राष्ट्रिय सभाका चारै समितिमा नेकपाको दाबी

राजेश मिश्र

काठमाडौँ — सत्तारूढ दल नेकपाले राष्ट्रिय सभाका चारवटै संसदीय समितिको नेतृत्व आफैंले लिने तयारी गरेको छ । प्रमुख प्रतिपक्षी कांग्रेसले संघीय संसदका १६ मध्ये एक चौथाइ समितिको नेतृत्व दाबी गरे पनि नेकपा त्यसमा अनुदार देखिएको छ । 

राष्ट्रिय सभामा दिगो विकास तथा सुशासन, विधायन व्यवस्थापन, प्रत्यायोजित व्यवस्थापन तथा सरकारी आश्वासन र राष्ट्रिय सरोकार तथा समन्वय समिति छन् । सबै समितिमा सदस्य चयन भइसकेको छ । ती सदस्यबाटै बुधबार सभापति चयन गरिँदै छ । राष्ट्रिय सभामा नेकपाका सचेतक खिमलाल भट्टराईले चारवटै समितिको नेतृत्वमा उम्मेदवारी दिने बताए । संसद् सचिवालयले मंगलबार बिहान १० देखि ४ बजेसम्म उम्मेदवारी मनोनयनका लागि समय निर्धारण गरेको छ ।

Yamaha


कांग्रेसले राष्ट्रिय सभामा कम्तीमा एउटा समितिको नेतृत्व आफ्नो पार्टीलाई दिन सत्तारूढ दललाई आग्रह गरेको छ । राष्ट्रिय सभामा कांग्रेस सचेतक सरिता प्रसाईंले संघीय संसदका दुवै सभामा आफूहरूको करिब एक चौथाइ उपस्थिति रहेकाले समितिको नेतृत्व पनि त्यहीअनुसार पाउनुपर्ने बताइन् । उनले प्रतिपक्षीलाई किनारा लगाएर सत्तापक्षले एकलौटी संसद् चलाउने चाहना देखाएको उल्लेख गर्दै भनिन्, ‘प्रतिपक्षीलाई समितिको नेतृत्व नदिने, प्रतिपक्षीबिनै संसद् चलाउने हो भने कार्यकारी र व्यवस्थापिकाबीचको सन्तुलन सम्भव होला ?’ उनले पार्टीको आन्तरिक बैठकपछि मात्रै समिति सभापति निर्वाचन सन्दर्भमा रणनीति तय हुन सक्ने बताइन् ।

समितिकै नेतृत्वमा उचित स्थान पाउनुपर्ने सुनिश्चितता माग गर्दै कांग्रेसले समितिमा बस्ने सदस्यको नाम बुझाउन आलटाल गरेको थियो । ‘नाम बुझाउनुस्, सभापति चयनको कुरा पछिको विषय हो, त्यसबेला सहमति गरौंला’ भन्ने सत्तारूढ दलको आश्वासनपछि आफूहरूले नाम बुझाएको कांग्रेस नेताहरूको भनाइ छ । तर, नेतृत्व चयनका बेला सत्तारूढ दलले संवादको चाहनासमेत नदेखाएको उनीहरूको गुनासो छ ।

राष्ट्रिय सभामा कांग्रेस सदस्य जितेन्द्रनारायण देवले सरकार सञ्चालनका लागि दुई तिहाइको बहुमत रहेको सरकार संसदभित्रका अन्य दल र प्रमुख प्रतिपक्षीप्रति असहिष्णु बन्ने मानसिकतामा देखिएको बताए । ‘शक्ति सन्तुलनका लागि पनि सत्ताधारी दलले संसदभित्र लिबरल भएर प्रमुख प्रतिपक्षी र अन्य दलका विचार मुखरित होस् भन्ने कार्यशैली अपनाउनुपर्ने हो,’ उनले भने, ‘तर त्यो कतै देखिएको छैन । सबैतिर आफ्नो नियन्त्रण राखेर जाने प्रयास गरिँदैछ । यो लोकतन्त्रको भविष्यका लागि राम्रो होइन ।’

राष्ट्रिय सभा र प्रतिनिधिसभा दुवैतिरका समिति सभापतिमा सत्तारूढ दलले उम्मेदवारी दिए अन्य दलले नेतृत्व पाउने सम्भावना शून्य रहन्छ । चुनावी प्रतिस्पर्धाबाट नेतृत्वमा पुग्न असम्भव देखिएपछि कांग्रेसले त्यस विषयमा राजनीतिक सहमति खोजिरहेको छ । राष्ट्रिय सभाको समितिका लागि मंगलबार तोकिएको उम्मेदवारी मनोनयन बिमस्टेक सम्मेलनपछाडि धकेलेर सत्तारूढ दलको नेतृत्वसँग छलफल गर्ने मनसाय कांग्रेस नेताहरूमा देखिएको छ ।

नेकपा सचेतक भट्टराईले उच्चस्तरमा केही नयाँ सहमति विकास भए मात्रै, नभए सबै समितिका सभापतिका लागि उम्मेदवार छान्ने काम अन्तिम चरणमा रहेको बताए । नेकपाले राष्ट्रिय सभाका चारवटा समितिका लागि परशुराम मेघी गुरुङ, रामनारायण बिडारी, भैरवसुन्दर श्रेष्ठ र पार्वती रावललाई उम्मेदवार बनाउन अन्तिम छलफल गरिरहेको छ । त्यसबाहेक कमला ओली, कालीबहादुर मल्ल, सुमनराज प्याकुरेल र बलराम बाँस्कोटाको नाम पनि चर्चामा छ ।

प्रकाशित : भाद्र ११, २०७५ २१:४२
ADVERTISEMENT
प्रतिक्रिया
पठाउनुहोस्

कक्षा ११ र १२ को वार्षिक कार्यतालिका

कान्तिपुर संवाददाता

काठमाडौँ — राष्ट्रिय परीक्षा बोर्डले कक्षा ११ र १२ को भर्नादेखि परीक्षा र नतिजा प्रकाशनसम्मको वार्षिक कार्यतालिका बनाएको छ । बोर्डले पहिलोपटक भर्नादेखि परीक्षाफल सार्वजनिक गर्ने बेलासम्मको कार्यतालिका तय गरेको हो । 

मुलुकभरका शिक्षण संस्थामा एकरूपता कायम गर्न र कामकारबाहीलाई व्यवस्थित गर्न कार्यतालिका तोकिएको जानकारी बोर्डका सदस्यसचिव दुर्गाप्रसाद अर्यालले दिए । कक्षा ११ मा भर्ना भएका विद्यार्थीलाई भदौ मसान्तभित्र रजिस्ट्रेसन फाराम वितरण सुरु गरेर असोज २१ भित्र संकलन गरिसक्ने उल्लेख छ । पुस १५ देखि माघ १५ भित्र कक्षा ११ र १२ को नियमित, आंशिक र ग्रेडवृद्धि परीक्षार्थीको परीक्षा आवेदन फाराम भरिसक्नुपर्नेछ । कार्यतालिकाअनुसार वैशाख र जेठमा सञ्चालन हुने दुवै कक्षाको परीक्षा तालिका माघ मसान्तसम्म प्रकाशित गरेर परीक्षा केन्द्र निर्धारण गरिसक्नुपर्नेछ ।

कक्षा १२ को प्रयोगात्मक परीक्षा चैत मसान्त र कक्षा ११ को वैशाख १५ भित्र सम्पन्न गरी प्राप्तांक बोर्डको कार्यालयमा पठाइसक्नुपर्ने अर्यालले जनाए । बोर्डले बाह्य निरीक्षक नपठाउने विषयको भने विद्यालयले प्रयोगात्मक परीक्षा सञ्चालन गरी चैत मसान्तभित्र प्राप्तांक पठाउनुपर्ने व्यवस्था गरिएको छ ।

कक्षा १२ को वार्षिक परीक्षा वैशाख दोस्रो सातादेखि र ११ को अन्तिम सातादेखि सुरु हुनेछ । ग्रेडवृद्धि परीक्षा १२ कक्षाको नतिजा प्रकाशन भएको ३५ र कक्षा ११ को ४५ दिनभित्र हुने कार्यतालिकामा उल्लेख छ । त्यस्तै कक्षा १२ को नतिजा प्रकाशन प्रत्येक शैक्षिक सत्रमा साउन मसान्तभित्र र ११ कक्षाको असोज मसान्तभित्र गरिसक्नुपर्नेछ ।

प्रकाशित : भाद्र ११, २०७५ २१:२९
पूरा पढ्नुहोस्
प्रतिक्रिया
पठाउनुहोस्
ADVERTISEMENT
ADVERTISEMENT
ADVERTISEMENT