतमा कोही नभएका उनका छोराछोरी पनि छैनन् । गत साउन २५ गते राति ८ बजेतिर पानी परिरहेको र बिजुली पनि नभएका बेला उनी बेपत्ता भएकी थिइन् ।

प्रकाशित : भाद्र १०, २०७५ ०७:०६
पूरा पढ्नुहोस्
प्रतिक्रिया
पठाउनुहोस्
ADVERTISEMENT
ADVERTISEMENT
ADVERTISEMENT