ट्राफिक नियम पालना नगरे खाजा र चकलेट !

रमेशकुमार पौडेल

चितवन — गाडी सानो होस् वा ठूलो चालकले सवारी चालक अनुमतिपत्र (लाइसेन्स), गाडीधनी पुर्जालगायत कागजपत्र साथमा राख्नुपर्ने नियम छ । गाडीको अवस्था चुस्त हुनुपर्छ । ट्राफिक नियम पालना गरी चलाउनुपर्छ । नियम पालना नगरे कारबाही भोग्नुपर्छ ।

स्कुटरको नम्बर प्लेट खुइलिएर नबुझिने भएपछि प्रहरीले चालकलाई जरिवानको साटो गुलियो खाजाको पोका दिँदै । तस्बिर : रमेशकुमार पौडेल

अचेल छडे जाँच गर्न जुनसुकै समय र ठाउँमा प्रहरी बस्छ। त्यसरी बस्ने टोलीले भेटे कारबाही स्वरूप जरिवाना तिर्नुपर्छ।

Yamaha

पूर्व-पश्चिम राजमार्गअन्तर्गत रत्ननगरमा मंगलबार दिउँसो ट्राफिक नियम पालना भए/नभएको चेक गर्न प्रहरीले छडे जाँच थाल्यो। ट्राफिक नियम पालना नगर्ने चालकहरू एकपछि अर्को भेटिए। तर, योपटक प्रहरीले कारबाहीका लागि जरिवाना तिर्न भन्दै रसिद काटेन। नियम मिच्नेहरूले चकलेट पाए। अनि ट्राफिक प्रहरी प्रमुख, प्रहरी निरीक्षक वेदप्रसाद गौतमको हातबाट गुलियो खाजाको पोका पनि साथै पाए।

‘थाहा पाएर पनि नियम पालना नगर्ने भनेको लापरबाही हो। जरिवाना नै काट्नुपर्ने हो। तर तपाईंहरूलाई लज्जाबोध होस भनेर चकलेट बाँडेका हौं,’ ट्राफिक प्रमुख गौतम चालकहरूलाई सम्झाउँदै थिए। गल्ती पनि गर्ने गुलियो खाजा पनि पाउने, यस्तो किन? इलाका प्रहरी कार्यालय रत्ननगरका प्रमुख दयानिधि ज्ञवाली भने, ‘कहिले-काहीं मीठो तरिकाले पनि नियम सम्झाउँ भनेर हो नि। अरू बेला कारबाही नै हुन्छ।’

चितवन सडक दुर्घटना धेरै हुने जिल्लामध्ये पर्छ। अघिल्लो आवमा २ सय ७१ दुर्घटना हुँदा १ सय ३२ जनाको ज्यान गएको थियो। ट्राफिक प्रहरी प्रमुख गौतमका अनुसार ५ सय २९ जना घाइते भए। त्यसैले सडकमा गुडा अपनाउनुपर्ने सावधानी र ट्राफिक नियमबारे अनेक तरहले चेतना जगाउनुपरेको गौतमको भनाइ छ। सडकमा उभिएर प्रहरीले जरिवाना मात्रै काट्छ भन्ने भावना हटाउन पनि गुलियो खाजा दिने सोंच बनाएको उनले बताए।

Esewa Pasal

प्रकाशित : भाद्र १९, २०७५ २१:२३
ADVERTISEMENT
प्रतिक्रिया
पठाउनुहोस्
ADVERTISEMENT

दुई छिमेकी सन्तुलन मिलाउन भारत चीनको भ्रमण : दाहाल

गंगा बीसी

काठमाडौँ — नेकपाका अध्यक्ष पुष्पकमल दाहालले एक साताको अवधिमा भारत र चीनको भ्रमण गर्ने जानकारी दिएका छन् । उनले दुई देशबीच सन्तुलन मिलाउन भ्रमण हुन लागेको जानकारी दिए ।

आफ्नो निवास ललितपुरको खुमलटारमा बुधबार पत्रकारहरुसँग कुरा गर्दै उनले भारतको भ्रमणका क्रममा प्रधानमन्त्री नरेन्द्र मोदीलगायतसँग छलफल गर्ने जानकारी दिए।

‘म इन्डिया र चाईना जान्छु। भारत पर्सी जान्छु,’ उनले भने, ‘भारतबाट फर्केको छ दिनपछि चाईना जान्छु। भ्रमणका क्रममा नेपालको हित हुने गरी भारत र चीनसँग गंभीर ढंगले कुरा गर्नुपर्छ। दुवै देशको नेतृत्वले मलाई आइदिए हुन्थ्यो भनेकाले जान लागेको हो।’

उनले प्रधानमन्त्री केपी शर्मा ओलीको भारत र चीन गएकाले भ्रमण सफल भएको र आफू त्यसमा थप योगदान गर्न त्यता जान लागेको बताए। ‘पार्टीमा दुई अध्यक्ष भएको हुनाले अर्को अध्यक्ष (आफू) को पनि भ्रमण भइदिए हुन्थ्यो भनेर चाहना राखिएको हो,’ उनले आफूलाई बोलाइएकोले दुई छिमेक भ्रमण गर्न लागेको बताए। ‘देशको विकास आयोजना सम्बन्धित भएर छलफल गर्नु उचित हुन्छ भनेर जान लागेको हो,’ उनले भने।

दाहालले काम नगर्ने सरकारका मन्त्री विरुद्ध कडा कदम चाल्न प्रधानमन्त्री र आफूबीच छलफल भइरहेको जानकारी दिए। ‘सरकारको काम कारवाहीबारे दुई अध्यक्षबीच समीक्षा सुरु भएको छ,’ उनले भने, ‘कुन विधि लैजाने भन्नेबारे र जरुरी परे सरकार र मन्त्रीको सम्बन्धमा कडा कदम चाल्नु पर्छ भन्ने तहसम्म छलफल भएका छन्।’

उनले पूर्व एमाले र माओवादीबाट मन्त्री भएका व्यक्तिभन्दा कामका आधारमा मूल्यांकन भइरहेको बताए।

‘एउटा पक्ष र अर्को पक्षको मन्त्री भनेर अहिले सोचिएको छैन। जो–जो छन्, जनतामा पर्न थालेको निराशाको अवस्थालाई हेर्दा जोसुकै होस् कदम चाल्नुपर्छ भन्नेतिर सोचाइ र छलफल केन्द्रित छ।’

उनले काम नगर्ने मन्त्रीलाई कस्तो कारबाही गर्ने भन्नेबारे भने स्पष्ट पारेनन्।

प्रकाशित : भाद्र १९, २०७५ २०:३२
पूरा पढ्नुहोस्
ADVERTISEMENT
प्रतिक्रिया
पठाउनुहोस्
ADVERTISEMENT
ADVERTISEMENT
ADVERTISEMENT
ADVERTISEMENT