छोरी जोगाउनै मुस्किल

अमृता अनमोल, मनोज पौडेल

बुटवल — रुपन्देहीको कञ्चन गाउँपालिकास्थित मामाघर आएकी ७ वर्षीया ४ दिनअघि बलात्कारमा परिन् । जबरजस्ती करणी आरोपमा उनका मामाका साथी विकल पुन पक्राउ परेका छन् ।

राति बालिका चिच्याएपछि परिवारले थाहा पाएका थिए । पक्राउ परेका पुनविरुद्ध जिल्ला अदालतमा जबरजस्ती करणी मुद्दा दर्ता गरी अनुसन्धान चलिरहेको छ । बालिकाको उपचार भइरहेको छ । धादिङबाट मामाघर आएका बेला उनी करणीमा परेकी हुन् ।

रुपन्देही, कपिवलस्तुलगायत पश्चिम तराईका जिल्लामा बालिकामाथि यस्ता अत्याचारको शृंखला थामिएको छैन । अविभावकलाई छोरी जोगाउन मुस्किल परिरहेको छ । पछिल्लो समय छिमेकी, नातागोता र परिवारकै सदस्यबाट बालिका सुरक्षित छैनन् । रुपन्देहीको सियारी गाउँपालिकाकी २ वर्षीया दुधेबालिका पनि बचिनन् ।

Yamaha

गत साउन १४ गते घरभित्रै ती अबोध बालिका बलात्कारको सिकार भइन् । चिच्याएपछि परिवारले थाहा पाए । जबर्जस्ती आरोपमा प्रहरीले २६ वर्षीय राजकुमार चौधरीलाई पक्राउ गरेको छ । चौधरीविरुद्ध जबरजस्ती करणी मुद्दा दर्ता गरी अनुसन्धान भइरहेको प्रहरी नायब उपरीक्षक डिलबहादुर मल्लले बताए ।

कपिलवस्तुमा गत फागुन तेस्रो साता तीन दिन अन्तरमा २ बालिका बलात्कृत भए । कपिलवस्तु नगरपालिकाकी ५ वर्षीया विद्यालय गइरहेका बेला करणीमा परिन् तर उनले आफूमाथिको ज्यादती पत्तै पाइनन् । उनी विद्यालय पुगिन् । योनिबाट रगत बगेको देखेपछि घटना सार्वजनिक भयो । शिक्षिकाले प्रहरीलाई खबर गरुन्जेल संलग्न आरोपी फरार भइसकेका थिए ।

लगत्तै कपिलवस्तु नगरपालिकाकै ७ वर्षीयामाथि बलात्कार प्रयास भयो । उनलाई गाउँकै ७५ वर्षीयले त्यस्तो गरेको आरोप छ । वृद्धले चकलेट दिई प्रलोभनमा पारेर घर लगेका थिए । गोठमा पुर्‍याएर करणी गर्न लागेको देखेपछि होहल्ला भयो । त्यसपछि वृद्ध फरार भएका थिए । गाउँलेले नियन्त्रणमा लिएर अस्थायी प्रहरीचौकी जहदीमा बुझाए ।

अबोधमाथि करणी र यौन हिंसाका उजुरी बढिरहेका छन् । बालिका घरभित्रै असुरक्षित बनिरहेका छन् । प्रजनन अंग विकास नहुँदै यस्तो अपराधको सिकार भएका धेरै बालिका शारीरिक तथा मानसिक रूपमा विक्षिप्त छन् । यसले उनीहरूको वर्तमान मात्र होइन, भविष्य पनि संकटमा पार्ने स्त्री तथा प्रसूति रोग विशेषज्ञ डा. श्रीधर आचार्य बताउँछन् । साउनयता जिल्ला प्रहरी रुपन्देहीमा ३ नाबालिका बलात्कारमा परेको उजुरी छ । गत वर्ष यस्ता उजुरी ६८ वटा दर्ता भएका थिए । त्यसमा २३ यौन हिंसाका थिए, १० नाबालिक ।

कपिलवस्तुमा गत आवमा जबर्जस्ती करणी १७, करणी उद्योग २० र शरीर बन्धक एक गरी ३८ मुद्दा दर्ता भएको जिल्ला प्रहरीले जनाएको छ । यस्ता बालिका शारीरिक मात्र नभई मानसिक रूपमा पीडित भइरहेको अधिकारकर्मी मीना परियारले बताइन् । ‘उनीहरूलाई समाजमा पुन:स्थापना र आफ्नो अध्ययनलाई निरन्तरता दिन समस्या भइरहेको छ,’ उनले भनिन्, ‘कतिपयको बिहेवारी हुँदैन ।’ मादक पदार्थ सेवन गर्ने र यौन असन्तुष्टि भएका व्यक्ति बढी संलग्न भइरहेको प्रहरी अनुसन्धानले देखाएको छ ।

बालिकाले घटनाबारे सही सूचना दिन नसक्ने भएकाले सहजै उम्किन सक्ने सोचले घटना भइरहेका छन् । प्रहरी नायब उपरीक्षक कुमोद ढुंगाना बालिकालाई फकाउन, लोभ्याउन र धम्क्याउन सहज हुने र तिनले प्रतिकार गर्न नसक्ने भएकाले घटना बढेको बताउँछन् । बाहिरी वातावरणमा घुलमिल नभएका, मातृत्व नपाएका वा घरमा आमा नहुने र विद्यालय नजाने बालिका बढी निसानामा परेका छन् ।

सामाजिक संरचना र मानसिक प्रभावले बलात्कार घटना बढाएको विज्ञले बताए । पछिल्लो समय मान्छेमा मानसिक विकृति बढ्दै जाँदा घटना बढेको सामाजिक मनोविज्ञानका प्राध्यापक नारायणप्रसाद पन्थले बताए । उनका अनुसार आध्यात्मिक, नैतिक शिक्षा र सामाजिक काममा संलग्नतामा कमी आएकाले अहिले असन्तुष्टि बढेको हो । लागूपदार्थ तथा नशालु पदार्थ सेवनले मानसिक रूपमा पनि विकृत बनेको छ ।

दुव्र्यवहारको सिकार बालक पनि
बालिकासँगै बालकसमेत जबरजस्तीको सिकार हुन थालेका छन् । रुपन्देहीका ९ वर्षीय बालकलाई ललाइफकाइ अप्राकृतिक यौन दुव्यर्वहार गरेको आरोपमा प्रहरीले भारत स्थायी घर भई बुटवल ४ मा डेरा गरी बस्ने ७२ वर्षीय सुन्दर पुरीलाई पक्राउ गरेको छ ।

दिनभर जोगी बनेर भिक्षा माग्दै हिँड्ने पुरीले अभिभावकविहीन एक बाललाई पटकपटक यौन दुव्र्यवहार गरेको पाइएको छ । छिमेकीले प्रहरीलाई खबर गरेपछि गत साउन २६ मा पुरी पक्राउ परेका थिए ।

प्रकाशित : भाद्र ११, २०७५ ०७:४३
ADVERTISEMENT
प्रतिक्रिया
पठाउनुहोस्

बालिका जोगाउनै मुश्किल

बलात्कार र हिंसा थामिएन
अमृता अनमोल, मनोज पौडेल

बुटवल — कपिलवस्तु नगरपालिका ५ की ५ वर्षीया गत मंगलवार जबरजस्ती करणीको सिकार बनिन् । उनी बिद्यालय जाने क्रममा बलात्कृत भएकी हुन् । उनलाई आफूमाथि भएको अत्याचार पत्तै भएन ।

करणीपछि विद्यालय पुगिन् । कक्षामा पुगेपछि गुत्ताङगबाट रगत बगेको देखेर घटना खुल्यो ।

शिक्षिकाले प्रहरीलाई खबर गर्दासम्म आरोपी भागिसकेका थिए ।

प्रहरीले मायादेवी गाउँपालिका बलुहवाका ३० वर्षीय रामप्रसाद चमारलाई संलग्न आरोपमा पक्राउ गरेको छ । बिहान नहरछेउ करणी गरेको उनीमाथि आरोप छ । बालिकाका हजुरबुवाका अनुसार गाउँका ६ बालबालिका पढ्न खेत हुँदै गइरहेका थिए । ‘रामप्रसादले नातिनीलाई ललाई(फकाई गरे,’ उनलेभने, ‘नहरको छेउ झाडीमा जबरजस्ती गरेर फरार भए ।’

एक महिनाअघि खेतमा घाँस काटन गएकी रुपन्देही कोटहीमाई ३ की १२ वर्षीया बालिका घर फर्किनन् । खोजी गर्दै गएका परिवारका सदस्यले उनको शव खेतको आलीमा फेला पारे । घटना अनुसन्धान गरिरहेको प्रहरी बालिकाको बलात्कारपछि हत्या भएको निष्कर्षमा पुग्यो ।

हत्या आरोपमा प्रहरीले गाउँकै २१ वर्षीया सन्दीपकुमार धोबीलाई पक्राउ गर्‍यो । आरोपीले बालिका एक्लै देखेपछि आवेशमा आएर करणी गरेको र पोल खुल्ने डरले हत्या गरेको स्वीकार गरेको प्रहरी नायव उपरीक्षक डिल्लीनारायण पाण्डेले बताए । प्रहरीले अनुसन्धान प्रक्रिया पूरा गरी जिल्ला सरकारी वकिल कार्यालयमा रायसहित मिसिल पेस गरेको छ ।

साताअघि कपिलवस्तु १० कटुवाकी ७ वर्षीयामाथि करणी प्रयास भयो । गाउँकै ७५ वर्षीयाले त्यस्तो प्रयास गरेका हुन् । ती वृद्धले चकलेट दिएर फकाउँदै घर लगेका थिए । गोठमा कपडा खोलेर शारीरिक सम्बन्ध राख्न लाग्दा एउटा केटाले देखेपछि होहल्ला भएको थियो । त्यसपछि वृद्धा फरार भए ।

साँझ गाउँलेले उनलाई नियन्त्रणमा लिएर प्रहरीमा बुझाए । यी घटनाका अनुसन्धानमा संलग्न प्रहरी अधिकृतका अनुसार बालिका र किशोरी सजिलै प्रलोभनमा पर्ने र धम्क्याउन सजिलो हुने, प्रतिकार गर्न नसक्ने र यौन हिंसाको हाउभाउ नबुझ्ने भएकाले जबरजस्ती भइरहेको छ । बाहिरी वातावरणमा घुलमिल नभएका र विद्यालय नजाने बालिका निशानामा पर्नेगरेका छन् ।

अभिभावकले छोरीमाथि हुने करणीलाई इज्जतसँग जोड्ने र भविष्यमा बिहेवारी गर्न समस्या हुने डरले लुकाउँदा अपराधीको मनोबल बढेको छ । जिल्ला प्रहरीको महिला तथा बालबालिका सेवा केन्द्र प्रमुख लक्ष्मण विक सूचना प्रविधिको गलत प्रयोगले बलात्कारका घटना बढी भएको बताउँछन् ।

इन्टरनेटबाट अश्लील भिडियो हेर्ने र रातिसम्म बाहिर बस्ने तथा मादक पदार्थ सेवन गर्ने व्यक्ति बलात्कारमा बढी संलग्न रहेको उनले जनाए । जाडोभन्दा गर्मी समयमा घटना बढी हुने गर्छ । ‘यस्ता घटनामा धेरैजसो आफन्त र छिमेकी पीडक हुन्छन्,’ उनले भने,‘ ‘उनीहरूले अपराधको प्रमाण लुकाउन पीडितलाई फकाउने र धम्क्याउनेदेखि साक्षीलाई बयान फेर्न लगाउनेसम्मका हत्कण्डा प्रयोग गर्छन् ।’

विज्ञहरू सामाजिक संरचना र व्यक्ति विशेषमा बढ्दो मानसिक विकृतिले घटना बढेको मान्छन् । आफूले गरेका कर्मको असर र नतिजाबारे मान्छेले ध्यान नदिँदा बलात्कार र हिंसाका घटना बढेको मनोविज्ञानका प्राध्यापक तारा भट्टराईले बताए ।

उनका अनुसार मानसिक विकृति हटाउने सामाजिक अभियान वा जागरण ल्याउन सके यस्ता घटना स्वत: कम हुने उनको भनाइ छ । पश्चिमा छाडा र नांगो संस्कृतिको आक्रामक प्रभावले यौन उत्तेजना बढ्ने र बलात्कारका घटना निम्त्याउने गरेको विश्लेषक अर्जुन ज्ञवाली बताउँछन् । ‘खानपिन, उत्तेजक पहिरन, रेस्टुरेन्ट र बारको संस्कृतिले आफूलाई नियन्त्रणमा राख्न नसक्दा समस्या बढ्दैछ,’ उनले भने ।

रुपन्देही प्रहरीको तथ्यांकअनुसार चालू वर्षको माघ मसान्तसम्म ३३ जनाले करणीविरुद्ध उजुरी दिएका छन् । त्यसमध्ये ९ यौन दुव्र्यवहारका हुन् । उजुरी दिनेमध्ये धेरै किशोरी छन् । गत वर्ष ७३ ले बलात्कारविरुद्ध उजुरी दर्ता गराएका थिए । त्यसमध्ये ३१ यौन दुव्र्यवहारका थिए । कपिलवस्तुमा चालू आवको फागुन १५ सम्म ७ जबर्जस्ती करणी र १० करणी उद्योगको मुद्दा दर्ता भएको प्रहरी कार्यालयले जनाएको छ ।

प्रकाशित : फाल्गुन २६, २०७४ ०९:२०
पूरा पढ्नुहोस्
ADVERTISEMENT
प्रतिक्रिया
पठाउनुहोस्
ADVERTISEMENT
ADVERTISEMENT
ADVERTISEMENT
ADVERTISEMENT