किशोरी हत्या प्रकरणः प्रहरी अनुसन्धान सूचना संकलनमै

चित्रांग थापा र भवानी भट्ट

कञ्चनपु — कञ्चनपुरको भीमदत्त नगरपालिका २ उल्टाखामकी १३ वर्षीया निर्मला पन्तको बलात्कारपछि हत्या घटनामा शंकाको घेरामा रहेका बम दिदीबहिनीमाथि थप अनुसन्धानका लागि अदालतबाट ६ दिनको म्याद थप भएको छ । गत शुक्रबार पक्राउ परेका रोशनी र वविता बमको सोमबार म्याद थप गरिएको हो ।

एक सातापछि खुलेको महेन्द्रनगर बजारमा सोमबार बिहान देखिएको चहलपहल । तस्बिर : भवानी भट्ट

जिल्ला प्रहरीका एसपी कुबेर कडायतले उनीहरूसँग आवश्यक सूचना लिने र सोधपुछ भइरहेको जनाए । स्थानीयले शंकास्पद रूपमा हेरेको किशोरी पढ्न गएको बम परिवारको घर, शव भेटिएको स्थानलगायत क्षेत्रमा समेत अनुसन्धान गरिरहेको उनले जनाए । ‘उनीहरूबाट आवश्यक सूचना लिने र त्यसलाई पछ्याउने काम गरिरहेका छौं,’ उनले भने, ‘तत्कालै केही भनिहाल्ने अवस्थामा छैनौं ।’

Yamaha

एसपी कडायतले यसअघि प्रहरीले सार्वजनिक गरेका भीमदत्त नगरपालिका २ बाग्फाँटाका दिलीप विष्टबारे पनि थप अनुसन्धान भइरहेको जानकारी दिए । साताअघि जिल्ला प्रहरीले घटनाका मुख्य आरोपी भनिएका मानसिक अवस्था ठीक नभएका विष्टलाई सार्वजनिक गरेपछि स्थानीयले असन्तुष्टि जनाउँदै आन्दोलन चर्काएका हुन् । आन्दोलनपछि गृह मन्त्रालयले प्रमुख जिल्ला अधिकारीसहित एसपी र डीएसपी सबैलाई केन्द्र फिर्ता गरेर नयाँ अधिकारी पठाएको थियो । कञ्चनपुरका तत्कालीन प्रहरी प्रमुख एसपी दिल्लीराज विष्टलाई निलम्बन गरिएको छ ।
नयाँ अधिकारी आएपछि घटनाको पुन: प्रारम्भिक रूपमै अनुसन्धान थालिएको छ । ‘हामीलाई उच्चस्तरीय छानबिन समितिबाट पनि केही सूचना प्राप्त हुनेछ,’ एसपी कडायतले भने, ‘यसले पनि अनुसन्धानमा सहज र सहयोग पुग्नेछ ।’

स्थानीयले आन्दोलन चर्काएपछि गृहले गठन गरेको उच्चस्तरीय छानबिन समितिले पनि आवश्यक सूचना संकलनको काम गरिरहेको छ । सर्वदलीय र सर्वपक्षीय छलफलपछि पीडित पक्ष, घटनास्थल, किशोरी पढ्न गएको घर र प्रहरीले सार्वजनिक गरेका व्यक्तिका परिवारसँग अवाश्यक सूचना संकलन गरिएको समिति संयोजक हरिप्रसाद मैनालीले बताए । ‘एक चरण सबैलाई भेटिसकेका छौं,’ उनले भने, ‘हामीहरू सूचना संकलनमै लागेका छौं, प्रहरीसँग पनि यस विषयमा सूचना लिइरहेका छौं ।’

सीआईबी टोली फर्कियो
घटनालगत्तै अनुसन्धानमा महेन्द्रनगर पुगेको सीआईबी टोली फिर्ता भएको छ । टोलीले गरेको अनुसन्धानसमेत शंकास्पद देखिएपछि फिर्ता भएको चर्चा छ । गत सोमबार अभियुक्तका रूपमा विष्टलाई सार्वजनिक गरिएपछि सीआईबीप्रति स्थानीय आक्रोशित बनेका हुन् । मृतक किशोरीका बुवा यज्ञराज त सीआईबीको टोलीले अनावश्यक दबाब दिएर घरमा बस्नै नसकिने वातावरण बनाएको बताउँछन् ।

‘अनुसन्धान त जिल्ला प्रहरीले नै गर्ने हो, सीआईबी त हामीलाई सहयोग गर्नमात्रै आएको हो,’ कडायतले भने, ‘अझ पनि प्राविधिक सहयोग सीआईबीले नै गर्नुपर्छ ।’ साउन ११ गते किशोरीको शव भेटिएको दोस्रो दिन डीएसपी अंगुर जीसी नेतृत्वमा ३ सदस्यीय सीआईबी टोली यहाँ आएको थियो ।

सामान्य बन्दै महेन्द्रनगर
गत सोमबार प्रहरीले अभियुक्तका रूपमा विष्टलाई सार्वजनिक गरेपछि चर्केको आन्दोलनपछि तनावग्रस्त बनेको महेन्द्रनगर बजार सामान्य बन्दै गएको छ । प्रहरीले बिहीबार र शुक्रबार प्रदर्शनकारीमाथि गोली चलाउँदा झनै उग्र बनेको आन्दोलन लगातारको कफ्र्युपछि बजार क्षेत्रमा शान्ति सुरक्षाको अवस्था सहज हुँदै गएको छ ।

शुक्रबार राति ८ बजे सुरु कफ्र्यु आइतबार बिहानमात्रै केही घण्टाका लागि खुला गरिएको थियो । दिनभरि पुन: कफ्र्यु लगाएर साँझ केहीबेर खुला गरियो । सोमबार भने दिनभरि कफ्र्यु हटाइयो । यसअघि सोमबार दिउँसो कफ्र्यु लाग्ने निर्णय भए पनि अवस्था सहज बन्दै गएका कारण दिनभरि खुला गरिएको जिल्ला प्रशासनका प्रशासकीय अधिकृत उदयराज जोशीले बताए । सोमबार साँझ ६ देखि मंगलबार बिहान ५ बजेसम्म कफ्र्यु लगाउने निर्णय भएको उनले बताए । कफ्र्यु खुलेसँगै महेन्द्रनगर बजार क्षेत्रमा चहलपहल बढेको छ । करिब सातापछि बजार र यातायात खुलेको छ ।

Esewa Pasal

प्रकाशित : भाद्र ११, २०७५ २०:५४
प्रतिक्रिया
पठाउनुहोस्
ADVERTISEMENT

कांग्रेस टोली महेन्द्रनगरमा

कान्तिपुर संवाददाता

कञ्चनपुर — निर्मला हत्या प्रकरणको स्थलगत वस्तुस्थिति बुझ्न कांग्रेस केन्द्रीय समिति टोलील महेन्द्रनगर आएर स्थलगत अध्ययन गरेको छ । प्रहरी अनुसन्धान क्रममा निर्दोष व्यक्तिलाई दोषी देखाएपछि आन्दोलन चर्केको टोलीको दाबी छ । आन्दोलनमा राजनीति भयो भन्ने अभिव्यक्तिसँगै उत्तेजित भएको उसको ठहर गरेको छ ।

‘कुनै पार्टी विशेषको अगुवाइमा आन्दोलन भएको होइन,’ प्रेस युनियन कञ्चनपुरले सोमबार गरेको पत्रकार भेटमा केन्द्रीय सदस्य एवं सांसद दिलेन्द्रप्रसाद बडुले भने, ‘कांग्रेस यसप्रकारको मानवीय संवेदनाको विषयमा राजनीति गर्दैन, राजनीतिक दोष एकअर्कालाई थोपर्नु भनेको अनुसन्धानलाइ प्रभावित पारेर ढाकछोप गर्नु हो ।’

घटनाबारे कांग्रेस खबरदारीमात्र गर्न खोजेको उल्लेख गर्दै नेता बडुले छानबिन क्रममा शंसय हुन थालेपछि शनिबारको केन्द्रीय समिति बैठकमा पहिलो एजेण्डा बनेको बताए । ‘आन्दोलन स्वस्फूर्त ढंगले भएको हो, आन्दोलनमा राजनीति भयो भन्ने अभिव्यक्तिलाई आन्दोलनरत पक्षले प्रतिवाद गरेका हुन् ।’ न्याय माग्दा राज्यपक्षले निर्ममतापूर्वक दमन गरेको आरोप उनले लगाए ।

टोलीमा संलग्न अर्का नेता वीरबहादुर बलायरले शनिबारको केन्द्रीय समिति बैठकमा घटना अनुसन्धानका लागि न्यायिक आयोग गठन गरिनु पर्ने मागबारे चर्चा हुँदा काँंग्रेस अनुसन्धानमा बाधक भयो भन्ने आरोप लाग्न सक्ने सम्भावनालाई बुझेर उच्चस्तरीय समितिको छानबिन नतिजा पर्खने निर्णय गरेको जानकारी दिए ।

न्यायिक आयोगको प्रसंग थाती राखेर कांंग्रेस यतिबेला उच्चस्तरीय आयोगको छानबिन नतिजा पर्खिबसेको बलाएरले बताए । घटनाका वास्तविक दोषी पत्ता लगाउन नसके कांँगेस सशक्त रुपमा अगाडि जाने उनको भनाइ छ ।

प्रकाशित : भाद्र ११, २०७५ २०:४३
पूरा पढ्नुहोस्
ADVERTISEMENT
प्रतिक्रिया
पठाउनुहोस्
ADVERTISEMENT
ADVERTISEMENT