किशोरी हत्या प्रकरण : सुरु भएन थप बयान

‘प्रहरीले छानीछानी कमजोर खोजेर फसाउन खोज्यो’
चित्रांग थापा, भवानी भट्ट

कञ्चनपुर — निर्मला पन्तको हत्या अनुसन्धानका लागि प्रहरीले पक्राउ गरेका रोशनी र बबिता बमको बयान आइतबार पनि सुरु भएको छैन । प्रहरीले आन्तरिक तयारी नसकिएकाले बयान ढिलो भएको बताएको छ ।

कर्फ्युका कारण सुनासन बनेको महेन्द्रनगर बजार । तस्बिर : भवानी/कान्तिपुर

Yamaha

डीएसपी कृष्णराज ओझालाई अनुसन्धान अधिकृत तोकेर सूक्ष्म अनुसन्धान भइरहेको एसपी कुबेर कडायतले जानकारी दिए । ‘हामीले आन्तरिक रूपमा गर्नुपर्ने अनुसन्धानका विभिन्न चरणमा काम गरिरहेका छौं,’ उनले भने, ‘बम दिदीबहिनीलाई पक्राउ गरेपछि आज (आइतबार) म्याद सकिएकाले बयान लिन सकिएन, भोलि म्याद थपेर बयान लिनेछौं ।’

जिल्ला प्रहरीले अनुसन्धान गरिरहेको र केन्द्रीय अनुसन्धान ब्युरो (सीआईबी) को टोलीले समेत सघाइरहेको कडायतले बताए । ‘अनुसन्धान जिल्ला प्रहरीले नै गर्ने हो, सीआईबी टोलीले प्राविधिक रूपमा सघाउने मात्र हो,’ उनले भने । डीएसपी अंगुर जीसीको नेतृत्वमा तीन सदस्यीय सीआईबी टोली घटनालगत्तै महेन्द्रनगर आएको थियो ।

‘घटनाको केन्द्रविन्दु नै बम परिवारको घर हो,’ भीमदत्त नगरपालिका–१८, भगतपुरका एक वृद्धले भने, ‘प्रहरीले घटनाको जानकारी पाएपछि बम दिदीबहिनीलाई अनुसन्धान दायरामा ल्याउनुको साटो संरक्षण गर्दै निर्दाेष सर्वसाधारणलाई धरपकड गर्ने काम गर्‍यो ।’ प्रहरीले गाउँका सोझासाझा, शारीरिक रूपमा अशक्त र सुस्त मनस्थितिका व्यक्तिलाई छानी–छानी पक्राउ गरेर हत्याको जिम्मा लिन दबाब दिएको आरोप उनले लगाए । ‘जो पनि आउँछन्, यही घरका विषयमा सोध्छन्, के भएको, के हुन्थ्यो, जवाफ दिँदादिँदा थाकिसक्यौं,’ स्थानीय भन्छन् ।

‘मलाई यही घटनामा प्रहरीले ११ दिनसम्म नियन्त्रणमा लिएर यातना र प्रलोभन दियो,’ बम परिवारका छिमेकी चक्रदेव बडुले भने, ‘दोषीलाई जोगाउन हामीजस्ता निर्दोष र कमजोरलाई दु:ख दिने काम भयो ।’ हिरासतमा रहुन्जेल अनुसन्धानमा खटिएका सुरक्षाकर्मीले दिनहुँ हत्याको जिम्मा लिन दबाब दिएको उनले बताए ।

‘जुन घरबाट किशोरी बेपत्ता भएकी हुन्, त्यो घरमा बस्ने बम दिदीबहिनीलाई सामान्य सोधपुछ मात्रै गरियो,’ भगतपुरकै अर्का स्थानीयले भने, ‘घाँस काट्न गएका महिलालाई समेत प्रहरीले नियन्त्रणमा लिएर केरकार गर्‍यो ।’

प्रहरीले किशोरी हत्याको २६ औं दिन भीमदत्त–२, बागफाँटाका ४१ वर्षीय दिलीपसिंह विष्टलाई सार्वजनिक गरेपछि स्थानीय आक्रोशित बनेका छन् । ती व्यक्ति दोषी हुनै नसक्ने स्थानीय बताउँछन् । ‘१० किलो सामान उठाउन नसक्ने व्यक्ति कसरी दोषी हुन सक्छ,’ स्थानीय भन्छन्, ‘प्रहरीले यस्तैलाई मात्र खोजेर दु:ख दियो ।’

कर्फ्यु खुकुलो पारिँदै
प्रशासनले महेन्द्रनगर बजार क्षेत्रमा लगाएको कर्फ्यु केही खुकुलो पारेको छ । गत शुक्रबार ८ बजेदेखि लगाइएको कर्फ्यु आइतबार ६ देखि १० बजेसम्मका लागि हटाइएको थियो । सोमबार ५ देखि १२ बजेसम्म कर्फ्यु लागू नहुने र १२ बजेदेखि अर्को निर्णय नहुँदासम्म जारी रहने जिल्ला प्रशासन कार्यालयका प्रशासकीय अधिकृत उदयराज जोशीले जानकारी दिए ।

प्रदेश सरकारले ५/५ लाख दिने
बलात्कारपछि हत्या गरिएको किशोरीका परिवार र शुक्रबार गोली लागेर मृत्यु भएका सन्नी खुनाका परिवारलाई प्रदेश सरकारले ५/५ लाख दिने निर्णय गरेको छ । आइतबार पीडित परिवारलाई भेट्न पुगेका प्रदेश ७ का आन्तरिक मामिला तथा कानुनमन्त्री प्रकाश शाहले उक्त जानकारी गराएका हुन् । यसका साथै पीडितलाई न्याय दिन र अपराधीलाई कडाभन्दा कडा कारबाही गर्न प्रदेश सरकार प्रयासरत रहेको उनले बताए । भीमदत्त नगरपालिकाले पनि दुवै पीडित परिवारलाई ३/३ लाख आर्थिक सहयोग प्रदान गर्ने निर्णय गरेको छ ।

Esewa Pasal

प्रकाशित : भाद्र १०, २०७५ २१:४१
ADVERTISEMENT
प्रतिक्रिया
पठाउनुहोस्
ADVERTISEMENT
ADVERTISEMENT

नेपालको तेस्रो जित

कान्तिपुर संवाददाता

काठमाडौँ — नेपालले एसिया कप छनोटका तयारीका क्रममा श्रीलंकामा सबै तीन अभ्यास खेलमा जित हात पारेको छ । कप्तान पारस खडका र दीपेन्द्रसिंह ऐरीको अर्धशतकपछि नेपालले आइतबार अन्तिम अभ्यास खेलमा कोल्ट्स क्रिकेट क्लबलाई ५ विकेटले पराजित गर्‍यो । 

पारसले ५८ र दीपेन्द्रले नटआउट ५२ रन बनाएपछि कोल्ट्स क्रिकेट मैदानमा नेपालले २ सय १७ रनको लक्ष्य ४२.४ ओभरमा २ सय १८ रन बनाउँदै पूरा गर्‍यो । ५७ बलको इनिङ्समा पारसले ६ चौका र १ छक्का तथा दीपेन्द्रले ५३ बल खेली ५ चौका र २ छक्का प्रहार गरे । सुवास खकुरेल २३ बलमा २२ रन बनाई आउट भएपछि पारसले अर्का ओपनर ज्ञानेन्द्र मल्लसँग पहिलो विकेटका लागि ८८ रन जोडे ।

ज्ञानेन्द्र ६५ बल खेली ४ चौका प्रहार गरी ४५ रनमा एलबीडब्लू आउट भए । २ रनको अन्तरमा नेपालले ज्ञानेन्द्र, पारस र विनोद भण्डारी (१) लाई गुमाएको थियो । सागर पुन पनि ५ रनमै आउट भएपछि नेपाल १५०–५ को स्थितिमा पुग्यो । दीपेन्द्र र आरिफ शेखले छैटौं विकेटका लागि ६८ रनको नटआउट साझेदारी गरी नेपाललाई जित दिलाए । कोल्ट्सका एयाना श्रीबद्र्धनेले २ विकेट लिए ।

यसअघि टस जितेको कोल्ट्स निर्धारित ५० ओभर खेल्नु एक बलअघि २ सय १६ रनमा अलआउट भएको थियो । मध्यक्रमका ब्याट्सम्यानको योगदानपछि कोल्ट्सको इनिङ्स उकासिएको थियो । छैटौं नम्बरमा ब्याटिङ गरेका हसन हेवानायकेले ५९ रन बनाए । ६७ बल खेलेका उनले ३ चौका र ३ छक्का प्रहार गरे । श्रीबद्र्धनेले ३६ र मदुरा लकमालले ३१ रन जोडे ।
नेपालबाट सोमपाल कामीले ३ विकेट लिए । उनले ९.५ ओभरमा १ मेडन राख्दै ३४ रन खर्चे । करण केसी र सागरले २–२ तथा ललितनारायण राजवंशीले १ विकेट लिए । बुधबार पहिलो अभ्यास खेलमा आर्मी क्रिकेट टिमलाई सजिलै ६७ रनले पराजित गरेको नेपालले दोस्रो अभ्यास खेलमा शुक्रबार ब्लुमफिल्ड क्रिकेट क्लबलाई डकवर्थ लुइस पद्धतिमा १ सय ७६ रनले पन्छाएको थियो ।

नेपाल क्रिकेट टोली सोमबार कोलम्बोबाट मलेसिया लाग्नेछ । नेपालले बुधबार ओमानसँग खेलेर एसिया कप छनोटको यात्रा प्रारम्भ गर्नेछ ।

प्रकाशित : भाद्र १०, २०७५ २१:३३
पूरा पढ्नुहोस्
प्रतिक्रिया
पठाउनुहोस्
ADVERTISEMENT
ADVERTISEMENT
ADVERTISEMENT