घरको तला खस्दा एकै परिवारका ५ को मृत्यु

राति ९ बजेतिर घरमा सुतिरहेका बेला च्यापिएर रामसिंह कामी, उनकी पत्नी रामकला, छोरी गंगा, प्रमिला र छोरा रूपलालको मृत्यु भएको प्रहरीले जनाएको छ । सुनीता विक घाइते छिन् । उद्धारमा ढिलाइ भएकाले उनीहरूको मृत्यु भएको हो ।

वर्षाका कारण घरको जग भासिएपछि भित्ता भत्किएको थियो । भित्ता खसेसँगै उनीहरू सुतेको तला पनि खस्यो । कामी परिवारमा ८ जना थिए । छिमेकीको घरमा सुत्न गएका दुई दिदीबहिनी सकुशल छन् ।

‘राति भाइले चिच्याएर दिदी भनेपछि म ब्युँझिएँ,’ सुनीताले भनिन्, ‘भाइ मसँगै सुतेको थियो । उसको आधा भाग छोपिएको थियो । ढुंगामाटो फालेर तान्ने प्रयास गरेँ तर सकिनँ । उज्यालो भयो होला र बाबु–आमा काम गर्न गएका होलान् भन्ने लाग्यो ।’ भाइ च्यापिएको देखेपछि एक घण्टा टाढा पर्ने हजुरबुबाको घरमा बोलाउन गएको उनले बताइन् । ‘हजुरबुबालाई लिएर आउँदा भाइको पनि मृत्यु भइसकेको थियो,’ उनले भनिन् ।