अन्तर प्रदेश परिषदको बैठक बस्ने

संविधानको धारा २३४ मा अन्तर प्रदेश परिषदको व्यवस्था गरिएको छ । प्रधानमन्त्री तथा मन्त्रिपरिषद् कार्यालयका प्रवक्ता विनोदबहादुर कुँवरले परिषदको पहिलो बैठकको तयारी अन्तिम चरणमा पुगेको कान्तिपुरलाई बताए ।

प्रधानमन्त्री कार्यालयले सोमबार परिषद् बैठकबारे संघीय मन्त्रालयका सचिवसँग छलफल गरेको थियो ।

परिषद् बैठकमा केन्द्र सरकारका मन्त्री र सचिव, सातवटै प्रदेशका मुख्यमन्त्री र प्रमुख सचिवहरू सहभागी हुनेछन् । परिषदको अध्यक्ष प्रधानमन्त्री हुने व्यवस्था छ ।

प्रधानमन्त्री कार्यालयमा प्रदेश समन्वय महाशाखासमेत हेर्ने सहसचिव सुशील ढकालले परिषद् बैठकका एजेन्डाबारे एक–दुई दिनमा टुंगो लगाइने जानकारी दिए ।

‘मुख्य एजेन्डा र को–कोलाई सहभागी गराउने भन्ने विषयमा छलफल चलिरहेको छ,’ ढकालले भने, ‘पहिलो बैठक भएकाले यसलाई ऐतिहासिक बनाउने उद्देश्य छ ।’