सरकार म्याराथन गतिमा दौडिरहेको नेता भट्टराईको दाबी

आनन्द गौतम

ताप्लेजुङ — नेपाल कम्युनिष्ट पार्टी (नेकपा) का स्थायी कमिटी सदस्य तथा प्रतिनिधिसभा सदस्य योगेश भट्टराईले सरकार म्याराथनको गतिमा दौडिरहेको दाबी गरेका छन् । 

गृह जिल्ला ताप्लेजुङमा नेपाल प्रेस संगठनले गरेको पत्रकार सम्मेलनमा उनले कहाँ पुग्नु छ र कति समय लाग्छ भन्ने योजनासहित सरकार दौडिएको बताए । ‘सरकारका बारेमा धेरै सार्वजनिक प्रश्न उठेका छन्, यस्ता टिप्पणीले सरकारलाई झक्झक्याउँछ,’ भट्टराईले भने, ‘छ महिनामा धेरै चमत्कार भएको छैन, हामी म्याराथन धावक हौं, आफ्नो लयमा दौडिएका छौं ।’ पाँच वर्षको समयलाई दृष्टिगत गरेर काम गरेको दाबी गर्दै सय मिटर दौडनु जस्तो हतारमा दौडनु नपरेको उनको प्रस्टोक्ति छ ।

Yamaha

भट्टराईले पार्टी अध्यक्ष तथा प्रधानमन्त्री ओलीको प्रशंसा गर्दै उत्तर र दक्षिणका छिमेकीसँगको सम्बन्ध सुधारेको दाबी गरे । ‘कहिले उत्तर र दक्षिण भनेर चर्चा हुन्थ्यो चीनसँग मित्रता छँदै थियो, भारतसँगको पनि सुमधुर भएको छ,’ उनले भने, ‘रक्सौल-काठमाडौं रेलमार्ग एक वर्षमा सक्ने गरी सम्झौता भएको छ ।’

उनले पार्टी विभाजन जस्तो सजिलो एकता व्यवस्थापन नभएको बताए । ‘व्यत्तिका भावना, अपेक्षा, सिद्धान्त सबै कुरा मिल्नुपर्छ, हामी यी सबै कुरा मिलाएर यही महिनाको मसान्तसम्ममा टुग्याइसक्छौं,’ भट्टराईले थपे, ‘बाहिर हल्ला भएजस्तो एमालेलाई यति, माओवादीलाई यति भन्ने भागबण्डा छैन, योग्यतमहरुलाई जिम्मेवारी दिइन्छ ।’ मसान्तसम्ममा विभागीय कमिटीहरुको केन्द्रीय समिति पनि टुंगो लाग्ने बताए ।
भट्टराईका अनुसार प्रेस संगठन एकतापछिको पहिलो पत्रकार सम्मेलन ताप्लेजुङमा भएको हो । तर, जिल्ला संगठन भने एक भइसकेको छैन ।

प्रकाशित : भाद्र १६, २०७५ १९:१८
ADVERTISEMENT
प्रतिक्रिया
पठाउनुहोस्

कञ्चनपुर र जुम्ला घटनाको भर्त्सना

कान्तिपुर संवाददाता

काठमाडौँ — अन्तर्राष्ट्रिय सोसलिस्ट युथ युनियनले कञ्चनपुर र जुम्लामा शान्तिपूर्ण प्रदर्शनमा भएको दमनको विरोध गरेको छ । 

युनियनले सरकारलाई स्वतन्त्र, निष्पक्ष न्यायसम्पादन गर्न र मानव अधिकार रक्षा गर्न आग्रह गरेको छ ।

कञ्चनपुरमा निर्मला पन्तको बलात्कारपछि हत्या घटनाको निष्पक्ष र स्वतन्त्र छानबिन गरी दोषीलाई कारबाही गर्नुपर्ने माग राख्दै भएको प्रदर्शनमा प्रहरीले गोली चलाउँदा १७ वर्षीय युवक सुन्नी खुनाको मृत्यु भएको थियो भने दुई दर्जन बढी घाइते भएका थिए ।

युनियनले डा. गोविन्द केसीले पक्षमा जुम्लामा भएको प्रदर्शनमा भएको प्रहरी दमनले मानव अधिकार उल्लंघन भएको जनाएको छ ।

केसीको मागप्रति ऐक्यबद्धता जनाउँदै तरुण दलको अगुवाइमा काठमाडौंमा भएको प्रदर्शनमा दलका अध्यक्ष जितजंग बस्नेतप्रति लक्षित गरी प्रहरीले आक्रमण गरेको युनियनको दाबी छ ।

प्रकाशित : भाद्र १६, २०७५ १९:०८
पूरा पढ्नुहोस्
प्रतिक्रिया
पठाउनुहोस्
ADVERTISEMENT
ADVERTISEMENT
ADVERTISEMENT
ADVERTISEMENT