युवाले पाए शैक्षिक प्रमाणपत्र धितो राखेर ऋण

राजबहादुर शाही

मुगु — खत्याड गाउँपालिका–८ सुकाढिक गाउँका वसन्त विकले शैक्षिक प्रमाणपत्र धितो व्यावसाय सञ्चालनको लागि निब्र्याजी २ लाख ऋण पाएका छन् ।

जनरल हेल्थ अध्ययन गरेर कतै रोजगार नपाएपछि आयआर्जनको निम्ति छायाँनाथ बचत तथा ऋण सहकारी संस्थामा आफ्ना सक्कल शैक्षिक योग्यताका प्रमाणपत्र धितो राखेर २ लाख ऋण लिएर किराना पसल सञ्चालन गर्न थालेका छन् ।

Yamaha


दु:खगरी पढेर रोजगार नपाएपछि शैक्षिक प्रमाणपत्र धितो राखेर २ लाख ऋणले दिगो व्यावसाय सञ्चालन गर्ने वसन्तले बताए । ‘प्रमाणपत्र बाकसमा राखेर के गर्नु ?’ उनले भने,‘बरु धितो राखेर ऋण लिनु उत्तम । ’

जिल्लामा बसन्त मात्र नभएर ३५ वर्षभन्दा मुनिका दिपक कार्की, जीवन कार्की लगायत ४ जना युवाले पहिलो पटक मंगलबार छायाँनाथ बचत तथा ऋण सहकारी संस्थाबाट आयआर्जनको लागि प्रति व्यक्ति दुई लाख रुपैया शैक्षिक लोन प्राप्त गरेका छन् ।

नेपाल सरकारको निति तथा कार्यक्रम अनुसार राष्ट्रिय युवा परिषद् मुगुका ४ जना युवालाई व्यावसाय सञ्चालनको निम्ति छनौट गरी सहकारी संस्थालाई ऋण उपलब्ध गराउन सिफारिस गरेको छ ।

यस जिल्लामा प्रथम पटक युवाले शैक्षिक प्रमाणपत्र धितोमा राखेर व्यावसाय सञ्चालन गर्न ऋण प्राप्त गरेको सहकारी संस्थाका कोषाध्यक्ष हरिबहादुर शाहीले जनाए ।

Esewa Pasal

प्रकाशित : भाद्र १२, २०७५ १७:२९
ADVERTISEMENT
प्रतिक्रिया
पठाउनुहोस्
ADVERTISEMENT

ठूला योजना वर्षौंदेखि अलपत्र

राजबहादुर शाही

मुगु — जिल्लामा सञ्चालित ठूलो लगानीका दुई योजना अलपत्र परेका छन् । सरकारले पर्याप्त रकम नछुटयाउँदा रारा विमानस्थल र गमगढी–नाक्चेनाग्ला–तिब्बत जोड्ने सडकमा काम हुन नसकेको हो ।

मुगुको नाक्चेनाग्ला–तिब्बतखण्डको छाइल भीरमा सडक निर्माणमा जुटेको डोजर । तस्बिर : राजबहादुर

रारा विमानस्थलको काम सुरु भएको ३५ वर्ष पुगे पनि अझै पूरा हुन सकेको छैन । गमगढी–नाक्चेनाग्ला सडकको गति पनि सुस्त छ । यो सडकमा दशकअघिबाट काम सुरु भएको थियो । विमानस्थलको टर्मिनल टावर, यात्रु जाँच पोस्ट, घेरबार, सार्वजनिक शौचालय र सुरक्षाकर्मी बस्ने भवन अझै बन्न नसकेका हुन् ।

काठको टहरामा उपकरण राखेर जहाज अवतरण गर्ने गरिएको छ । काठकै टहरो बनाएर सुरक्षाकर्मीले यात्रु जाँच गर्छन् । वरिपरि गतिलो घेरबार नहुँदा कुकुर र चौपाया धपाउन सुरक्षाकर्मीलाई हैरानी हुने गरेको छ । छायाँनाथ–रारा नगरपालिका ४, का वडाध्यक्ष विष्णुकुमार भामले विमानस्थलको काम ‘कछुवा गति’ मा भइरहेको बताए ।

ढल निकास नहुँदा थप समस्या भएको विमानस्थलका कर्मचारी बताउँछन् । चालु आवमा टर्मिनल टावरलगायत अन्य भौतिक पूर्वाधारका संरचना निर्माण गर्न १५ करोड बजेट माग गरिएको थियो । तर, स्वीकृति भएर नआएको विमानस्थल सुधार आयोजना प्रमुख प्रकाश श्रेष्ठले बताए ।

उनका अनुसार विमानस्थल तलमाथि रिटेनिङ वाल लगाउने काम भइरहेको छ । ‘कहिले बजेट अभाव त कहिले समयमा काम नहुँदा समस्या भयो,’ उनले भने, ‘वर्षायाममा जहाज ग्राउन्ड गर्ने पार्किङमाथि र दक्षिण–पूर्वपट्टिको भागमा पहिरो जाँदा समस्या भएको छ ।’ निर्माण सुरु भएदेखि हालसम्म २७ करोड बढी खर्च भइसकेको आयोजनाले जनाएको छ ।

यस्तै मुगुलाई छिमेकी जिल्ला र तिब्बत जोड्न सुरु गरिएको गमगढी–नाक्चेनाग्ला सडक पनि अलपत्र छ । सडक डिभिजन कार्यालय प्रमुख माधव अधिकारीका अनुसार यस वर्ष सडकका लागि सरकारले एक रुपैयाँ पनि विनियोजन गरेको छैन ।

गमगढीदेखि छाइलसम्म ठेकेदारमार्फत डोजरले सडक निर्माण गरेको छ । ८५ किमि लम्बाइको यो सडकले गति नलिँदा सडक सुविधाबाट सर्वसाधारण वञ्चित छन् । करिब १७ किमि मात्र ट्रयाक ओपन गर्दा १० करोड बजेट खर्च सडक डिभिजनले जनाएको छ । जिल्लाका २ ठूला योजनाले गति नलिँदा स्थानीयले विकासको अनुभूति गर्न नपाएको जिल्ला समन्वय समिति प्रमुख पूर्णबहादुर रोकायाले बताए ।

दुवै योजनाको निर्माणलाई गति दिन सरकारले पहल गरिरहेको प्रतिनिधिसभा सदस्य गोपाल बमको भनाइ छ । उनले मन्त्रीले पनि सकारात्मक जवाफ दिएकाले दुवै योजनाले यसै वर्षबाट गति लिने जानकारी दिए ।

प्रकाशित : भाद्र ११, २०७५ ०९:५८
पूरा पढ्नुहोस्
ADVERTISEMENT
प्रतिक्रिया
पठाउनुहोस्
ADVERTISEMENT
ADVERTISEMENT
ADVERTISEMENT
ADVERTISEMENT